Para Rèkter 4

₁Sakwisé Ehud, wong Israèl pada nglakoni sing ala menèh ing ngarepé GUSTI. ₂Terus pada dipasrahké GUSTI marang ing tangané Yabin, ratu ing Kanaan, sing enggoné dadi ratu ing Hasor, penggedéné suradadu jenengé Siséra, sing manggon ing Harosèt-Hagoyim. ₃Wong Israèl terus pada sambat marang GUSTI, awit dèkné nduwé keréta perang wesi nganti 900, lan rong puluh taun suwéné enggoné nindes wong Israèl karo abot. ₄Ing waktu semono sing ngadili wong Israèl Débora, wong wadon bojoné Lapidot. ₅Débora kuwi saben-saben njagong ing sak ngisoré wit kurma Débora, ing antarané Rama lan Bétel, ing pegunungan Efraim, lan wong Israèl terus pada nemoni marang ing ngarepé perlu njaluk pengadilan. ₆Débora kongkonan nyeluk Barak anaké Abinoam sangka Kèdès ing negarané Naftali, terus diomongi: “Apa kowé ora dipréntahké GUSTI, Gusti Allahé Israèl: Kowé lungaa ngluruk menyang ing gunung Tabor nggawa suradadu 10.000 tunggalé wong turunané Naftali lan wong turunané Sébulon. ₇Lan Aku bakal nggawé atiné Siséra, penggedéné suradadu Yabin, supaya metuki marang kowé karo kerétané perang lan suradaduné kabèh ing legokané kali Kison, terus bakal Tak pasrahké ing tanganmu.” ₈Tembungé Barak marang Débora: “Yèn sampéyan bareng mlaku karo kula, kula ya bakal mlaku, nanging yèn sampéyan ora bareng, kula ora bakal mlaku.” ₉Tembungé Débora: “Ya apik, aku bakal mbarengi mlakumu, mung waé duduk kowé sing bakal dihurmati ing mlakumu sak budalané iki, awit Siséra kuwi bakal dipasrahké GUSTI marang tangané wong wadon.” Débora terus budal bebarengan karo Barak menyang Kèdès. ₁₀Barak terus nglumpukké Sébulon lan Naftali ing Kèdès, terus ngluruk ditutké suradadu wong 10.000, lan Débora uga lunga bareng ngluruk.

₁₁Nanging Hèbèr, wong Kèni wis pisah karo wong turunané Kain, turunané Hobab, ipéné Moses, lan wis masang tarupé ngolah-ngalih nganti tekan ing wit kayu wit gedé ing Saanaim, sak tyedaké Kèdès.

₁₂Bareng Siséra dikabari yèn Barak anaké Abinoam wis ngluruk menyang ing pegunungan Tabor, ₁₃terus nglumpukké kabèh krétané wesi 900 lan sakkèhé suradaduné sing pada mèlu, dituntun sangka Harosèt-Hagoyim menyang kali Kison. ₁₄Ing kono préntahé Débora marang Barak: “Budala, awit ing dina iki GUSTI ngekèkké Siséra ing tanganmu. GUSTI déwé wis lunga ndisiki mlakumu!” Barak terus medun sangka gunung Tabor, ditutké suradadu-suradaduné 10.000 mau. ₁₅GUSTI terus mbingungké Siséra lan kabèh krétané lan suradaduné kabèh ing ngarepé Barak karo landepé pedang, nganti Siséra terus medun sangka krétané, mlayu karo sikil ing daratan. ₁₆Krétané perang lan suradadu-suradaduné terus diuyak karo Barak nganti tekan ing Harosèt-Hagoyim; suradadu-suradaduné Siséra kabèh pada nemu mati karo landepé pedang, ora ana sing utyul siji-sijia. ₁₇Nanging Siséra enggoné mlayu karo sikil ing daratan mau menyang ing tarupé Yaèl, bojoné Hèbèr, wong Kèni, awit Yabin, ratu ing Hasor kuwi rukun karo brayaté Hèbèr, wong Kèni mau. ₁₈Yaèl terus metu metuki Siséra lan ngomong: “Bendara, sampéyan kula njaluk mampir mlebu, aja wedi.” Siséra terus mampir mlebu, terus ditutupi kemul. ₁₉Dèkné terus ngomong: “Mbok kula sampéyan kèki ngombé banyu setitik, awit kula ngelak banget.” Yaèl terus mbukak kantong isi mèlek, Siséra dikèki ngombé, terus ditutupi menèh. ₂₀Siséra ngomong menèh marang Yaèl: “kula njaluk ngadeka ing lawangé tarup lan yèn ana wong teka takon: Ing kéné apa ana wong, sampéyan omongi: Ora ana.” ₂₁Nanging Yaèl, bojoné Hèbèr mau jikuk patoké tarup lan nyekel amer, terus alon-alon nyedaki Siséra, patoké mau dientyepaké ing pilingané nganti tembus pilingané ing lemah, awit Siséra ijik turu kepati, lan kesel nganti dadi lan patiné. ₂₂Ing waktu semono Barak sing ngoyak-oyak Siséra terus teka. Yaèl terus metu metuk Barak lan dikabari: “sampéyan kula duduhi wong sing sampéyan oyak.” Barak terus mlebu ing panggonané, lan Siséra ngglétak wis mati, patoké ijik mantyep ing pilingané. ₂₃Kaya mengkono enggoné Gusti Allah ing dina kuwi menangké Yabin, ratu ing Kanaan ing ngarepé wong Israèl. ₂₄Pangwasané tangané wong Israèl marang Yabin, ratu ing Kanaan mundak banget, nganti Yabin, ratu ing Kanaan dipatèni.