Jan 18

₁Lò li fin” di sa, Jézi pati ké so disip, ròtbò ti larivyè Sédron-an. I té ganyen roun jarden koté li rantré ké so disip.

₂Atò Jida, ki té ka trayi li, té konèt sa koté-a, piski Jézi ké so disip té ganyen labitid vini la ansanm.

₃Jida vini annan jarden-an ké roun bann soda. Dòkò jwif-ya ké farizyen-yan té voyé dézoutrwa gard ké li osi. Yé té gen lanpyon, flanbo ké zarm.

₄Jézi ki té déja savé sa ki té ké rivé l, maché ansou yé é li di yé: “Ki moun zòt ka chaché?”

₅Yé di li: “Nou ka chaché Jézi wonm Nazarèt-a.” Jézi di yé: “A mo.” Jida, ki té ka trayi li, té dibout la ké yé.

₆Lò Jézi di yé “A mo,” yé bay dèyè épi yé tonbé atè.

₇Jézi doumandé yé ankò: “Ki moun zòt ka chaché?” Yé viré di: “Nou ka chaché Jézi wonm Nazarèt-a.”

₈Jézi réponn: “Mo déja di zòt li, a mo. Si a mo zòt ka chaché, lésé ròt-ya pati.”

₉A konran palò li té di-a fèt vrè. Li té di: “Papa, mo pa pédi pyès sa to bay mo-a.”

₁₀Simon Pyèr, ki té ganyen roun sab, ralé l soti, i frapé sèrvitèr Gran dòkò jwif-ya é li koupé so bò zòrè drèt. Yé té ka rélé l Malchi

₁₁Jézi di Pyèr: “Ranjé to sab annan so fouro. Ès mo pa divèt bwè pot soufwans Papa-a bay mo bwè.”

₁₂Soda-ya ké yé chèf, ké gard Dòkò jwif-ya, tchenbé Jézi é yé maré so lanmen.

₁₃Pronmyen koté yé mennen li a té koté Ann. I té bopè Kayif, Gran Dòkò Prèt jwif-ya sa lannen-an.

₁₄A Kayif ki té bay Dòkò jwif-ya sa lidé-a, i di: “Ii miyò roun sèl wonm mouri pou tout pèp-a.”

₁₅Simon Pyèr ké rounnòt disip té ka swiv Jézi. Sa disip-a té konèt Gran Prèt jwif-ya byen, é li rantré ké Jézi annan lakou kaz Gran Prèt-a.

₁₆Pyèr, limenm, rété dèrò òbò lapòt-a. Ròt disip Gran Prèt-a té konèt-a, viré soti, li palé pou madanm-an ki té ka véyé lapòt-a, é li fè Pyèr rantré andidan.

₁₇Madanm-an ki té ka gadé lapòt-a doumandé Pyèr: “To osi, to pa sa roun disip sa wonm-an?” Pyèr réponn: “Non, mo pa sa so disip.”

₁₈Li té ka fè frèt, a pousa sèrvitèr-ya ké gard-ya té limen roun fouyé difé, é yé té ka chofé yé kò. Pyèr té la ké yé, ka chofé so kò osi.

₁₉Gran Prèt-a koumansé kèksyoné Jézi ansou so disip é ansou sa li ansényé.

₂₀Jézi réponn li: “Mo palé douvan tout moun san mété dilo annan mo bouch. Mo toujou palé annan sinagòg-ya é annan lakou Kaz Bondjé-a koté tout moun ka kontré. Mo pa gen anyen di tou pou di an sigrè.

₂₁Poukisa to ka kèksyoné mo? Kèksyoné moun-yan ki kouté mo-a, sa-ya, yé byen savé sa mo di yé.”

₂₂Lò Jézi di sa, roun gard ki té la bay li roun dolanmen, é li di: “A konsa to ka réponn Gran Prèt-a?”

₂₃Jézi di li: “Si mo di roun kichoz di mal, montré l, mé si mo byen palé, poukisa to ka lévé lanmen ansou mo?”

₂₄Ansou sa, Ann fè yé mennen l, lanmen maré, koté Kayif, Gran Dòkò Prèt jwif-ya.

₂₅Pannan sa tan-an, Simon Pyèr té la ka chofé so kò. Yé di li: “To osi, ès to pa sa roun di so disip?” Mé Pyèr pa té lé di lavérité é li di: “Non, mo pa sa so disip.”

₂₆Roun di sèrvitèr Gran Prèt-a, fanmi sala Pyèr té koupé roun bò zòrè-a, di li: “A pa to, mo wè to ké li annan jarden-an?”

₂₇Roun fwè ankò, Pyèr pa di lavérité, é an menm tan-an roun kòk chanté.

₂₈Douvanjou, di koté Kayif, yé mennen Jézi annan gran kaz gouvèrnèr-a. Sa-ya ki mennen l-an pa rantré annan kaz gouvèrnèr-a, piski yé pa té lé sali yé kò, pou yé té pouvé manjé manjé lafèt Pak-a.

₂₉A pousa Pilat soti dèrò wè yé, é li doumandé yé: “Kisa zòt ka réproché sa wonn-an?”

₃₀Yé réponn li: “Si i pa té fè anyen di mal, nou pa té ké mennen l pou to.”

₃₁Pilat di yé: “Eben pran li zòt menm, é jijé li sélon zòt lalwa.” Jwif-ya di li: “Nou pa gen drwè désidé tchwé pésonn.”

₃₂A konsa palò-a Jézi té di-a, lò li té di kouman li té ké mouri, té ka koumansé fèt vrè.

₃₃Pilat viré rantré annan gran kaz gouvèrnèr-a, li aplé Jézi, é li doumandé l: “Es to sa rwè jwif-ya?”

₃₄Jézi réponn li: “Ès to ka doumandé mo sa di to menm, ou ès a moun ki di to sa ansou mo?

₃₅Pilat réponn: “Mo, ès mo sa roun jwif? A moun to koté ké Dòkò prèt-ya ki mennen to douvan mo. Kisa to fè?”

₃₆Jézi réponn: “Mo rwayonm pa ansou latè. Si mo rwayonm té ansou latè, moun ka sèrvi mo té ké briga pou mo pa té tonbé anba lanmen dòkò jwif-ya. Mé non, mo rwayonm pa ansou sa latè-a.”

₃₇Pilat di li alò: “Eben, to sa roun rwè?” Jézi réponn li: “A to ka di l: Mo sa roun rwè! (Note deuxième traduction: A to ka ki mo sa roun rwè!) Mo fèt é mo vini ansou latè pou bay témwanyaj lavérité-a. Nenpòt moun ki annan lavérité-a ka kouté mo palò.”

₃₈Pilat di li: “A kisa ki lavérité-a?” Ansou sa, li viré alé dèrò wè jwif-ya, é i di yé: “Mo pa trouvé pyès kichoz sa wonm-an fè pou mo pouvé kondanné l.

₃₉Mé sélon zòt tradisyon, pannan lafèt Pak-a, mo toujou laché roun moun ki lajòl. Ès zòt lé mo laché rwè jwif-ya?”

₄₀Yé koumansé rélé fò, yé di: “Non, pa li! A Barabas nou lé!” Atò, Barabas té roun gran bandi.”