Yosèf lan para seduluré
1Yakub manggon ing negara tilas panggonané bapaké sing dadi wong mantya, ya kuwi ing negara Kanaan. 2Iki lelakoné turunané Yakub. Yosèf waktu umur pitulas taun, dadi ijik nom, kulina angon wedus bebarengan karo sedulur-seduluré, anaké Bilha lan Silpa bojoné bapaké, lan Yosèf kuwi ngomongi marang bapaké bab penggawé alané para seduluré. 3Israèl enggoné trésna Yosèf ngungkuli para sedulur-seduluré liyané kabèh, awit Yosèf kuwi lairé waktu Yakub wis tuwa; lan Yosèf digawèkké jubah sing apik banget. 4Bareng sedulur-seduluré pada ngerti yèn bapaké enggoné trésna Yosèf ngungkuli karo liyané, nganti Yosèf disengiti lan ora gelem ngaruh-aruhi karo sumèh.
5Ing sakwijiné dina Yosèf ngimpi, impèné mau terus dityeritakké marang para sedulur-seduluré, nganti sedulur-seduluré saya mundak menèh sengité. 6Lan ngomong marang para seduluré: “Tyoba rungokna impèn sing tak impèkké iki: 7Aku lan kowé pada mbongkoki gandum ing kebon; bongkokanmu terus ngadek jejek, bongkokanmu terus pada teka ngubengi lan sujut nyembah marang bongkokanku.” 8Ing kono para seduluré pada ngomong: “Apa kowé kepéngin ngratoni kita?” Sak nalika saya mundak menèh sengité jalaran sangka impèné lan tembungé kuwi.
9Yosèf terus ngimpi menèh, kuwi ya dityeritakké marang para seduluré, tembungé: “Aku ngimpi menèh: Srengéngé, mbulan lan lintangé sewelas pada kétok sujut lan nyembah ana ngarepku.” 10Bareng bab iki dityeritakké marang bapaké lan para seduluré, nganti dinesoni karo bapaké: “Impèn apa ta impènmu kuwi? Mosok ta aku, ibumu lan para sedulurmu bakal pada sendeku ing bumi ing ngarepmu?” 11Sedulur-seduluré dadi pada serik marang Yosèf, nanging bapaké nyimpen perkara kuwi ing sak njeruhné atiné.
Yosèf didol menyang Egipte
12Ing sakwijiné dina para seduluré pada angon kéwan-kéwané bapaké ing Sikem. 13Israèl terus ngomong marang Yosèf: “Kakang-kakangmu ijik pada angon kéwan-kéwan ana Sikem. Mulané kowé tak kongkon niliki mbrana!” Tembungé Yosèf: “Ya bapak.” 14Terus tembungé menèh: “Kowé mbranaa, tilikana kahanané sedulur-sedulurmu lan kahanané kéwan-kéwané, mengko aku kabarana!” Mengkono Yakub enggoné kongkonan Yosèf sangka bawah Hébron lan terus wis tekan ing Sikem. 15Bareng Yosèf ijik mlaku mbrana-mbréné ing ara-ara, terus kepetuk sakwijiné wong lanang sing ngaruh-aruhi: “Sampéyan nggolèki apa?” 16Semauré Yosèf: “Kula nggolèki sedulur-sedulur kula, sampéyan bisa ngomongi kula ing ngendi anggèné pada angon?” 17Semauré wong mau: “Wis pada lunga sangka kéné, awit kula krungu anggèné pada rembukan: Hayuk pada menyang Dotan.” Dadi Yosèf terus nyusul para seduluré, lan pada ketemu ing Dotan.
18Sangka kadohan Yosèf wis disawang tekané, sak durungé nyedak para seduluré mau pada rembukan golèk akal supaya bisa matèni Yosèf. 19Gunemané mengkéné: “Wis kaé matké, tukang ngimpi kita teka! 20Kuwi hayuk pada dipatèni lan dityemplungi ing salah sijiné sumur kuwi, terus mengko diomongké yèn dipangan kéwan galak; mengko kita bakal weruh kepriyé kedadiané impèné kuwi.” 21Bareng Rubèn krungu sing kaya mengkono, karepé arep nylametaké Yosèf sangka tangané para seduluré, semauré: “Aja nganti kita patèni ta!” 22Tembungé Rubèn: “Aja nganti ngutahké getih, dityemplungké sumur ing ara-ara samun kono waé! Mung aja kok kapak-kapakké!” Kuwi sakjané supaya bisa ngluwari Yosèf sangka tangané para seduluré lan dibalèké marang bapaké.
23Bareng Yosèf ijik waé tekan ing ngarepé para seduluré, terus diutyuli jubahé, ya jubah sing apik banget sing ijik dienggo kuwi. 24Terus digawa lan dityemplungi ing sumur. Sumur mau asat, ora ana banyuné. 25Sakwisé mengkono terus pada mangan kembulan. Bareng pada ndangak, weruh ing kadohan ana tukang dagang bangsa Ismaél sing teka sangka Giléad, untané pada momot bumbu-bumbu, balsem lan blendok kismis, arep digawa menyang negara Egipte. 26Lan Yéhuda ngomong marang para seduluré: “Untungé apa yèn kita matèni adik kita lan ndelikké getihé? 27Hayuk pada didol waé marang wong Ismaél kaé, nanging aja nganti kita apak-apakké, awit kuwi sedulur kita, kulit daging kita.” Seduluré pada setuju kabèh. 28Ing waktu ana tukang dagang Midian liwat, Yosèf dientaské sangka njeruh sumur, lan didol marang wong Ismaél, payu rong puluh sèkel slaka; Yosèf terus digawa menyang ing negara Egipte. 29Bareng Rubèn mbalèni sumur mau, Yosèf wis ora ing njeruh sumur, terus nyuwèk-nyuwèk sandangané. 30Terus mbalèni para seduluré, tembungé: “Botyahé wis ora ana, lah aku menyang ngendi paranku?”
31Sakwisé mengkono terus pada njikuk jubahé Yosèf lan mbelèh wedus, lan jubahé dityelupké ing getihé. 32Jubah sing apik banget mau dikirimké marang bapaké, karo diweling mengkéné: “Iki enggèn kula pada nemu. Bapak kula suwun nitik, iki apa jubahé anak sampéyan apa duduk?” 33Bareng Yakub mriksa jubah mau, terus ngomong: “Iki jubahé anakku, mesti anakku wis dipangan kéwan galak lan wis disempal-sempal.” 34Yakub terus nyuwèk-nyuwèk jubahé, lan nganggo salin kasusahan diubetké ing bangkèkané uga gawé petangisan nganti pirang-pirang dina, awit sangka anaké mau. 35Para anaké lanang lan wadon pada nglipur, nanging ora gelem dilipur, tembungé: “Ora! Aku tetep sedih, nganti aku wis medun nyusul anakku menyang ing panggonané wong mati.” Mengkono Yakub enggoné nangisi Yosèf anaké. 36Yosèf didol karo wong Midian mau menyang ing negara Egipte, marang Potifar, penggedéné Parao, penggedéné sing njaga ratu.
