Ayub 40

₂“Maraa dadia kaya wong lanang;

Kowé bakal Tak tyeluk, Aku disauri.

₃Apa kowé arep ngilangi pengadilan-Ku

nyalahké Aku supaya bisa mbenerké awakmu déwé?

₄Apa tanganmu kaya tangané Gusti Allah,

lan apa kowé bisa ngetokké swara gembluduk kaya Panjenengané?

₅Yèn mengkono awakmu wènèhana rerékan kamulyan lan kaluhuran,

kowé nganggoa kahurmatan lan wibawa!

₆Esokna nesumu sing mulat-mulat;

awasana saben wong sing gemunggung lan asorna,

₇awasana saben wong sing sombong-sombong kuwi lan dingklukna.

Lan wong duraka pada kok lebur ing panggonané!

₈Pendemen bebarengan ing njeruhné lebu,

ukumen ing panggonan sing ndelik,

₉nganti Aku bakal ngelem-elem marang kowé,

awit tanganmu tengen ngekèki kemenangan marang kowé.”

₁₀“Kowé nyawanga jaran Nil, sing wis Tak gawé uga kaya kowé.

Kuwi mangan suket kaya sapi.

₁₁Kowé nyawanga kekuwatané sing manggon ing lempèngé

kekuwatané ing ototé wetengé!

₁₂Enggoné ngentyengké buntuté kaya wit tyemara,

otot-ototé pupuné talèn-talènan,

₁₃Balung-balungé kaya pipa tembaga,

ragangané kaya balok wesi.

₁₄Kuwi sing ndisik déwé digawé karo Gusti Allah,

makluk sing dikèki gaman pedang;

₁₅gunung-gunung pada ngetokké sing kanggo pakané;

kéwan alasan pada seneng-seneng ing kono.

₁₆Jaran Nil mau enggoné njerum ing sak ngisoré wit traté,

kaling-kalingan karo glagah lan rawa.

₁₇Tetukulan traté pada ngayomi karo ayang-ayangé,

lan diubengi karo wit truntum.

₁₈Senajan iliné banyu banter banget, kéwan mau ora gemeter;

senajan laut Yordan lubèr nyerang marang tyangkemé,

atiné ya énak-énak waé.

₁₉Apa wong bisa nyekel sangka ngarep lan bisa ngeluhi irungé?”

₂₀“Apa kowé bisa nggèrèt bajul nganggo pantying,

utawa njiret ilaté nganggo tali?

₂₁Apa kowé bisa masang tali penjalin ing irungé,

utawa nyubleské gantolan ing rahangé.

₂₂Apa kira-kira kéwan mau bisa njaluk kawelasan marang kowé,

utawa bisa ngomong alus marang kowé?

₂₃Apa kira-kira bisa nggawé perjanjian karo kowé,

nganti terus kowé ndadèkké batur ing selawasé?

₂₄Apa kowé bisa dolanan karo kéwan mau kaya karo manuk,

lan apa bisa kok dadèkké dolanané anak-anakmu wadon?

₂₅Apa kira-kira kena didadèkké dagangané para tukang nggolèk iwak,

utawa diedum-edum ing antarané para wong dagang?

₂₆Apa kulité kena kok jojohi karo tumbak,

utawa endasé karo tlempak?

₂₇Tanganmu kok tumpangna ing endasé!

Elinga marang enggoné tarung!

Kowé ora bakal nindakké mengkono menèh!

₂₈Pengarep-arepmu kuwi tenan tanpa isi.

Ijik weruh kéwan kuwi waé, wong wis ambruk.