Yérémia 34

₁Tembungé GUSTI marang Yérémia, waktu Nebukadnésar, ratu ing Babèl lan kabèh suradaduné, kabèh kraton ing bumi, sing dikwasani lan kabèh bangsa maju perang nglawan Yérusalèm lan kabèh kuta-kuta pangwasané: ₂“Mengkéné tembungé GUSTI, Gusti Allahé Israèl: Kowé lungaa, omongana Sedèkia, ratu ing Yéhuda, tembung iki: Mengkéné tembungé GUSTI: Sak temené, Aku bakal ngekèkké kuta iki nang tangané ratuné Babèl, supaya diobong. ₃Lan kowé déwé ora bakal bisa utyul sangka tangané, kowé mesti bakal ketyekel lan dipasrahké ing tangané; kowé bakal mandeng adu-arep karo ratuné Babèl lan omongan karo dèwèké lan kowé bakal diukum ing Babèl. ₄Nanging senajan mengkono, rungokna tembungé GUSTI, duh Sedèkia, ratuné Yéhuda, awit mengkéné tembungé sampéyan: Kowé ora bakal mati karo pedang! ₅Kowé bakal mati karo tentrem. Kowé ijik bakal dihurmati karo obong-obongan kaya para leluhurmu, para ratu ing jaman mbiyèn, sak durungé kowé; mengkono uga kowé ijik ditangisi karo tembung pesambat: Duh, bendara! Tenan Aku sing ngomongké tembung iki. Mengkéné tembungé GUSTI.”

₆Yérémia terus ngomongké tembungé kuwi marang Sedèkia, ratuné Yéhuda, ing Yérusalèm, ₇waktu suradaduné ratu ing Babèl nyerang perang nglawan Yérusalèm lan turahé kuta-kutané Yéhuda, ya kuwi Lakis lan Aseka, awit tunggalé kuta-kutané Yéhuda mung kèri kuwi sing ijik ana témboké.

₈Tembungé GUSTI marang Yérémia, sakwisé Sedèkia nggawé perjanjian karo rayat ing Yérusalèm kabèh supaya préntah kamardikan, ₉supaya saben wong ngluwari baturé bangsa Ibrani, ya lanang ya wadon, supaya dadi wong merdéka, nganti ora ana wong siji-sijia sing nduwé batur wong Yéhuda, seduluré. ₁₀Kabèh penggedéné lan rayat kabèh sing pada mèlu ing perjanjian kuwi pada ngrujuki yèn saben wong bakal ngluwari baturé lanang lan wadon, supaya pada dadi wong merdéka, nganti ora ana wong siji-sijia sing nduwé batur sangka tunggalané wong kuwi. Wong-wong pada ngrujuki lan pada merdékakké para baturé. ₁₁Nanging sakwisé kuwi pada malih gagasané, terus njupuk batur sing wis pada dimerdikakké, pada dipeksa kerja menèh, lanang lan wadon.

₁₂Terus ana tembungé GUSTI marang Yérémia, mengkéné: ₁₃“Mengkéné tembungé GUSTI, Gusti Allahé Israèl: Aku déwé wis nggawé perjanjian karo para leluhurmu, ing waktu pada Tak etoké sangka negara Egipte, sangka negara penggawéan peksa, isiné: ₁₄Ing sakwisé pitung taun kowé déwé-déwé kudu merdékakké seduluré bangsa Ibrani sing wis pada ngedol awaké marang kowé; dèwèké bakal pada kerja nem taun suwéné, terus kudu kok luwari, terus dadi wong merdéka. Nanging para leluhurmu ora pada nggatèkké lan ngrungokké marang tembung-Ku. ₁₅Ing dina iki kowé wis pada mratobat lan nglakoni apa sing bener ing ngarep-Ku, awit saben wong wis pada nyetujoni kamardikan marang seduluré lan kowé wis janji ing ngarep-Ku ing omah, ing sak nduwuré disebut asma-Ku. ₁₆Nanging kowé terus pada malih gagasanmu lan ngregeti asma-Ku: kowé kabèh pada njukuk bali baturé lanang lan wadon, sing wis kok merdékakké miturut kepénginané lan meksa para wong kuwi dadi baturmu menèh. ₁₇Mulané tembungé GUSTI mengkéné: Kowé ora pada nggatèkké tembung-Ku, supaya saben wong nyetujoni ngluwari marang sak panunggalané lan seduluré, mulané, Aku nyetujoni pembébasan kanggo kowé, mengkono tembungé GUSTI, kanggo dipsrahké marang pedang, lara pès lan pailan. Kowé bakal Tak dadèkké sing njalari girisé kabèh kraton ing bumi. ₁₈Lan Aku bakal ngekèkké para wong sing nerak perjanjianku lan ora netepi isiné perjanjian, sing digawé ing ngarep-Ku karo nyigari pedèt dadi loro, terus mlaku ing antarané sigarané, ₁₉para penggedéné Yéhuda, para penggedéné Yérusalèm, penggedé kraton, para imam lan rayat kabèh sing wis mlaku ing antarané sigarané pedèt kuwi, ₂₀wong kuwi bakal pada Tak pasrahké marang tangané mungsuhé lan para wong sing ngarah nyawané, banjur layoné terus bakal dadi pakané manuk ing awang-awang lan kéwan ing bumi. ₂₁Uga Sedèkia, ratuné Yéhuda uga para penggedéné bakal Tak pasrahké marang tangané mungsuh lan marang wong sing ngarah nyawané lan marang tangané suradaduné ratu ing Babèl, ing waktu iki pada budal ninggal kowé. ₂₂Tembungé GUSTI mengkéné: Sak temené, Aku wis ngekèki préntah lan mbalèkké para suradadu kuwi menyang kuta kéné, terus nyerang perang, ngrebut lan ngobong kuta iki. Kuta-kutané Yéhuda bakal Tak gawé ludes, nganti ora ana wong sing ngenggoni.”