Yéhèskièl 1

₁Ing taun sing kaping telung puluh, tanggal kaping lima sasi papat, waktu aku ing pinggir kali Kebar bebarengan karo para wong buwangan, terus langit mbiyak lan aku weruh wahyu sangka Gusti Allah. ₂Ing tanggal kaping lima sasi kuwi, ya kuwi ing taun kaping lima sakwisé Yoyakin dibuwang, ₃ana tembungé GUSTI tumuju marang imam Yéhèskièl, anaké Busi, ing negarané wong Kasdim ing pinggir kali Kebar lan ing kono tangané GUSTI numpangi Yéhèskièl.

₄Aku terus weruh, ana lésus sangka lor, sing nggawa mendung peteng lan geni mulat-mulat; mendung mau diubengi karo pepadang sing semlorot; ing njeruhné pernahé ing tengahé geni kuwi ana sing kaya slaka semlorot. ₅Ing tengah-tengahé kono uga ana sing rupané kaya makluk papat sing urip lan kuwi kétoké mengkéné: rupané kaya manungsa, ₆nanging siji-sijiné praupané papat lan ana swiwiné papat. ₇Sikilé lurus-lurus lan tlapakané sikil kaya tratyak pedèt, semlorot kaya slaka sing entas digosok. ₈Ing sak ngisoré swiwi ana tangané manungsa peneré ing sisih papat pisan. Nanging praupan lan swiwiné mau mengkéné: ₉swiwiné pada tempuk; yèn mlaku ora nganggo mingar minger, nanging lurus mengarep. ₁₀Praupané kétoké mengkéné: Praupané papat sing ngarep praupan manungsa, sing sisih tengen praupan singa, sing sisih kiwa praupan sapi, ing mburiné praupan manuk garuda. ₁₁Swiwiné pada diegaraké menduwur lan adu-arep loro-loro, nanging swiwi liyané nutupi awaké. ₁₂Kabèh mlakuné lurus mengarep, menyang ngendi kekarepané roh, ya mrana parané; enggoné mlaku ora nganggo mingar minger. ₁₃Ing sak tengahé makluk-makluk mau ana sing kétok kaya karo geni mengangah, kaya ontyor sing obah mrana-mréné ing antarané makluk-makluk sing urip kuwi; geni mau semlorot lan metu klélapé sing pada sesamberan. ₁₄Makluk-makluk sing urip kuwi pada mabur mrana-mréné kaya klélap.

₁₅Aku weruh, ing bumi ana glindingan ngadek sandingé makluk-makluk papat mau ing iringané ana glindingané siji, ₁₆rupané semlorot kaya watu-watu lazurit, papaté kembar lan kétoké ing tengahé glindingan kaya ana glindingané. ₁₇Yèn pada mlaku, bisa nuju menyang kéblat papat, ora nganggo mingar minger. ₁₈Glindingan-glindingan mau ana lés-pinggiré lan aku weruh pinggiran papat kuwi pada kebak mripat mubeng. ₁₉Yèn makluk sing urip kuwi pada mlaku, glindingané uga mlaku ing sandingé; lan yèn makluk sing urip kuwi pada diumbulké sangka bumi, glindingané ya pada katut diumbulké. ₂₀Menyang ngendi kekarepané roh, ya mrana parané para makluk mau lan glindingan-glindingan pada diangkat bebarengan karo makluk-makluk kuwi, awit rohé makluk-makluk sing urip kuwi manggon ing glindingané. ₂₁Yèn makluk sing urip kuwi pada mlaku, glindingané uga pada mlaku, yèn makluk mau pada mandek, glindingané ya pada mandek lan yèn makluk mau pada diumbulké sangka bumi, glindingané ya pada katut diangkat bebarengan karo makluk-makluk kuwi, awit rohé para makluk kuwi manggon ing glindingané.

₂₂Ing sak nduwuré sirahé makluk-makluk sing urip kuwi ana rupané sing mèmper langit, sing kétok kaya kristal ès sing medèni, digelar ing sak nduwuré sirahé. ₂₃Lan ing sak ngisoré langit kuwi swiwiné dibèbèr jejek, sing siji tempuk karo sijiné, kabèh pada nduwé swiwi loro sing nutupi awaké. ₂₄Yèn pada mlaku, aku krungu swara kebutané swiwiné kemrasak, kaya swarané grojokan, kaya swarané sing Mahakwasa, gembruduk kaya swarané suradadu okèh; yèn pada mandek, swiwiné diingkupaké. ₂₅Aku terus krungu swara sangka sak nduwuré langit sing mayungi sirahé; yèn makluk mau pada mandek, swiwiné diingkupaké. ₂₆Ing sak nduwuré langit sing mayungi para makluk mau ana rerupan sing kétok kaya dampar, kaya karo watu-watu diaman; lan ing sak nduwuré sing rupané kaya dampar kuwi ana sing kétoké kaya manungsa. ₂₇Wiwit sing kaya bangkèkan kuwi nganti tekan nduwur, aku weruh sing semlorot kaya slaka lan kaya geni ing sak ubengé ketutupan; lan sangka sing kaya bangkèkan tekan ngisor aku weruh sing kaya geni sing diubengi karo pepadang. ₂₈Kaya kluwung sing waktu udan kétok ing mendung, ya kaya mengkono kuwi kétoké pepadang sing ngubengi. Kaya mengkono kétoké gambaré kamulyané GUSTI. Bareng aku weruh kuwi aku terus nyembah sujut lan krungu swarané Panjenengané sing nggelar tembungé.