Hoséa 10

₁Israèl kuwi wit anggur sing betyik tukulé,

sing ngetokké woh,

mundak okèh pametuné,

mundak okèh enggoné nggawé mesbèh

lan mundak apik lemahé,

mundak apik enggoné nggawé tugu-tugu brahala.

₂Atiné lamis,

saiki kudu pada nanggung wohé kesalahané,

Gusti bakal ngremuk mesbèh-mesbèhé,

lan mbubrah tugu-tuguné brahala.

₃Lah saiki pada ngomong:

“Kita pada ora nduwé ratu,

awit kita pada ora tau ngajèni marang GUSTI,

nanging ratu kuwi bisa nindakké apa ta kanggo kita?”

₄Pada umuk-umukan,

pada nglairké sumpah palsu,

pada nggawé perjanjian ala,

sak nalika ngadili kliru tukul kaya wit upas

ing singkalané kebon.

₅Para wong sak isiné Samaria pada gemeter,

ing atasé pedèté emas ing Bétel.

Lah rayaté bakal sedih awit sangka kuwi,

lan para imamé pada sambat,

awit wis ilang kamulyané.

₆Pedèté bakal diboyong menyang Asyur,

kanggo pisungsung marang ratu “Gedé”.

Efraim bakal kewirangan,

ya, Israèl bakal kisinan awit sangka rantyamané.

₇Samaria bakal dientèkké,

ratuné kaya pang sing kemampul ing banyu.

₈Panggonan pangurbanan duwur dirusak, ya kuwi dosané Israèl,

bakal pada dientèkké.

Mesbèh-mesbèhé bakal pada ketukulan

eri lan rerungkutan.

Lan wong bakal pada nylatoni gunung-gunung:

“Aku pada urukana!”,

lan marang puntuk-puntuk: “Aku diembrukna!”

₉Hé Israèl, wiwit jamané Gibéa kowé wis nggawé dosa;

ing kana pada ngadek nglawan.

Ing Gibéa apa ora bakal ketututan karo perang

sing nglawan marang para wong lityik?

₁₀Aku teka perlu nggebuki wong-wong kuwi,

bangsa-bangsa bakal pada nglumpuk nglawan marang

wong-wong kuwi,

yèn pada kesiksa awit sangka kesalahané rong perkara.

₁₁Efraim kuwi mbiyèn pedèt sing wis dilatih lan seneng nutu,

lan Aku seneng

marang gitoké sing apik,

Efraim kuwi Tak rakitké,

Yéhuda kudu ngluku,

Yakub kudu nggaru lemah kanggo awaké déwé.

₁₂Kowé pada nyebara sing tyotyok karo keadilan,

ngunduha karo katrésnan!

Mbukaki negara anyar,

awit wis wantyiné nggolèki marang GUSTI,

nganti Panjenengané teka lan ngekèki keadilan sing lubèr marang kowé.

₁₃Kowé wis pada ngluku duraka,

sing ala sing kok unduh,

lan kowé wis pada mangan wohé ngapus,

awit kowé wis pada ngendelké krétamu,

uga okèhé penggedéné suradadumu.

₁₄Bakal njedul gembruduké perang ing antarané bangsamu,

lan sak kabèhé bèntèngmu bakal digempur,

kaya Salman enggoné ngentèkké Bèt-Arbel

ing waktuné gègèré perang,

ibu uga anak-anaké pada diremuk.

₁₅Kuwi sing dilakoni Bétel kanggo kowé,

hé turunané Israèl,

awit sangka bangeté durakamu.

Ing wayah ésuk wétan ratuné Israèl bakal dientèkké babar pisan.