Ayub 10

₁“Nyawaku wis jelèh urip, aku arep ngumbar sambatku,

aku arep ngomong sak njeruhné kasusahané nyawaku sing pait.

₂Aku arep ngomong marang Gusti Allah:

Panjenengan supaya aja nganti nyalahké kula;

kula supaya Panjenengan nduduhké,

apa sebabé Panjenengan nglawan marang kula.

₃Untungé apa ta kanggo Panjenengan, yèn nindes wong kuwi,

yèn Panjenengan ngguwak penggawéané tangan Panjenengan lan Panjenengan ngekèki bantuan marang rantyamané wong duraka?

₄Apa Panjenengan nduwé mripat daging?

Enggèn Panjenengan ndelok samubarang apa ya kaya tyarané manungsa enggoné ndelok?

₅Umuré Panjenengan apa mèmper kaya umuré manungsa,

itungan taun Panjenengan apa ya kaya umuré wong lanang,

₆nanging Panjenengan kok gelem nggolèki kesalahan kula,

lan métani dosa kula,

₇sakjané Panjenengan ngerti, yèn kula duduk wong duraka,

lan yèn ora ana wong sing bisa utyul sangka tangan Panjenengan?

₈Tangan Panjenengan sing nganakké lan nggawé kula,

nanging Panjenengan kok terus ora gelem weruh kula lan bakal ngentèkké kula?

₉Panjenengan supaya gelem éling, yèn Panjenengan sing nggawé kula sangka lempung,

kok bakal Panjenengan dadèkké lebu menèh!

₁₀Apa duduk Panjenengan sing ngutyurké kula kaya mèlek,

kok terus bakal Panjenengan kentelaké dadi kèju?

₁₁Panjenengan templèki kulit karo daging,

Panjenengan enami balung lan otot.

₁₂Panjenengan ngekèki urip lan kawelasan;

nyawa kula Panjenengan jaga lantaran pangrumat Panjenengan.

₁₃Nanging kahanané sing mengkéné kuwi kok Panjenengan delikké ing njeruhné ati;

kula ngerti, yèn kuwi pantyèn wis dadi karep Panjenengan.

₁₄Yèn kula nggawé dosa, Panjenengan mesti bakal weruh,

lan kula ora bakal Panjenengan bébaské tanpa kesalahan.

₁₅Yèn kula duraka, tyilaka kula;

yèn kula bener ya ora bisa ndangak,

awit enggèn kula warek kewirangan,

lan weruh kasangsarané kula.

₁₆Yèn kula ndangak,

Panjenengan mesti terus ngoyak kula kaya singa

lan ngétokké pangwasané Panjenengan sing nggumunaké kuwi marang kula menèh.

₁₇Panjenengan bakal ngajokké seksi-seksi anyar sing nglawan kula,

- Panjenengan nggedèkké bebendu Panjenengan marang kula -

Panjenengan bakal ngajokké suradadu-suradadu anyar, malah nyerang marang kula.

₁₈Apa sebabé Panjenengan ngetokké kula sangka wetengé ibuku?

Luwih apik yèn kula mati, sak durungé kula diweruh karo wong,

₁₉kaya-kaya kula ora tau ana,

sangka wetengé ibu terus waé digawa menyang kuburan.

₂₀Apa dina-dina umur kula ora mung setitik?

Panjenengan supaya gelem ngendek kula, supaya kula bisa bungah sak untara,

₂₁sak durungé kula lunga lan ora mulih menèh

menyang negara sing peteng ndedet,

₂₂marang negara sing peteng ndedet,

panggonan sing peteng banget lan ora nggenah,

sing sloroté pepadangé pada karo pepeteng.”