Yésaya 28

₁Tyilaka para penggedé sing gemunggung,

para tukang mendem ing Efraim,

sing umuk kanggo kutané:

- ya kuwi kuta ing nduwur, ing legokan sing subur,

sing kebak wong karo seneng ngombé anggur,

sing wis pada mumet!

Nanging kuta, makuta sirahé sing apik kuwi kembang sing wis alum.

₂Mung Gusti Allah sing nduwèni sakwijiné wong rosa lan kuwat,

wong sing kaya lésus tyampuran udan krikil,

ya kuwi lésus sing ngrusak

wong sing kaya lésus tyampuran udan

sing ngidap-idapi lan melèké;

wong-wong mau bakal dikeplèkké ing bumi karo rosa.

₃Makutané kamulyané para wong Efraim

sing seneng mendem kuwi bakal diidak-idak,

₄kaya kembang sing wis wiwit alum, ing makuta sirahé sing apik-apik kuwi

- ya kuwi kuta ing nduwur gunung, ing legokan sing subur -

kuwi kahanané bakal kaya woh anjir

sing mateng sak durungé waktu ketiga:

ijik waé wong weruh

terus dipetik lan diemplok.

₅Ing waktu kuwi GUSTI sing ngwasani langit lan bumi,

bakal ngadek dadi makutané sing apik,

lan makuta kembang sing apik kanggo turahané umaté,

₆bakal ngadek dadi rohé keadilan

kanggo wong sing lungguh nindakké pengadilan,

lan dadi rohé kekuwatan

kanggo wong sing ngundurké perang nganti tekan gapura.

₇Nanging senajan wong-wong ing kéné

ya pada mumet awit sangka anggur

lan ngelu awit sangka ombèn keras

Imam utawa nabi

mumet awit sangka ombèn keras,

bingung awit sangka anggur;

pada mumet awit sangka ombèn keras,

mumet waktu weruh wahyu,

senpoyongan waktu ngekèki putusan.

₈Lah méjané kabèh kebak utah-utahan lan reget,

terus ora ana sing resik menèh.

₉Wong terus ngomong:

“Sapa sing arep diwulangi bab kaweruhé

lan sapa sing bakal diwènèhi ngerti bab wahyu-wahyuné?

Kaya botyah tas disapih

sing ijik dibetot sangka mèlek!

₁₀Awit kudu iki kudu kuwi,

kudu mengkéné kudu mengkono,

tambah iki, tambah kuwi!”

₁₁Lah lantaran para wong sing omongé anèh

lan lantaran para wong sing nggunakké basa mantya

Panjenengané bakal ngekèki tembungé marang bangsa iki,

₁₂Panjenengané sing wis omongi mengkéné:

“Ya iki panggonan lèrèn,

kowé ngekèkana panggonan kanggo ngasuh

marang wong sing kesel banget;

kuwi panggonan kanggo ngasuh!”

Nanging pada ora gelem ngrungokké.

₁₃Mulané bakal pada ngrungokké tembungé GUSTI mengkéné:

“Kudu iki, kudu kuwi,

kudu mengkéné, kudu mengkono,

tambah iki, tambah kuwi!”

supaya sak njeruhné mlaku terus pada tiba mlumah,

terus tatu, ketyekel lan diukum.

₁₄Mulané rungokna tembungé GUSTI,

hé para wong sing pada seneng nyatyat,

hé para wong sing mréntah rayat

ing Yérusalèm iki!

₁₅Awit kowé wis pada ngomong:

“Kita wis pada nganakké perjanjian karo pati,

lan karo ndonyané pati

kita wis pada nganakké pasetujuan;

senajan petyut tyetar-tyetèr banter,

ora bakal ngenèngi kita;

awit si goroh wis pada dadi pangayoman kita,

lan kita pada ndelik ing ngapus,”

₁₆mulané mengkéné tembungé GUSTI:

“Aku mernahké ing Sion

sakwijiné watu, watu sing wis ketitik betyik kanggo dasaré,

watu pojokan sing larang, dasaré sing kuwat:

sapa sing pertyaya, ora bakal dek-dekkan!

₁₇Lan keadilan bakal Tak dadèkké tali ukuran,

lan kabeneran Tak dadèkké tali sipat;

udan watu bakal ngentèkké pengayoman goroh,

lan banyu gedé bakal ngéntérké pandelikan.”

₁₈Perjanjianmu karo pati bakal diilangi,

lan pasetujuanmu karo ndonyané wong mati ora bakal terus;

yèn petyut tyetar-tyetèr banter,

kowé bakal pada remuk diidak-idak.

₁₉Kaping pira waé enggonmu teka,

kowé bakal pada kesèrèt,

awit kuwi bakal teka saben ésuk,

ing wantyi awan lan ing wantyi mbengi;

lan ngerti marang tembungé sing kok rungokké kuwi

kowé mung nduwé rasa wedi tok.

₂₀Awit peturonmu bakal kurang dawa yèn kanggo turu slonjor

lan kemulé bakal kurang amba kanggo ngemuli awak.

₂₁Awit GUSTI bakal ngadek kaya ing gunung Perasim,

lan bakal mbendu kaya ing legokan sak tyedaké Gibéon,

lan bakal nindakké penggawéan-Né - anèh penggawéan-Né kuwi;

lan bakal nindakké penggawéan-Né - ngidap-idapi penggawéan-Né kuwi!

₂₂Mulané kowé aja pada nyatyat,

supaya taliné bandamu aja mundak kentyeng,

awit aku krungu bab karusakan sing wis ditentokké

sing tekané sangka Gusti Allah, GUSTI sing ngwasani langit lan bumi bakal nibani sak kabèhé negara kuwi.

₂₃Rungokna lan rungokna swaraku;

gatèkna lan rungokna tembungku!

₂₄Apa saben dina wong kuwi enggoné ngluku,

matyuli lan nggaru lemahé sing bakal disebari wiji?

₂₅Apa ora sakwisé lemahé dirata,

enggoné ngratakké jinten ireng lan nyebar jinten putih,

nguluri gandum lan gandum tyilik

lan wiji liyané ing pinggiré?

₂₆Bab adat kulinané wis dikèki piwulang,

lan pituduh karo Gusti Allahé.

₂₇Awit jinten ireng ora dirontoké nganggo piranti kanggo ngrontok,

lan glindingané grobak ora kanggo nggiles jinten putih,

nanging jinten ireng dirontoké karo tyara digepuki karo tyutik,

lan jinten putih karo gebuk.

₂₈Apa wong enggoné ngiles gandumé digebuki nganti ajur?

Mesti ora, ora terus waé digebuki nganti ajur!

Lan senajan wongé nglakokké grobak lan jarané

ing nduwuré gandum mau,

wongé ngerti enggoné ngiles ora bakal nganti ajur.

₂₉Lan iki tekané uga sangka GUSTI sing ngwasani langit lan bumi;

putusané kuwi nggumunaké

lan gedé kawityaksanané.