Yésaya 27

₁Ing waktu kuwi GUSTI bakal nibakké paukuman karo pedangé sing atos, gedé lan kuwat

marang Léwiatan, ula sing mlayu,

marang Léwiatan, ula sing ngleker,

lan bakal matèni monster ula ing segara.

₂Ing waktu kuwi bakal diomongké:

“Ngidunga bab kebon anggur sing apik!

₃Aku, GUSTI sing njaga;

Aku sing tansah nyirami.

Supaya aja ana wong sing ngrusuhi,

awan wengi Tak jaga;

₄Aku wis ora nesu.

Yèn Aku weruh eri lan suket,

kuwi bakal Tak perangi

lan bakal Tak obong bareng,

₅kejaba yèn terus pada nggolèki pengayoman nang enggon-Ku

lan ngupaya rukun karo Aku,

ya ngupaya rukun karo Aku!”

₆Ing dina sing bakal kelakon,

Yakub bakal metu oyoté,

Israèl bakal tukul lan metu trubusané

lan bakal ngebaki bumi kabèh karo pametuné.

₇Apa GUSTI enggoné ngentèkké umaté

kaya enggoné ngentèkké wong sing ngentèkké umat mau?

Utawa apa enggoné matèni umaté

kaya enggoné matèni wong sing matèni umaté mau?

₈Panjenengan wis nglawan wong-wong iki, pada Panjenengan lungakké lan Panjenengan tundung.

Wis pada disingkirké karo angin sing banter waktu angin wétan.

₉Mengkéné iki enggoné kesalahané Yakub diilangi,

lan iki wohé yèn dosané wis didohké:

terus nggawé sak kabèhé watuné mesbèh

kaya watu kapur sing dipetyah-petyah,

terus ora ana menèh tugu brahala lan pedupan sing ijik ngadek.

₁₀Awit kuta rosa kuwi panggonané mentyil,

sakwijiné panggonan sing disuwungké

lan ditinggal kaya ara-ara samun;

pedèt bakal nyenggut suket lan njerum ing kono

lan ngentèkké pangé wit-witan.

₁₁Yèn pangé sing tyilik-tyilik wis garing, bakal pada disempali;

terus diobong karo para wong wadon sing pada teka.

Awit iki sijiné bangsa sing tanpa pikiran,

ya kuwi sing njalari ora dikèki

katrésnan karo sing nggawé

lan ora ditrésnani karo sing mbangun.

₁₂Ing waktu kuwi

GUSTI bakal nindakké pemilihan wiwit ing kali Efrat nganti tekan kali Egipte,

lan kowé kabèh bakal pada diklumpukké

siji-sijiné, hé wong Israèl!

₁₃Ing waktu kuwi

trompèt sing gedé bakal diunèkké,

lan sing ilang ing negara Asyur bakal pada teka,

mengkono uga sing dibuwang menyang negara Egipte

pada sujut nyembah marang GUSTI

ing gunung sing sutyi, ing Yérusalèm.