Yéhèskièl 29

₁Ing taun sing kaping sepuluh, tanggal rolas sasi kaping sepuluh ana tembungé GUSTI marang aku mengkéné: ₂“Hé, anaké manungsa, kowé ngadeka madepa nuju marang Parao, ratu Egipte lan nubuat nglawan ratu kuwi lan sak ubengé negara Egipte. ₃Kowé nggelara tembung lan ngomongna: Tembungé Gusti GUSTI mengkéné:

Aku dadi mungsuhmu, hé, Parao, ratu Egipte, bajul gedé sing ndlosor ing sak tengahé anak-anaké kalimu, ya kuwi kali Nil lan sing ngomong: Kali Nil kuwi duwèk-Ku, aku sing nggawé. ₄Rahangmu bakal Tak pasangi gantol, iwak-iwak ing tyawangané kalimu Nil bakal Tak tèmplèké ing sisikmu. Kowé uga iwak sing pada kelèt ing sisikmu bakal Tak sendal metu sangka sak tengahé tyawangané kalimu ₅lan kowé bakal Tak untyalké ing ara-ara samun, kowé uga kabèh iwak ing tyawangané kalimu. Kowé bakal tiba ing ara-ara lan ora bakal diklumpukké utawa dikubur. Kowé bakal Tak pakakké kéwan alasan lan manuk ing awang-awang. ₆Ing kono kabèh rayaté Egipte bakal weruh, yèn Aku iki GUSTI. Awit kowé kuwi upamané teken pring kanggo turunané Israèl: ₇ing waktu pada nyekel kowé karo tangan, kowé terus putung lan natoni pundaké wong mau kabèh; lan waktu pada sèndèn marang kowé, kowé terus putung lan wong-wong mau terus pada gloyoran kabèh. ₈Mulané mengkéné tembungé Gusti GUSTI: Aku bakal nekakké pedang sing nglawan marang kowé lan sing ngentèkké manungsa lan kéwan, ₉terus negara Egipte dadi sepi mamring lan dadi jugrukan. Ing kono terus pada weruh, yèn Aku iki GUSTI.

Awit kowé ngomong: Kali Nil kuwi aku sing nduwé, aku sing nggawé, ₁₀mulané Aku dadi mungsuhmu lan mungsuhé tyawangané kalimu lan negara Egipte bakal Tak dadèkké jugrukan lan sepi mamring wiwit sangka Migdol nganti tekan Siené, malah nganti tekan tapel watesé negara Etiopia. ₁₁Ora ana wong siji-sijia sing bakal liwat ing kono, malah kéwan siji waé ya ora, lan negara kuwi bakal ora dienggoni suwéné patang puluh taun. ₁₂Negara Egipte bakal Tak dadèkké sepi mamring ing sak tengahé negara-negara sing wis dientèkké lan kuta-kutané bakal sepi mamring ing sak tengahé kuta-kuta sing wis digempur suwéné patang puluh taun. Wong Egipte bakal Tak buyaraké ing antarané para bangsa lan Tak buyaraké, marang kabèh negara.

₁₃Awit mengkéné tembungé Gusti GUSTI: Ing pungkasané patang puluh taun mau para wong Egipte sing kasebar ing sak tengahé para bangsa kuwi bakal Tak klumpukké. ₁₄Lan kahanané negara Egipte bakal Tak balèkké lan wong-wong mau bakal Tak balèkké marang negara Patros, ya kuwi negara asal-usulé; ing kana bakal dadi kraton sing ringkih. ₁₅Dadi kraton sing ringkih déwé ing antarané kraton-kraton liyané lan ora bakal bisa ngunggulké awaké menèh ngungkuli bangsa-bangsa liyané. Bakal Tak dadèkké ringkih banget, terus ora bakal bisa mréntah bangsa-bangsa menèh. ₁₆Lan ora bakal dadi pengandelé turunané Israèl menèh, sing ngomongi marang kesalahané Israèl, yèn Israèl marani lan njaluk tulung mrana. Ing kono Egipte bakal weruh, yèn Aku iki Gusti GUSTI.”

₁₇Terus ing taun sing kaping pitulikur, tanggal siji sasi siji, ana tembungé GUSTI marang aku mengkéné: ₁₈“Hé, anaké manungsa, Nebukadnésar, ratu Babèl, ngongkon marang suradaduné supaya pada mempeng enggoné nglawan Tirus; kabèh sirah wis gundul lan sak kabèhé pundak wis pada mlèntyèt, nanging ratu kuwi lan suradaduné ora olèh pengasilané sangka Tirus ing bab enggoné mbudidaya nglawan Tirus mau. ₁₉Mulané mengkéné tembungé Gusti GUSTI: Aku ngekèkké negara Egipte marang Nebukadnésar, ratu Babèl lan kuwi bakal mbandang kasugihané; lan bakal ngrampas lan ngrampok lan iki kanggo upahé suradaduné. ₂₀Nebukadnésar bakal Tak wènèhi negara Egipte kanggo berkah kanggo apa sing wis digawé, awit wis nandangi penggawéan kanggo Aku. Mengkono tembungé Gusti GUSTI.

₂₁Ing dina kuwi Aku bakal nukulaké sungu kanggo turunané Israèl lan ndadèkké kowé terus bisa ngomong menèh ing sak tengahé wong-wong mau. Ing kono terus bakal pada weruh, yèn Aku iki GUSTI.”