Jan 1

₁Anvan Bondjé koumansé fè tout bagaj, Palò-a té ja la. Palò-a té ké Bondjé, Palò-a li menm té Bondjé.

₂Li té ké Bondjé anvan koumansman-an.

₃Bondjé fè tout bagaj ké li; anyen pa fèt san li.

₄Lavi-a té annan Palò-a. Lavi-a té limyèr moun-yan.

₅Limyèr-a ka kléré annan soukou-a; sa ki annan soukou-a pa asèpté l.

₆Bondjé voyé roun wonm, yé té ka rélé Jan.

₇Li vini kou roun témwen, pou sa témwen limyèr-a, pou tout moun krè li.

₈Li pa té limyèr-a, mé li té témwen limyèr-a.

₉Palò-a sa vrè limyèr-a, li vini ansou latè pou kléré tout moun.

₁₀Palò-a té ansou latè. Bondjé fè tout latè-a ké li, mé moun latè pa rikonèt li.

₁₁Palò-a vini kontré moun so koté, mé moun so koté pa asèpté l.

₁₂Mé tousa ki asèpté li, ki krè annan li, Palò-a bay yé drwè divini timoun Bondjé.

₁₃Yé pa divini timoun Bondjé ké disan matris roun manman, ni ké volonté di roun mouché ké so mandanm, ni ké volonté roun wonm, mé ké volonté Bondjé.

₁₄Palò-a divini roun wonm, li rété ké nou, ranpli ké gras ké vérité. Enren, nou wè so glwar, roun glwar kou sèl Pitit Bondjé rounso pouvé gen di so Papa.

₁₅Jan palé di li douvan tout moun: a di li mo té ka palé lò mo té ka di: “Li vini aprè mo, mé li pli gran ki mo, piski li té la anvan mo.”

₁₆Nou tout rousouvwè roun bi moso di so richès ké so lanmou, ké gras ansou gras.

₁₇Enren, Lalwa Bondjé vini ké Moyiz, mé gras ké lavérité vini ké Jézi-Kris.

₁₈Pésonn pa janmen wè Bondjé, mé so sèl Pitit, ki li menm sa Bondjé, ki ka viv òbò li, a li rounso ki fè nou konèt Papa-a.

₁₉Men témwanyaj Jan bay, lò dòkò jwif Jérizalenm-yan voyé dézoutrwa prèt ké lévit pou doumandé l: “Mé ki moun to fika?”

₂₀Li pa réfizé réponn yé. Kou dilo klè ansou roch, i di yé san mété dilo an so bouch: “Mo pa sa Kris-a.”

₂₁Alò yé doumandé l: “A ki moun to fika? Es to sa Eli?” Jan rélé: “Awa, a pa mo.” “Es a to ki sa Profèt-a?” Li réponn: “Awa!”

₂₂Atò yé viré doumandé li: “Mé monfi a kimoun to fika? Di nou l pou nou pouvé réponn dòkò ki voyé nou-an. Palé nou di to kò souplé.”

₂₃Jan di kou profèt Izayi-ya té di: “Mo sa vwè wonm ka rélé annan dézèr-a: préparé chimen Bondjé.”

₂₄A té dé farizyen yé té voyé.

₂₅Alò, yé viré doumandé l: “Poukisa to ka batizé moun si to pa sa Kris-a, si to pa sa Eli é si to pa sa Profèt-a?”

₂₆Jan réponn yé: “Mo, mo ka batizé moun annan dilo, mé an mitan zòt, li ganyen roun moun zòt pa konèt ka vini aprè mo.

₂₇E mo pa menm mérité tiré so soulyé.”

₂₈Sa bagaj-a té ka pasé Bétani, rot bò larivyè Jourden-an koté Jan té ka batizé moun-yan.

₂₉Roun jou té pasé lò Jan wè Jézi vini asou l. Epi li di l: “Men ti mouton Bondjé ka tiré péché tout moun.”

₃₀A di li mo té ka palé lò mo té ka di: “Li vini aprè mo, mé li pli gran ki mo, piski li té la anvan mo.

₃₁Mo, mo pa té konèt li, mé mo vini batizé moun annan dilo pou fè moun Izrayèl risouvwè l.”

₃₂Jan bay sa témwanyaj-a, li di: “Mo wè Lèspri Bondjé désann di syèl-a kou roun pijon blan é li rété ansou Jézi.”

₃₃Mo pa té konèt li, mé sala ki voyé mo batizé moun annan dilo-a, li di mo: “Ansou moun to ké wè Lèspri-a désann ké rété asou l, a sala ki ka batizé moun annan Sentèspri-a.”

₃₄Mo ka di sa mo wéy wè, mo ka asi ansou sa mo di: “Sa wonm-an a Pitit Bondjé.”

₃₅Rounnòt jou pasé, Jan té la toujou, ké dé di so disip;

₃₆Lò li wè Jézi ka pasé, i di yé: “Gadé, men Ti Mouton Bondjé.”

₃₇Dé disip-ya tandé palò Jan, é yé renki swiv Jézi.

₃₈Jézi tounen gadé dèyè, i wè yé ka swiv li, i doumandé yé: “kisa zòt lé?” Yé réponn li: “Rabbi (sa ki lé di Mèt), koté to ka rété?”

₃₉I di yé: “Vini wè.” Yé alé ké l, yé wè koté li té ka rété. Sa jou-a, yé rété òbò li. I té bòd katrèr laprémidi.

₄₀Roun di dé moun ki té tandé Jan é ki té swiv Jézi-a, té sa André, frè Simon Pyèr.

₄₁Pronmyen moun li kontré, a so frè Simon. I di li: “Nou fin trouvé Mési-a (sa ki lé di Kris).”

₄₂E li mennen l wè Jézi. Lò Jézi gadé l, i di: “To, to sa Simon pitit Jonas; anprézan yé ké rélé to Séfas (sa ki lé di Pyèr).”

₄₃Roun jou pasé, Jézi désidé pati Galilé, é li kontré ké Filip, li di l: “Swiv mo.”

₄₄Filip té sa moun Bètsayida, a la lonbri André ké Pyèr té planté osi.

₄₅Filip kontré ké Natanayèl épi li di l: “Nou trapé moun Moyiz té ékri asou l annan lalwa-a, moun profèt-ya té palé di l-a: a Jézi, moun Nazarèt, pitit Jozèf.”

₄₆Natanayèl di l: “Es li ganyen bon kichoz ki pouvé soti Nazarèt?” Filip réponn li: “Vini wè ké to wéy.”

₄₇Lò Jézi wè Natanayèl ka vini, i di asou l: “Men roun vrè Izrayélit, li pa ganyen pyès mové lèspri.”

₄₈Natanayèl di l: “Kot to konèt mo, en?” Jézi réponn li: “Anvan Filip rélé to, mo té ja wè to, lò to té anba pyé fig-a.”

₄₉Natanayèl réponn: “Rabbi to, to sa Pitit Bondjé, to sa rwè Izrayèl.”

₅₀Jézi réponn li: “Renk paski mo di to mo wè to anba pyé fig-a, to ka krè; mé sa ki dèyè pòkò touché, to ké wè pli gran kichoz kisa.”

₅₁E i di l ankò: “Enren sa mo di zòt-a a lavérité, dipi jodla zòt ké wè syèl-a louvri ké zanj Bondjé ka monté désann asou Pitit wonm-an: sa ki lé di Pitit Bondjé, li voyé annan lachè-a.”