Efésus 1

₁Sangka Paulus, rasulé Kristus Yésus awit sangka karepé Gusti Allah, marang para sutyi ing Efésus, ya para wong sing pada pertyaya ing Kristus Yésus.

₂Kawelasan lan katentreman sangka Gusti Allah, Bapak kita, lan sangka Gusti Yésus Kristus anaa ing kowé kabèh.

₃Pinujia Gusti Allah lan Bapaké Gusti kita Yésus Kristus, sing wis mberkahi kita ing Kristus karo sak rupané berkah kasukman ing swarga. ₄Awit ya ing Panjenengané kuwi Gusti Allah wis milih kita sak durungé jagat digawé, supaya kita pada sutyi tanpa tyiri ing ngarepé. ₅Awit sangka kawelasan-Né kawit wiwitan Panjenengané wis gelem netepaké kita diangkat dadi para anaké, awit sangka Yésus Kristus, miturut kekarepan-Né. ₆Supaya pinujia kawelasan-Né sing luhur, sing dikèkké marang kita ing Panjenengané sing ditrésnani. ₇Awit ya ing Panjenengané, kita dikèki tebusan, ya kuwi pangapurané dosa awit sangka getihé, miturut gedéné kawelasan-Né, ₈sing wis dilubèraké marang kita karo gedéné kawityaksanan lan pangertèn. ₉Awit Panjenengané wis medaraké wewadiné karepé marang kita, miturut rantyaman-kekarepan-Né, ya kuwi sing kawit wiwitan wis ditetepaké ing Kristus. ₁₀Kanggo tyetyawisan genepé waktu enggoné ndadèkké siji samubarang kabèh ing Kristus, sing dadi pemimpiné samubarang ing swarga uga ing bumi. ₁₁Ing Kristus, awit ya ing Panjenengané kuwi, kita pada olèh warisan sing dijanjèkké - kita sing sangka wiwitan wis pada dipilih karo Panjenengané tyotyok karo karepé Gusti Allah, sing nindakké samubarang miturut putusané karepé - ₁₂supaya kita sing sak durungé wis pada nduwé pengarep-arep ing Kristus, dililani dadi lantarané pamujiné kaluhuran-Né. ₁₃Ing Panjenengané kowé kabèh uga pada dityap karo Roh Sutyi sing dijanjèkké kuwi, —awit kowé wis pada ngrungokké tembung kabeneran, ya kuwi Injilé keslametanmu,— sakwisé kowé kabèh pada pertyaya. ₁₄Nanging Roh Sutyi kuwi sing dadi jaminané warisan kita nganti kita pada nampa tebusan sing njalari kita dadi duwèké Gusti Allah, supaya memuji kaluhuran-Né.

₁₅Mulané, aku iki sakwisé krungu kabar bab pertyayamu ing Gusti Yésus lan bab trésnamu marang sak kabèhé para sutyi, ₁₆ora mandek enggonku maturkesuwun awit sangka kowé kabèh. Lan aku tansah ngélingi kowé sak njeruhné pandongaku, ₁₇supaya Gusti Allah, Gusti kita Yésus Kristus, ya kuwi Bapak sing mulya kuwi, gelem ngekèki Rohé kawityaksanan lan wahyu marang kowé, supaya mbangun turutmu marang Panjenengané karo bener. ₁₈Lan supaya Panjenengané madangké mripaté atimu, supaya kowé ngerti marang pengarep-arep apa sing nang njeruhné kabèh panggilan-Né: Tenan gedéné warisan kamulyané kanggo para wong sutyi, ₁₉lan tenan gedéné pangwasané kanggo kita, sing pertyaya, tyotyok karo kekuwatan pangwasan-Né sing gedé, ₂₀sing ditindakké ing Kristus karo enggoné nangèkké sangka antarané wong mati lan njagongké ing swarga ing sisih tengen-Né, ₂₁banget enggoné ngungkuli luhuré sak kabèhé pemrintah lan pangwasa lan wibawa lan kraton lan saben jeneng sing kena disebut, ora mung ing ndonya iki waé, nanging uga ing jaman sing bakal kelakon. ₂₂Uga samubarang wis dipapanaké ing sak ngisoré sikilé Kristus lan Panjenengané wis dikèkké marang pasamuan kanggo sesirahé samubarang sing ana. ₂₃Nanging pasamuan kuwi sing dadi badan-Né, ya kuwi kebak kasampurnan ing Panjenengané, sing ngebaki samubarang.