Sedèkia ratu ing Yéhuda
Rusaké kraton Yéhuda
1Sedèkia umuré selikur taun waktu dadi ratu, nanging enggoné dadi ratu ing Yérusalèm suwéné sewelas taun. Ibuné asmané Hamutal, anaké wadon Yérémia sangka Libna. 2Piyambaké nindakké apa sing ala ing ngarepé GUSTI persis karo apa sing ditindakké Yoyakim. 3Awit sangka bebenduné GUSTI kelakoné perkara iki kanggo Yérusalèm lan Yéhuda, ya kuwi, enggoné terus pada kebuwang karo GUSTI sangka ngarepé Gusti.
Sedèkia mbruntak nglawan ratu ing Babèl. 4Mulané waktu ing taun sing kaping sanga jamané, ing sasi sing kaping sepuluh tanggal kaping sepuluh Nebukadnésar ratu ing Babèl karo suradaduné nyerang Yérusalèm. Terus pada masang tarup ngepung Yérusalèm lan ngedekké témbok kanggo ngepung ing sak ubengé. 5Kaya mengkono enggoné kuta kuwi dikepung nganti tekan ing taun sing kaping sewelas jamané Sedèkia. 6Ing tanggal sanga sasi papat, waktu pailan ing kuta kono wis nemen lan wis ora ana sing dipangan karo rayat, 7témboké kuta terus dibedah. Bareng ratu ngerti perkara kuwi terus mblayu lan sak balané ninggalké kuta kono ing wayah mbengi, lunga metu ing gapura ing sela-selané témbok loro, tyedak ing taman ratu, senajan suradadu Kasdim ngepung Yérusalèm mubeng. Enggoné pada mlayu nuju legokan Araba-Yordan. 8Nanging suradadu Kasdim nguber ratu lan Sedèkia ketyekel ing legokan Yériko; para suradaduné wis pada pating slebar ninggal piyambaké. 9Ratu dibanda lan dituntun digawa menyang ratu Babèl ing Ribla ing negara Hamat; Ratu terus netepké paukumané. 10Ratu ing Babèl ngongkon mbelèh anak-anaké Sedèkia ing ngarepé, mengkono uga kabèh para penggedéné Yéhuda ya pada dibelèhi ing Ribla. 11Sedèkia terus dityungkil mripaté lan digawa karo ranté tembaga, digawa menyang Babèl, ketutupan ing paukuman, nganti tekan ing matiné.
12Waktu sasi kaping lima tanggal kaping sepuluh - kuwi taun sing kaping sangalas jamané Nebukadnésar, ratu Babèl - Nébusaradan, penggedéné suradadu pengawal, sing ngladèni ratu ing Babèl, teka ing Yérusalèm. 13Griyané GUSTI, kratoné ratu lan sak kabèhé omah ing Yérusalèm, sak kabèhé omahé para penggedéné pada diobongi. 14Témbok sak ubengé kuta Yérusalèm diembrukké karo suradadu Kasdim sing pada mèlu penggedéné suradadu pengawal mau. 15Sak golongané wong sing ringkih déwé lan turahé wong sing ijik manggon ing kono lan para wong sing malik mripat mbalik mèlu ratu ing Babèl, uga turahé para tukang pada diboyong menyang pembuwangan karo Nébusaradan, penggedéné suradadu pengawal kuwi. 16Mung tunggalé para wong mlarat ing negara kono, ana siji-loro sing ditinggal karo Nébusaradan, penggedéné suradadu pengawal mau, supaya dadi tukang kebon anggur lan tukang tani.
17Tyagak-tyagaké tembaga ing griyané GUSTI kréta penyangga lan segara-segaraan tembaga ing griyané GUSTI pada dirusak karo suradadu Kasdim lan kabèh tembaga diusungi menyang negara Babèl. 18Kwali-kwali, sodok-sodokan, lading-lading, bokor-bokor kanggo nyirami lan piring-piring uga kabèh piranti tembaga sing kanggo nindakké pangabekti, dijupuki kabèh. 19Uga jambangan-jambangan, dupa-dupa, bokor-bokor kanggo nyirami, kwali-kwali, dimar-dimar, piring-piring lan tuwung-tuwung, emas lan slaka, dijukuk karo penggedéné suradadu pengawal mau. 20Nanging tyagak loro, segara-segaraan siji lan sapi tembaga rolas ing sak ngisoré kréta penyangga, sing digawé karo Salomo, kanggo griyané GUSTI, kuwi nganti ora kena timbang boboté tembaga kabèh piranti kuwi. 21Nanging tyagak-tyagak kuwi, sangka siji duwuré wolulas éluh lan diblebeti bolah sing dawané rolas éluh, kandelé patang driji lan ing njeruhné growong. 22Ing sak nduwuré ana kribelé tembaga, sing siji kuwi duwuré limang éluh, lan diubengi enam-enaman lan woh-wohan mulwa, kabèh tembaga. Lan sing kaping loro uga kaya mengkono. 23Kanggo wohé mulwa ana sangang puluh nem woh mulwa sing rupa gambar mrentol metu, tyatyahé woh-wohan mulwa kuwi kabèh ana 100 ngubengi enam-enaman kuwi.
24Penggedéné suradadu pengawal kuwi terus nyekel imam Seruya, pengarepé pinituwané para imam lan imam Sépanya wakilé lan penjaga gapura telu. 25Sangka kuta kono sing dityekel sakwijiné penggedé kraton sing diangkat dadi penggedéné para suradadu lan abdiné ratu pitu ing kuta kono lan juru tulisé pahlawan sing nglumpukké rayat dadi suradadu, uga wong suwidak sangka antarané rayat ing sak njeruhné kuta kono. 26Nébusaradan penggedéné suradadu pengawal mau ngongkon nyekel para wong kuwi terus diadepaké marang ratu Babèl, ing Ribla. 27Ratu Babèl terus ngongkon matèni para wong kuwi ing Ribla ing negara Hamat. Mengkono enggoné wong Yéhuda pada diboyong menyang pembuwangan sangka negarané.
28Iki tyatyahé rayat sing diboyong menyang pembuwangan karo Nébusaradan: waktu ing taun kaping pitu, 3.023 jiwa sangka Yéhuda; 29waktu taun sing kaping wolulas jamané Nebukadnésar, 832 jiwa sangka Yérusalèm; 30waktu ing taun sing kaping telu likur jamané Nebukadnésar, sing diboyong menyang pembuwangan karo Nébusaradan, penggedéné suradadu pengawal mau 745 jiwa sangka Yéhuda; gunggungé kabèh ana 4.600 jiwa.
Yoyakin ditrésnani
31Terus waktu ing taun sing kaping telung puluh pitu sakwisé Yoyakin, ratu ing Yéhuda, kebuwang, waktu sasi rolas tanggal selawé ing sasi kuwi, Ewil-Merodak, ratu Babèl, ing taun jamané, ngétokké kawelasan marang Yoyakin, ratu ing Yéhuda, terus ngluwari piyambaké sangka paukuman. 32Ewil-Merodak tumindaké grapyak marang Yoyakim lan ngekèki pangkat sing luwih duwur tenimbang karo ratu-ratu liyané sing bebarengan karo piyambaké ing Babèl. 33Yoyakin dililani ngganti sandangané paukuman lan ing selawasé uripé dililani ajek mangan roti ing ngarepé ratu ing Babèl. 34Lan kanggo uripé ing saben dinané dikèki karo ratu Babèl, ing sakjeké uripé nganti tekan ing matiné.
