Yérémia 26

₁Waktu wiwit jamané Yoyakim anaké Yosia, ratu ing Yéhuda, ana tembungé GUSTI, mengkéné: ₂Mengkéné tembungé GUSTI: “Kowé ngadeka ing lataré griyané GUSTI, ing kono para wong sak kabèhé kuta Yéhuda, sing arep munggah sembayang ing griyané GUSTI, pada omongana kabèh tembung-Ku marang kowé, kanggo wong kuwi. Aja kok kurangi sak tembung waé! ₃Menawa pada gelem ngrungokké lan saben wong pada gelem ninggal penggawéné sing ala. Terus Aku getun ing bab kasangsarané, sing Tak rantyam kanggo wong-wong mau awit sangka kabèh penggawéné sing ala. ₄Dadiné pada omongana mengkéné: Tembungé GUSTI mengkéné: Yèn kowé pada ora ngrungokké marang Aku lan ora miturut marang angger-angger-Ku, sing wis Tak omongké ing ngarepmu ₅lan ora gelem ngrungokké tembungé para abdi-Ku, para nabi, sing tansah Tak utus marani kowé, nanging kowé nulak ngrungokké, ₆nganti Aku bakal ndadèkké omah iki kaya Silo, lan kuta iki dadi bebendu kanggo kabèh bangsa ing sak lumahé bumi.”

₇Para imam, para nabi lan sak kabèhé rayat pada krungu enggoné Yérémia nggelarké tembungé kuwi ing griyané GUSTI. ₈Sakwisé Yérémia rampung enggoné nggelarké kabèh sing dipréntahké karo GUSTI supaya dipréntahké marang rayat kabèh kuwi, para imam, para nabi lan rayat kabèh terus pada nyekel Yérémia, karo tembungé: “Kowé kudu mati! ₉Kenèng apa kowé ngomongké kanggo asmané GUSTI, karo omongmu: Griya iki bakal pada kaya Silo lan kuta iki bakal dadi ambruk, nganti ora ana sing manggon ing kono menèh?” Rayat kabèh terus pada nglumpuk ngrubung Yérémia ing griyané GUSTI. ₁₀Bareng para penggedéné Yéhuda pada krungu perkara kuwi, terus pada budal sangka kraton menyang ing griyané GUSTI lan njagong ing gapura anyar nang griyané GUSTI. ₁₁Para imam lan para nabi terus pada ngomong marang para penggedéné lan rayat kabèh, tembungé: “Wong kuwi kudu ditibani paukuman pati, awit nubuat bab kuta kéné kaya sing pada sampéyan rungokké déwé.”

₁₂Nanging Yérémia terus ngomong marang para penggedéné lan rayat kabèh: “GUSTI sing ngutus kula dikongkon nubuat bab griya iki lan kuta kuwi, supaya nekaké kabèh tembungé sing pada sampéyan rungokké kuwi. ₁₃Mulané pada kula njaluk ngowahi tindak-tandukmu lan penggawé sampéyan lan pada ngrungokna tembungé GUSTI, Gusti Allah sampéyan, nganti GUSTI terus gela ing bab tyilaka sing dirantyam kanggo sampéyan. ₁₄Nanging kula, kula kuwi ing tangan sampéyan, ya kono, kula arep diapakké, kaya apa sing sampéyan anggep apik lan bener. ₁₅Mung waé supaya sampéyan ngertèni tenan, yèn sampéyan matèni kula kuwi, ngupaya sampéyan ngutahké getihé wong sing resik, kuwi nibani marang sampéyan lan marang kuta iki uga sing manggon ing kuta iki, awit GUSTI wis ngutus kula kanggo sampéyan nekaké kabèh tembungé kuwi.”

₁₆Para penggedéné lan rayat kabèh terus ngomong marang para imam lan para nabi: “Wong kuwi ora sak mestiné ditibani paukuman pati, awit dèwèké ngomongké marang kita atas asmané GUSTI, Gusti Allah kita.” ₁₇Para pinituwané negara pantyèn ana sing pada maju lan ngomongi marang rayat sing nglumpuk kuwi, tembungé: ₁₈“Waktu jamané Hiskia, ratu ing Yéhuda ana wong, jenengé Mika, wong Moreset, sing wis ngomongké lan tyerita marang bangsa Yéhuda kabèh, tembungé: Tembungé GUSTI sing ngwasani langit lan bumi mengkéné:

₂₀Ing waktu semono uga ana sakwijiné wong menèh sing ngomongké atas asmané GUSTI, ya kuwi Uria anaké Semaya, sangka Kiryat-Yearim. Panjenengané ngomongké bab kuta lan negara iki, pada kaya sing diomong Yérémia. ₂₁Waktu Yoyakim, para pahlawan lan para penggedéné krungu tembungé nabi kuwi, ratu terus ngupaya matèni Panjenengané. Bareng Uria krungu perkara kuwi, atiné giris, terus ngungsi menyang ing negara Egipte. ₂₂Ngertènana Yoyakim kongkonan Elnatan anaké Akbor dibarengi wong liyané menyang negara Egipte. ₂₃Uria digawa sangka negara Egipte lan dipasrahké marang Yoyakim. Terus ngongkon matèni Uria karo pedang lan layoné dibuwang ing kuburané rayat lumrah. ₂₄Nanging Yérémia dislametké karo Ahikam anaké Safan, nganti ora dipasrahké ing tangané rayat lan ora dipatèni.