Pangentasan 35

₁Moses terus nglumpukké sak pasamuan wong Israèl kabèh, lan pada diomongi mengkéné: “Iki tembungé sing dipréntahké karo GUSTI supaya pada dilakoni. ₂Nem dina wong pada nandangana penggawéané, nanging ing dina kaping pitu kudu ana waktu ngasuh sing sutyi, ya kuwi sabat, dina ngasuh kanggo GUSTI. Saben wong sing nglakoni penggawéan ing dina kuwi, kudu diukum pati. ₃Ing dina sabat kowé aja pada ngurupké geni ing ngendi waé ing sak njeruhné panggonan ing panggonanmu.”

₄Uga menèh tembungé Moses marang sak pasamuan wong Israèl kabèh: “Iki tembungé sing dipréntahké karo GUSTI: ₅Kowé pada masrahna pisungsung ngadep marang GUSTI sangka sing kok nduwèni. Saben wong karo legané atiné nggawaa pisungsung ngadep marang GUSTI: emas, slaka, tembaga, ₆bakal mori wungu tuwa, bakal mori wungu nom, bakal mori abang, mori lenan alus, wulu wedus, ₇lulangé wedus gèmbèl lanang sing dipulas abang, lulangé iwak tyutyut sing empuk, kayu akasia, ₈lenga kanggo dimar, bumbu-bumbu kanggo lenga jebat lan dupa sing wangi-wangi, ₉watu-watu onyx lan watu-watu sing bakal digunakké kanggo ing kotang éfod lan ing tutupé dada. ₁₀Terus sakkèhé wong sak panunggalmu sing pinter pada tekaa lan nggawéa samubarang sing wis dipréntahké karo GUSTI, ₁₁ya kuwi Tarup Sutyi, payoné Tarup, lan tutupé payoné, tyantèlané lan plangané, kayu sing malang, tyagaké lan umpaké; ₁₂peti kabèh pikulané, tutupé pangrukunan lan geberé aling-aling; ₁₃méja kabèh pikulané lan pirantiné kabèh lan roti kurban; ₁₄kandelar sing kanggo madangi kabèh pirantiné, dimar lan lengané sing kanggo madangi mau; ₁₅mesbèh dupané kabèh pikulané, lenga jebatan lan dupa sangka bumbu sing wangi; geber lawangé Tarup Sutyi; ₁₆mesbèh kurban obongan kabèh ayakan tembaga, pikulané lan pirantiné kabèh, wadah banyu dasarané; ₁₇geber plataran, tyagaké, umpaké lan geber gapura plataran; ₁₈patoké Tarup Sutyi lan patoké plataran kabèh taliné; ₁₉sandangan sragam kanggo ngladèni ing omah sutyi, lan sandangan sutyi sandangané imam Harun lan sandangané para anaké kanggo ngimami.”

₂₀Wong sak pasamuan Israèl kabèh terus pada bubaran sangka ngarepé Moses. ₂₁Sakwisé mengkono saben wong sing kerogoh atiné, karo lila sak kabèhé ati pada masrahaké pisungsung ngadep marang GUSTI, kanggo penggawéan ngrampungké Tarup Kumpulan lan kanggo kabèh kaperluané pangabekti ing kono uga kanggo nggawé sandangan sutyi. ₂₂Sakkèhé wong sing lila karo sak kabèhé atiné, lanang wadon, pada teka nggawa anting-anting irungé, anting-anting kupingé, ali-ali ségel lan kalung, werna-werna barang mas-masan; mengkono uga saben wong sing masrahaké pisungsung emas kanggo GUSTI kanggo pisungsung goyangan, ₂₃lan saben wong sing nduwé bakal wungu tuwa, bakal wungu nom, bakal abang, mori lenan alus, wulu wedus, lulangé wedus gèmbèl lanang sing dipulas abang, uga lulangé iwak, ya teka nggawa kuwi. ₂₄Saben wong sing arep masrahaké pisungsung rupa slaka utawa tembaga, kuwi ya teka lan nggawa pisungsung kuwi ngadep marang GUSTI, lan saben wong sing nduwé kayu akasia, ya teka nggawa kuwi kanggo ngedekké tarup kuwi. ₂₅Uga sakkèhé wong wadon sing pinter, pada nggawé mori déwé terus nggawa mori sing digawé mau, ya kuwi bakal mori wungu tuwa, bakal mori wungu nom, bakal mori abang lan mori lenan alus. ₂₆Lan sakkèhé wong wadon sing nduwé kaprigelan karo sak kabèhé ati pada nggawé mori wulu wedus. ₂₇Para penggedéné pada nggawa watu-watu onyx lan watu-watu sing bakal digawé kanggo kotang éfod lan tutupé dada, ₂₈bumbu-bumbu lan lenga kanggo dimar, kanggo lenga jebatan lan kanggo dupa wangi. ₂₉Sakkèhé wong lanang lan wadon sing sak kabèhé atiné pada nguruni kanggo sembarang gawèané sing dipréntahké karo GUSTI lantaran Moses supaya ditandangi wong-wong kuwi, ya kuwi wong Israèl, kuwi pada masrahaké pisungsung ngadep marang GUSTI.

₃₀Moses terus ngomong marang wong Israèl: “GUSTI wis netepké Bésaleèl anaké Uri anaké Hur, sangka taler Yéhuda, ₃₁wis dikèki Rohé Gusti Allah, nganti nduwèni kaprigelan, pangertèn lan kaweruh kanggo sak rupané penggawéan, ₃₂ya kuwi bisa gawé rantyamané sing kudu ditindakké bab nggawé dandanan emas, slaka lan tembaga, ₃₃ngukir-ngukir watu-watu lan dikanggokké, ngukir kayu lan nindakké sak rupané penggawéan sing wis dirantyam mau. ₃₄Lan GUSTI wis ngekèki kapinteran ing atiné, mengkono uga marang Aholiab anaké Ahisamak sangka taler Dan, nganti bisa mulangi, ₃₅pada dikèki kaprigelan bisa nggarap sak rupané penggawéan tukang, gawéané wong sing pinter, nggarap barang bakal mori sing werna-werna sangka bakal mori wungu tuwa, bakal mori wungu nom, bakal mori abang lan mori lenan alus, uga tenunan, tegesé bisa nggarap sak rupané penggawéan lan ngrantyam rupa-rupa.