Daved ditetepaké dadi ratu
1Tembungé GUSTI marang Samuèl: “Sak pira suwéné enggonmu ngalami kasusahan, awit sangka Saul? Wong kuwi apa ora wis Tak tampik enggoné dadi ratuné Israèl? Wadahmu sungu isènana lenga lan lungaa. Kowé Tak utus menyang ing omahé Isai, wong Bètléhèm, awit anaké ana sing Tak pilih dadi ratu kanggo Aku.” 2Nanging Samuèl ngomong: “Kaya ngendi enggèn kula bakal budal? Yèn Saul krungu bab kuwi, mesti kula dipatèni.” Tembungé GUSTI: “Nggawaa sapi nom lan ngomonga: Tekaku iki arep masrahaké kurban marang GUSTI. 3Terus Isai undangen supaya nekani upatyara pangurbanan kuwi lan Aku bakal ngekèki weruh marang kowé, apa sing wajip kok lakoni. Terus wong sing Tak tuding kuwi jebatana kanggo Aku.” 4Samuèl terus nindakké apa sing dipréntahké karo GUSTI, lan teka ing kuta Bètléhèm. Para tuwa-tuwané kuta kono metuk Samuèl karo gemeter lan ngomong: “Teka sampéyan kuwi apa nggawa keslametan?” 5Semauré Samuèl: “Ya mengkono! Tekaku iki arep pasrah kurban marang GUSTI. Pada sutyèkké uripmu lan nekanana upatyara pasrah kurban iki karo aku.” Samuèl terus nyutyèkké Isai kabèh anak-anaké lanang lan ngulemi wong-wong kuwi marang ing upatyara pasrah kurban mau.
6Bareng pada mlebu, Samuèl weruh marang Eliab terus ngomong: “Terus mikir, wong sing bakal dijebatani saiki ngadek ing ngarepé GUSTI.” 7Nanging tembungé GUSTI marang Samuèl: “Aja nyawang marang praupané lan duwuré dedekké, awit kuwi wis Tak tampik. Sing didelok Gusti Allah kuwi béda karo sing disawang manungsa; manungsa mung nyawang sing kétok mripat; nanging GUSTI ndelok isiné atiné.”
8Isai terus ngundang Abinadab lan dikongkon mlaku liwat ing ngarepé Samuèl, nanging Samuèl ngomong: “Wong iki ya ora dipilih karo GUSTI.” 9Isai terus ngundang Syama, nanging Samuèl ngomong: “Wong iki uga ora dipilih karo GUSTI.” 10Mengkono enggoné Isai ngongkon anaké pitu mlaku liwat ing ngarepé Samuèl, nanging Samuèl ngomong marang Isai: “Kuwi kabèh ora ana sing dipilih karo GUSTI.”
11Samuèl ngomong marang Isai: “Apa iki anakmu kabèh?” Semauré Isai: “Sing ragil ijik kèri, nanging ijik angon wedus.” Samuèl ngongkon marang Isai: “Kongkonen nyeluk awit aku ora bakal mangan bebarengan, sak durungé kuwi teka mréné.” 12Terus kongkonan metuk anaké. Praupané abang, mripaté apik, rupané ngganteng. GUSTI terus ngomong: “Ngadeka jebatana, wong kuwi!” 13Samuèl terus njupuk wadahé sungu sing isi lenga lan Daved dijebatani ing sak tengahé seduluré. Wiwit ing dina kuwi lan sak terusé Rohé GUSTI nunggal karo Daved. Samuèl terus lunga mulih menyang ing Rama.
Daved ing kratoné Saul
14Nanging Rohé GUSTI wis ninggalké Saul lan saiki Panjenengané dikwasani karo roh ala kongkonané GUSTI. 15Para abdiné terus pada ngomong: “Ngertènana, rohé ala kongkonané Gusti Allah ngwasani sampéyan. 16Apiké bendara mréntaha para abdi sampéyan ing ngarepé sampéyan, nggolèki wong sing pinter main siter. Yèn rohé ala kongkonané Gusti Allah nekani sampéyan, wong iki dipréntahké main-siter, supaya ati sampéyan krasa tentrem.” 17Saul terus ngongkon marang para abdi: “Aku golèkana wong sing pinter main-siter, tyeluken nemoni ing ngarepku.” 18Sakwijiné abdiné ana sing ngomong: “Sakjané kula tau ngerti salah sijiné anaké Isai, wong Bètléhèm, sing pinter main-siter. Wong kuwi suradadu gagah lan rosa, salah sijiné suradadu, sing pinter ngomong, rupané ngganteng, lan GUSTI nunggal karo dèwèké.”
19Saul terus kongkonan wong menyang ing omahé Isai karo paweling: “Anakmu Daved, pangoné wedus-wedusmu, kongkonen ngadep ing ngarepku.” 20Isai terus njupuk kimar dimomoti roti, anggur sak kantong, lan tyempé siji, kuwi terus dikirimké marang Saul lantaran Daved, anaké. 21Kaya mengkono dadiné Daved terus nemoni ing ngarepé Saul lan didadèkké abdiné. Saul trésna banget marang Daved lan didadèkké tukang sing nggawa gamané. 22Mulané Saul terus kongkonan wong marang ing omahé Isai karo paweling: “Bèn Daved dadi abdiku, awit aku seneng marang dèwèké.” 23Lan yèn rohé ala kongkonané Gusti Allah nekani Saul, Daved terus njupuk Siter diunèkké; Saul nganti rumangsa lega lan ngrasaké kepénak, nanging rohé sing ala mundur sangka dèkné.
