Yérémia 25

₁Tembungé sing dipréntahké marang Yérémia bab wong Yéhuda, jamané Yoyakim anaké Yosia, ratu ing Yéhuda wis nyandak patang tauné, ya kuwi waktu ing taun wiwitan jamané Nebukadnésar, ratuné Babèl. ₂Tembungé mau diomongké Yérémia marang sak kabèhé wong Yéhuda lan sak kabèhé wong kuta Yérusalèm, mengkéné: ₃“Wiwit nalika jamané Yosia anaké Amon, ratu ing Yéhuda wis nyandak telulas tauné tekan ing dina iki, dadi wis olèh telulikur taun enggonku nampa tembungé GUSTI kuwi lan ora mandek-mandek enggonku ngomongi marang kowé, nanging kowé ora gelem ngrungokké. ₄Mengkono menèh GUSTI tansah ngutus para abdiné, ya kuwi para nabi, nanging kowé pada ora manut lan ora nggatèkké. ₅Tembungé para nabi mau mengkéné: Pada mratobata sangka pratingkah lan pokal gawému, sing ala; kowé bakal pada tetep manggon ing negara sing dikèkké karo GUSTI marang kowé lan para leluhurmu ing sak lawas-lawasé. ₆Aja nyembah marang allah liyané, aja kok bektèni lan kok sujuti. Kowé aja nggawé nesuné ati-Ku karo penggawéané tanganmu, supaya Aku nekakké tyilaka marang kowé. ₇Nanging kowé pada ora manut marang tembung-Ku. Mengkono tembungé GUSTI, nganti nggawé nesuné ati-Ku karo penggawéané tanganmu, njalari kasangsaranmu déwé.

₈Mulané mengkéné tembungé GUSTI sing ngwasani langit lan bumi: Awit kowé ora ngrungokké tembung-Ku, ₉Aku bakal nyeluk sak kabèhé para umat sangka negara lor, mengkono tembungé GUSTI lan mréntah marang Nebukadnésar, ratu ing Babèl, abdi-Ku kuwi; Aku bakal nekakké para wong kuwi ngluruk negara kéné, wong-wongé sing pada manggon lan bangsa-bangsa ing sak ubengé, sing pada bakal Tak entèkké, Tak dadèkké sing nggegirisi, dadi tujuané tyatyatan lan dadi ludesan selawasé. ₁₀Aku bakal nyingkirké swarané kesenengan lan kabungahan, swarané pengantèn lanang lan wadon, swarané gilingan lan pepadangé dimar. ₁₁Sak kabèhé negara iki bakal dadi ambruk lan bera lan bangsa iki bakal dadi batur marang ratu ing Babèl pitung puluh taun suwéné. ₁₂Terus sakwisé genep pitung puluh taun, Aku bakal mbales ratu ing Babèl lan bangsa kuwi, uga negarané para wong Kasdim, karo Tak dadèkké panggonané sing bongkor tekan selawasé, awit sangka kesalahané. Mengkono tembungé GUSTI. ₁₃Aku bakal nibakké marang negara iki, kabèh sing wis Tak omongké kanggo negara iki, ya kuwi: kabèh sing ketulis ing kitab iki, kaya sing wis dinubuatké karo Yérémia kanggo bangsa iki kabèh. ₁₄Awit wong kuwi uga bakal pada dadi abdiné bangsa okèh lan para ratu sing gedé lan Aku bakal mulangi para wong kuwi sing tyotyok karo pertingkahé lan penggawéné.”

₁₅Tembungé GUSTI, Gusti Allahé Israèl marang aku mengkéné: “Tampanana tuwung sing isi anggur panasé bebendu-Ku iki sangka tangan-Ku, terus ombèkna marang sak kabèhé para bangsa sing dadi tujuané enggon-Ku ngutus kowé, ₁₆supaya kuwi pada ngombéa, nganti senpoyongan lan bingung awit sangka pedang, sing bakal Tak tekakké ing sak tengahé. ₁₇Aku terus nampani tuwung kuwi sangka tangané GUSTI lan ngombèkké marang para bangsa sing dadi tujuané enggonku diutus karo GUSTI, ₁₈ya kuwi marang kuta Yérusalèm lan kuta-kutané Yéhuda, uga para ratu lan penggedéné, supaya iki kabèh dadia ambruk, pada garing lan dadi tujuané tyatyatan lan bebendu, kaya sing kelakon ing dina iki; ₁₉marang Parao, ratu ing negara Egipte uga para pegawéné, para penggedéné lan sak kabèhé bangsané. ₂₀Mengkono uga marang bangsa tyampurané bangsa werna-werna, para ratu ing negara Us; para ratu ing negara Filistèn, ya kuwi ing Askélon, Gaza, Ekron lan para wong turahé ing Asdod; ₂₁ing Edom, Moab lan turunané Amon; ₂₂marang sak kabèhé ratu ing Tirus lan Sidon lan para ratu ing negara pinggirané segara ing sabrangé segara, ₂₃marang Dédan, Tema, Bus lan sak kabèhé wong sing rambuté dityukur pinggiré mubeng, ₂₄marang sak kabèhé ratu ing negara Arab, sing manggon ing ara-ara samun; ₂₅marang sak kabèhé para ratu ing Simri, ing Elam lan ing Madai; ₂₆marang sak kabèhé ratu sangka negara lor, sing tyedak lan sing adoh, siji-siji, uga marang sak kabèhé kraton ndonya ing sak lumahé bumi, uga ratu ing Sesak bakal ngombé sakwisé wong-wong mau.

₂₇Para wong mau terus pada omongana mengkéné: Tembungé GUSTI sing ngwasani langit lan bumi, Gusti Allahé Israèl mengkéné: Kowé pada ngombéa nganti mendem lan muntah-muntah. Pada ambruka, aja nganti tangi menèh! Awit sangka pedang sing bakal Tak tekakké ing tengahmu! ₂₈Nanging yèn pada ora gelem nampani tuwung kuwi sangka tanganmu supaya diombé, terus kowé omongana mengkéné: Pituturé GUSTI sing ngwasani langit lan bumi mengkéné: Kowé kudu ngombé! ₂₉Awit kuta sing nyebut asma-Ku kuwi, bakal wiwit Tak tibani bebendu; apa kowé bisa utyul sangka paukuman? Kowé pada ora bakal bisa utyul sangka paukuman, awit Aku wis ngatyungké pedang marang kabèh wong sak lumahé bumi. Mengkono tembungé GUSTI sing ngwasani langit lan bumi. ₃₀Kabèh tembungé kuwi gelarna marang para wong kuwi lan diomongi mengkéné: