Yohanes 6

₁Sakwisé mengkono Yésus lunga menyang sabrangé tlaga Galiléa, ya kuwi tlaga Tibérias. ₂Wong okèh pada gembruduk pada mèlu Panjenengané, awit pada weruh mujijat sing wis ditindakké kanggo wong-wong sing pada lara. ₃Yésus terus munggah ing gunung, terus njagong ing kono karo para muridé. ₄Nalika semono wis ngarepké Paskah, riyayané wong Ju. ₅Bareng Yésus weruh sak kiwa-tengené lan weruh wong okèh pada gembruduk nemoni, terus ngomong marang Filipus: “Ing ngendi enggon kita pada arep tuku roti, supaya wong-wong kuwi bisa pada mangan?” ₆Enggoné ngomong mengkono kuwi mung digawé njajal, awit wis weruh Piyambak apa sing bakal ditindakké. ₇Semauré Filipus: “Roti karo 200 dinar ora bakal nyukupi kanggo wong semono okèhé kuwi, senajan mung pada didumi sak tyuwil.” ₈Tunggalé muridé ya kuwi Andréas, seduluré Simon Pétrus, terus ngomong: ₉“Kuwi ana botyah tyilik sing nggawa roti lima iji karo iwak loro, nanging kuwi apa gunané kanggo wong semono okèhé?” ₁₀Yésus ngomong: “Wong-wong kuwi kongkonen pada lungguh!” Lan ing kono okèh suketé, wong-wong mau terus pada lungguh, sing lanang tyatyahé 5000 wong. ₁₁Yésus terus njupuk roti mau, lan sakwisé ndonga maturkesuwun, terus diedum-edum marang sing pada lungguh ing kono, mengkono uga iwaké, olèhé arep pada mangan sak karepé. ₁₂Sakwisé pada warek, Yésus terus ngongkon marang para muridé: “Tyuwilan turahané pada klumpukna, supaya aja ana sing kebuwang!” ₁₃Terus ya diklumpukké, olèh rolas ténggok kebak isi tyuwilan roti lima mau, ya kuwi turahé sing wis pada dipangan karo wong-wong mau. ₁₄Bareng wong-wong mau pada weruh mujijat sing ditindakké karo Yésus kuwi, terus pada ngomong: “Panjenengané kuwi nyata Nabi sing bakal teka ing jagat.”

₁₅Awit Yésus weruh yèn kabèh wong-wong kuwi pada teka arep meksa Panjenengané didekké ratu, terus sumingkir munggah ing gunung menèh Piyambakan.

₁₆Nalika ngarepké surup, para muridé pada medun menyang tlaga, terus pada numpak prau, ₁₇arep nyabrang menyang Kapernaum. Bareng wis wengi, Yésus durung teka, ₁₈nanging ombaké tlaga gedé, awit katekan karo angin banter. ₁₉Bareng olèhé pada ndayung mau wis pada olèh lima utawa enem kilometer, pada weruh Yésus mlaku ing banyu nyedekki prauné, terus pada wedi. ₂₀Nanging Panjenengané terus ngomong: “Iki Aku, aja pada wedi!” ₂₁Para muridé terus ngomongi Panjenengané munggah ing prau lan sak nalika kuwi uga prauné tekan daratan sing dituju.

₂₂Esuké wong okèh sing ijik pada ing sabrangé tlaga, pada weruh yèn ing kono ora ana prau menèh kejaba mung siji mau, nanging Yésus ora numpak bareng karo muridé, mung para muridé déwé sing budal. ₂₃Nanging terus ana prau liyané teka sangka Tibérias ing sak tyedaké panggonan pada mangan roti, sakwisé Gusti ndonga maturkesuwun. ₂₄Bareng pada weruh yèn Yésus ora ing kono uga para muridé, terus pada numpak prau, nyusul menyang Kapernaum, nggolèki Yésus. ₂₅Bareng wong-wong mau ketemu Panjenengané ing sabrangé tlaga, terus pada ngomong: “Rabbi, wantyi kapan anggèn Panjenengan teka kéné?” ₂₆Yésus nyauri tembungé: “Sak temen-temené Aku ngomong marang kowé, kowé pada nggolèki Aku kuwi ora awit kowé pada weruh tanda, nanging awit wis pada mangan roti nganti warek. ₂₇Pada nyambutgawéa aja kanggo pangan sing bisa rusak, nanging supaya pada olèh pangan sing bisa tahan tekan ing urip langgeng, sing bakal dikèkké marang kowé karo Putrané Manungsa; awit ya Panjenengané kuwi sing wis ditengeri nganggo ségel karo Gusti Allah, Bapak.” ₂₈Wong-wong mau terus pada ngomong: “Kita kudu pada nandangi apa supaya nindakké penggawéan sing dikarepké karo Gusti Allah?” ₂₉Yésus nyauri marang wong-wong mau: “Iki penggawéan sing dikarepké Gusti Allah, ya kuwi supaya kowé pada pertyaya marang sing diutus karo Gusti Allah.”

₃₀Semauré wong-wong mau: “Tanda apa sing Panjenengan tindakké, supaya kita bisa pada weruh lan terus pertyaya marang Panjenengan? Panjenengan nandangi penggawé apa? ₃₁Para leluhur kita pada mangan manna ing ara-ara samun, kaya sing wis ketulis: Pada dikèki roti sangka swarga.”

₃₂Tembungé Yésus: “Sak temen-temené Aku ngomong marang kowé: Duduk Moses sing ngekèki roti marang kowé sangka swarga kuwi, nanging Bapak-Ku sing ngekèki roti sejati sing sangka swarga marang kowé kabèh. ₃₃Awit roti sing sangka Gusti Allah ya kuwi roti sing mudun sangka swarga lan sing nguripi jagat.” ₃₄Semauré wong-wong mau: “Gusti, kita supaya Panjenengan kèki roti kuwi ing sak lawasé!” ₃₅Tembungé Yésus: “Aku iki rotiné urip; sapa sing teka marang Aku, kuwi ora bakal ngelih menèh, lan sapa sing pertyaya marang Aku, kuwi ora bakal ngelak menèh. ₃₆Nanging Aku wis ngomongi kowé: Senajan kowé wis pada weruh Aku, nanging pada ora pertyaya. ₃₇Kabèh sing dikèkké Bapak marang Aku, kuwi bakal pada teka marang Aku. Lan sapa sing teka marang Aku ora bakal Tak tampik. ₃₈Awit enggon-Ku mudun sangka swarga kuwi ora supaya nglakoni karep-Ku déwé, nanging karepé sing ngutus Aku. ₃₉Nanging karepé Bapak sing ngutus Aku kuwi ngéné: Kabèh sing wis dikèkké marang Aku kuwi aja nganti ana sing ilang, nanging supaya Tak tangèkké mbésuk ing pungkasané jaman. ₄₀Awit karepé Bapak-Ku kuwi, ya kuwi supaya saben wong sing weruh Putra lan pertyaya marang Panjenengané, kuwi nduwèni urip langgeng, lan supaya Aku nangèkké mbésuk ing pungkasané jaman.”

₄₁Wong-wong Ju terus pada nggrundeli Panjenengané, awit ana tembungé, ngéné: “Aku iki roti sing mudun sangka swarga.” ₄₂Pada grenengan, ngéné: “Apa kuwi duduk Yésus, anaké Yosèf? Kita apa ora pada kenal karo bapak lan ibuné? Kepriyé nanging nduwé tembung: Aku mudun sangka swarga?” ₄₃Yésus terus nyauri, tembungé: “Aja pada grundelan.

₄₄Ora ana wong sing bisa teka marang Aku, yèn ora digèrèt karo Bapak sing ngutus Aku, lan Aku bakal nangèkké wong kuwi mbésuk ing pungkasané jaman. ₄₅Ing kitabé para nabi ana tulisan, ngéné: ‘Wong kabèh bakal diwulangi karo Gusti Allah.’ Saben wong sing wis ngrungokké lan nampani piwulang sangka Bapak, kuwi teka marang Aku. ₄₆Sing mengkono kuwi ora tegesé ana wong sing wis weruh marang Bapak. Mung sing tekané sangka Gusti Allah, kuwi sing wis weruh Bapak. ₄₇Sak temen-temené Aku ngomong marang kowé: Sapa sing pertyaya, kuwi pada nduwèni urip langgeng.

₄₈Aku iki rotiné urip. ₄₉Leluhurmu pada mangan manna ing ara-ara samun lan wis pada mati. ₅₀Aku iki roti sing mudun sangka swarga: Sapa sing mangan roti iki, kuwi ora bakal mati. ₅₁Aku iki rotiné urip, sing wis mudun sangka swarga. Yèn wong mangan roti iki, bakal urip ing sak lawas-lawasé. Lan roti sing tak kèkké, ya kuwi daging-Ku, sing bakal tak kèkké kanggo uripé jagat.”

₅₂Wong-wong Ju terus pada padudon, tembungé: “Wong kuwi kepriyé bisané kanggo ngekèkké dagingé supaya pada tak pangan?” ₅₃Yésus terus ngomong marang wong-wong mau: “Sak temen-temené Aku ngomong marang kowé. Yèn kowé ora mangan dagingé Putrané Manungsa lan ora ngombé getihé, kowé pada ora nduwèni urip. ₅₄Sapa wong sing mangan daging-Ku lan ngombé getih-Ku, kuwi pada nduwèni urip langgeng, lan Aku sing bakal nangèkké mbésuk ing dina pungkasané jaman. ₅₅Awit daging-Ku kuwi pangan sing sejati, lan getih-Ku kuwi ombèn sing sejati. ₅₆Wong sing mangan daging-Ku lan ngombé getih-Ku, kuwi dadi tetep ing Aku, lan Aku ing wong kuwi. ₅₇Pada kaya Bapak sing urip ngutus Aku lan Aku urip karo Bapak, mengkono uga sapa sing mangan Aku kuwi ya bakal urip awit Aku. ₅₈Iki roti sing wis mudun sangka swarga. Duduk roti kaya sing dipangan karo para leluhurmu, lan terus wis pada mati. Sapa waé sing mangan roti iki bakal urip ing sak lawas-lawasé.”

₅₉Kuwi mau kabèh diomongné Yésus ing Kapernaum nalika Panjenengané mulangi ing sinaguk.

₆₀Bareng krungu sing mengkono mau okèh sing pada ngomong ngéné: “Tetembungan iki abot tenan, sing betah ngrungokké sapa?” ₆₁Yésus weruh sak njeruhné ati yèn muridé pada grenengan ing bab kuwi mau, terus diomongi: “Apa tembung iki ndadèkké kowé ketyentok? ₆₂Terus kepriyé yèn kowé pada weruh Putrané Manungsa menyang sangkané sing ndisik? ₆₃Roh kuwi sing nguripké, daging ora ana paédahé. Tembung-tembung sing Tak wulangké marang kowé kuwi roh lan urip. ₆₄Nanging ing tunggalmu ana sing ora pertyaya.” Yésus pantyèn weruh wiwit wiwitané, sapa wongé sing pada ora pertyaya, lan sapa sing bakal ngiyanati Panjenengané. ₆₅Panjenengané terus ngomong: “Mulané kowé wis pada Tak omongi ngéné: Ora ana wong sing bisa teka marang Aku, kejaba yèn Bapak ngekèki kawelasan marang wong kuwi.” ₆₆Wiwit nalika kuwi para muridé okèh sing pada mundur, ora pada mèlu Panjenengané menèh.

₆₇Yésus ngomong marang muridé rolas: “Apa kowé ora pada arep lunga uga?” ₆₈Semauré Simon Pétrus: “Gusti, kita parani sapa? Tembungé Panjenengan kuwi tembungé urip langgeng. ₆₉Lan kita wis pertyaya lan ngerti, yèn Panjenengan kuwi Sing Sutyi sangka Gusti Allah.” ₇₀Yésus nyauri: “Apa ora Aku déwé sing milih kowé wong rolas iki, nanging salah sijiné tunggalmu kuwi iblis.” ₇₁Lan sing dikarepké kuwi Yudas, anaké Simon Iskariot, awit ya wong kuwi sing bakal ngiyanati Yésus, senajan ya tunggalé muridé rolas.