Ayub 27

₂“Kanggo Gusti Allah sing ora ngekèki keadilan marang aku

lan kanggo sing Mahakwasa sing nindakké pait-getir marang nyawaku,

₃selawasé ambekanku durung suda,

lan napasé sangka Gusti Allah ijik ing irungku,

₄lambéku tenan ora bakal ngutyapké sing goroh

lan ilatku ora bakal nglairké sing ala.

₅Aku babar pisan ora mbenerké kowé!

Nganti aku mati aku tetep ngwasani, yèn aku ora salah.

₆Kebeneranku tak gondèli kentyeng lan ora bakal tak etyulké;

atiku ora bisa nyalahké dinané uripku siji-sijia.

₇Mungsuhku bèn ngrasakaké kaya wong duraka,

lan wong sing nglawan marang aku kaya wong lityik.

₈Awit apa ta pengarep-arepé wong duraka,

yèn Gusti Allah ngomong lan njupuk uripé?

₉Apa Gusti Allah bakal ngrungokké jeritané,

yèn katekan kangèlan?

₁₀Apa bisa seneng-seneng awit sangka sing Mahakwasa

lan tansah nyebut marang Gusti Allah?

₁₁Aku arep ngekèki weruh marang kowé bab tangané Gusti Allah,

apa sing dikarepké karo sing Mahakwasa ora bakal didelikké.

₁₂Sak beneré kowé kabèh wis pada weruh déwé;

kenèng apa kowé pada mikir sing ora-ora?

₁₃Ya iki pandumané wong duraka sing ditemtokké karo Gusti Allah,

lan ganjarané wong dursila pawèhé sing Mahakwasa:

₁₄yèn anaké dadi okèh pada dadi pangané pedang

lan anak putuné bakal kekurangan pangan.

₁₅Nanging sing ijik urip bakal medun ing kuburan awit sangka memala,

ora ditangisi karo randané.

₁₆Yèn numpuk banda tyatyahé nganti kaya lebu,

lan numpuk sandangan nganti kaya lempung,

₁₇senajan dèwèké sing numpuk,

nanging sing nganggo wong sing bener,

lan wong sing ora salah sing bakal ngedum-edum duwité kuwi.

₁₈Enggoné ngedekké omah kaya jaringé kalamangga,

kaya gepuk gawéané tukang jaga.

₁₉Enggoné nglèyèh kaya wong sugih, nanging kuwi ora bakal kelakon menèh,

bareng melèké mripaté, samubarang kabèh wis ora ana.

₂₀Wong mau kena karo rasa wedi kaya tekané banjir,

ing wayah mbengi digawa kabur karo lésus,

₂₁direbut karo angin wétan nganti entèk,

kebuwang sangka panggonané.

₂₂Dibandemi karo Gusti Allah tanpa welas,

karo gugup enggoné ngéndani tangané.

₂₃Dikeploki karo wong okèh

lan disingsoti sangka panggonané.”