Yésaya 35

₁Ara-ara samun lan lemah garing bakal pada bungah,

ara-ara samun bakal surak-surak lan ngetokké kembang;

₂bakal metu kembangé okèh banget kaya kembang bakung,

bakal surak-surak, bakal surak-surak lan bungah-bungah.

Bakal dikèki kamulyané Libanon

kaluhurané Karmèl lan Saron;

bakal pada weruh kamulyané GUSTI,

kaluhurané Gusti Allah kita.

₃Tangan sing lemes lempé-lempé pada kuwatna

lan dengkul sing téklok pada kuwatna.

₄Ngomonga marang para wong sing wedi atiné:

“Sing pada tatak, aja pada wedi!

Gusti Allahmu bakal teka arep ngekèki balesan

lan ganjarané Gusti Allah.

Panjenengané piyambak sing teka

arep nylametaké kowé kabèh.”

₅Ing waktu kuwi mripaté para wong lamur bakal pada dimelèké,

lan kupingé para wong budek bakal pada dibukak.

₆Ing waktu kuwi wong lumpuh bakal mlumpat-mlumpat kaya menjangan,

lan tutuké wong bisu bakal surak-surak;

awit ara-ara samun bakal ngetokké sumber,

lan ara-ara samun bakal ana kaliné;

₇tanah wedi sing anget bakal dadi blumbang,

lan tanah sing ngerak bakal dadi sumber;

panggonan asu alasan

bakal ketukulan tebu lan pandan.

₈Ing kono bakal ana dalané,

sing bakal diarani Dalan Sutyi;

wong sing reget ora bakal liwat ing kono

lan para wong bodo ora bakal pada kluyuran mrana.

₉Ing kono bakal ora ana singané,

kéwan galak ora bakal saba mrana

lan ora bakal ketemu ing kono;

mung para wong sing wis pada dislametké

sing bakal pada mlaku ing kono,

₁₀lan para wong sing wis dibébaské

karo GUSTI sing bakal pada mulih

lan mlebu ing Sion karo surak-surak,

kebak karo kabungahan sing langgeng;

bakal pada kebak kesenengan pantyèn pada bungah,

kasusahan lan sambat bakal pada ngadoh.