Daved nglawan Amon lan Aram
1Sakwisé kuwi Nahas, ratuné turunané Amon, ninggal ndonya, anaké terus dadi ratu nggentèni piyambaké. 2Daved terus ngomong: “Aku bakal ngétokké enggonku kekantyan karo Hanun anaké Nahas, awit bapaké kekantyan karo aku.” Mulané Daved terus ngirimké kongkonan dikongkon masrahaké bélasungkawa marang piyambaké, awit sangka matiné bapaké. Nanging bareng para abdiné Daved tekan ing negara Amon lan nemoni Hanun ngomongké bélasungkawa marang piyambaké, 3para penggedéné turunané Amon pada ngomong marang Hanun: “Apa miturut panemumu Daved bakal ngekèki panghurmatan marang bapakmu, anggèné ngirimké para kongkonan nemoni sampéyan perlu ngomongké bélasungkawa kuwi? Apa ora karo karep bakal mriksa, ngindik lan terus bakal ngentèkké negara iki, anggèné para pegawéné pada nemoni ing ngarepé sampéyan iki?”
4Hanun terus ngongkon nyekel para abdiné Daved mau, terus dityukur lan sandangané ing tengah diketok nganti tekan ing pupuné, sakwisé mengkono terus dityulké. 5Waktu pada mulih, ana sing ngomong marang Daved bab para kongkonan mau, ratu terus kongkonan abdi nemoni, awit wong-wong mau banget enggoné pada digawé kisinan. Tembungé ratu: “Kowé pada manggona ing Yériko nganti jénggotmu tukul, terus pada balia.”
6Bareng turunané Amon pada weruh, yèn pada dadi jalarané disengiti karo Daved, Hanun lan turunané Amon terus kirim talénta slaka 1000 kanggo nyéwa kréta lan suradadu marang Aram-Mésopotamia, Aram-Maaka lan marang Aram-Soba. 7Sing diséwa kréta 32.000 lan ratu ing negara Maaka suradadu-suradaduné, sing terus pada budal lan manggon ing sak tyedaké Médeba. Uga turunané Amon pada nglumpuk sangka kuta-kutané lan bakal perang. 8Bareng Daved krungu bab kuwi, terus ngongkon marang Yoab supaya maju perang karo nggawa kabèh suradadu lan para penggedéné suradadu. 9Turunané Amon terus pada maju, enggoné nata barisan ing ngarepé gapurané kuta, nanging para ratu sing pada teka, pada manggon ing ara-ara. 10Bareng Yoab ngerti, yèn bakal katekan sangka ngarep lan sangka mburiné, terus milih sak bagéan wong pilihan Israèl, terus nata suradaduné adep-adepan karo wong Aram. 11Turahé suradadu dipasrahké marang pimpinané Abisai, adiké lan terus nata suradaduné adep-adepan karo wong Amon. 12Yoab terus ngomong: “Yèn wong Aram kuwi kekuwatané ngungkuli aku, kowé nulungi aku, nanging yèn turunané Amon kekuwatané ngungkuli kowé, kowé bakal tak tulungi. 13Sing tatak atimu lan hayuk pada kendel, iki kanggo bangsa kita lan kanggo kuta-kutané Gusti Allah kita. GUSTI supaya gelem nindakké apa sing apik ing ngarepé.” 14Yoab suradadu-suradaduné terus nyerang wong Aram, nganti wong kuwi pada mlayu ing ngarepé. 15Bareng turunané Amon weruh, yèn wong Aram wis pada mlayu, ya terus pada mlayu uga ing ngarepé Abisai, adiké Yoab, lan pada mlebu ing kuta. Sakwisé kuwi Yoab terus mulih menyang ing Yérusalèm.
16Bareng wong Aram weruh, yèn wis pada dikalahké karo wong Israèl, terus pada ngirimké kongkonan lan njaluk supaya wong Aram ing sabrangé kali Efrat pada maju perang dipimpin karo Sofak, komendané suradaduné Hadadèzèr. 17Bareng bab kuwi dingertèni karo Daved, wong Israèl kabèh terus pada diklumpukké, terus budal menyang ing sabrangé laut Yordan lan bareng wis tekan ing panggonané mungsuh, terus nata suradaduné nglawan mungsuh mau. Bareng Daved nata suradaduné adep-adepan karo wong Aram, wong Aram terus pada nyerang piyambaké, 18nanging wong Aram kuwi pada mlayu sangka ngarepé wong Israèl, lan sangka wong Aram mau sing dientèkké karo Daved jaran kréta ana 7000 lan suradadu ing daratan 40.000 wong, uga Sofak, penggedéné suradadu nganti tekan ing pati. 19Bareng wong sing pada teluk marang Hadadèzèr, weruh yèn wis dikalahké karo wong Israèl, terus pada rukunan karo Daved lan teluk marang piyambaké; sakwisé kuwi wong Aram ora gelem ngekèki pitulungan menèh marang turunané Amon.
