Ayub 16

₂“Wis kerep banget aku krungu sing kaya mengkono kuwi,

kowé kabèh kuwi juru panglipuran sing apes!

₃Apa durung entèk tembungmu sing tanpa isi kuwi?

Apa ta sing meksa kowé supaya nglawan?

₄Aku ya bisa ngomong kaya kowé,

yèn kowé kuwi dadi kaya aku;

aku bisa ngratyik tetembungan sing apik kanggo kowé

lan gèdèk-gèdèk ngrasakaké kowé.

₅Aku bisa nguwatké atimu karo tutuk

lan lambéku ora tak endek enggoné ngutyapké balesan.

₆Nanging yèn aku ngomong, enggonku ngalami sangsara ora bakal dadi èntèng

lan yèn aku meneng apa ya ana sudané?

₇Nanging saiki Panjenengané ndadèkké aku tanpa kekuwatan

lan ngrusak sak isiné omahku,

₈aku dityekel; iki sing dadi seksi;

enggonku kuru iki kaya-kaya terus ngadek nggugat marang aku.

₉Nesuné Gusti Allah nyerang lan nglawan marang aku,

nggeget waja tumuju marang aku,

aku dipandeng karo mungsuhku karo mripat mentyereng.

₁₀Wong pada tyrèwèt tyangkemé kanggo aku,

aku ditapuk karo sing ngisinké,

pada nggrombol arep ngroyok aku.

₁₁Gusti Allah masrahké aku marang wong dursila,

lan masrahaké aku marang tangané wong duraka.

₁₂Aku urip tentrem, nanging aku terus disengsarakké,

gitokku dityekel terus aku dibanting,

terus ditangèkké didadèkké sasaran-Né.

₁₃Aku diudani karo panah,

ginjelku pada dityublesi tanpa kawelasan,

rempelaku dikutahké ing bumi.

₁₄Aku dijuwing-juwing,

aku dilawan kaya déné suradadu ing perang.

₁₅Aku wis ndondomi salin kasusahan kanggo nutupi kulitku

lan sunguku tak uruki lebu.

₁₆Praupanku kétok abang awit sangka nangis

lan mripatku ketutupan karo peteng ndedet,

₁₇senajan tanganku ora kanggonan tumindak dursila

lan pandongaku resik.

₁₈Hé! bumi, getihku aja kok tutupi,

lan jeritanku aja nganti olèh panggonan lèrèn!

₁₉Ngertia, saiki uga Seksiku ing swarga,

sing nyeksèni aku ing nduwur.

₂₀Senajan aku dipoyoki karo kantya-kantyaku

nanging karo nangis mripatku melèk marang Gusti Allah,

₂₁supaya Panjenengané gelem ngrampungké perkara ing antarané manungsa lan Gusti Allah

lan manungsa lan sak pepadané.

₂₂Awit gunggungé taun mung kèri setitik

lan aku bakal metu ing dalan sing ora bakal tak balèni menèh.