Yosua 12

₁Iki jenengé para ratu ing negara sing dikalaké karo wong Israèl lan sing direbut negarané ing sabrangé laut Yordan sisih wétan, wiwit ing kali Arnon tekan ing gunung Hèrmon lan sak kabèhé Araba-Yordan sak ngétan.

₂Sihon, ratuné wong Amori, sing manggon ing kuta Hèsbon, pangwasané wiwit ing Aroèr ing pinggir kali Arnon, ing separoné kali kuwi, ditambahké separoné negara Giléad, tekan ing kali Yabok, watesé bawah turunané Amon, ₃lan sing uga Araba-Yordan tekan ing sisih wétané jèjèr Kinerot, lan tekan ing sisih wétané segara Araba, ya kuwi segara Asin, ing peneré Bèt-Yésimot, lan ing sisih kidul nganti tekan ing ngisoré pèrèngané gunung Pisga. ₄Terus panggonané Og, ratu ing Basan, tunggalé wong Réfaim, ratu iki manggon ing Astarot lan ing Edrèi, ₅sing ngwasani ing gunung Hèrmon, ing Salka lan ing sak tanah Basan kabèh tekan ing bawah wong Gesur lan wong Maaka, uga separoné negara Giléad tekan ing panggonané Sihon, ratu ing Hèsbon.

₆Kuwi wis pada dikalaké Moses, abdiné GUSTI, karo wong Israèl, lan negara kuwi terus dikèkké karo Moses, abdiné GUSTI marang wong Rubèn lan wong Gad lan separo taler Manasé dadi duwèké.

₇Iki bab para ratuné negara sing pada dikalaké karo Yosua lan wong Israèl ing kuloné laut Yordan, wiwit ing Baal-Gad ing legokané gunung Libanon tekan ing pegunungan Gundul, sing munggah ing peneré Seir, negara iki dikèkké Yosua marang para taleré Israèl kanggo duwèké miturut pandumané déwé-déwé. ₈Ing Pegunungan, ing Bawah Pegunungan, nang Araba-Yordan, ing pèrèngané gunung, ing ara-ara samun lan ing negara Negeb, ya kuwi ing negarané wong Hèt, wong Amori, wong Kanaan, wong Fèris, wong Hèwi lan wong Yébus.

₉Ratu ing kuta Yériko siji, ratu ing kuta Ai, sing sandingé ing Bétel siji, ₁₀ratu ing Yérusalèm siji, ratu ing kuta Hébron siji, ₁₁ratu ing kuta Yarmut siji, ratu ing kuta Lakis siji, ₁₂ratu ing kuta Eglon siji, ratu ing kuta Geser siji, ₁₃ratu ing kuta Debir siji, ratu ing kuta Geder siji, ₁₄ratu ing kuta Horma siji, ratu ing kuta Arad siji, ₁₅ratu ing kuta Libna siji, ratu ing kuta Adulam siji, ₁₆ratu ing kuta Makéda siji, ratu ing kuta Bétel siji, ₁₇ratu ing kuta Tapuah siji, ratu ing kuta Hèfèr siji, ₁₈ratu ing kuta Afèk siji, ratu ing kuta Lasaron siji, ₁₉ratu ing kuta Madon siji, ratu ing kuta Hasor siji, ₂₀ratu ing kuta Simron Meron siji, ratu ing kuta Aksaf siji, ₂₁ratu ing kuta Taanak siji, ratu ing kuta Megido siji, ₂₂ratu ing kuta Kèdès siji, ratu ing kuta Yoknéam ing sak tyedaké gunung Karmèl siji, ₂₃ratu ing kuta Dor, ing tanah pegunungan Dor siji, ratu ing kuta Goyim, ing Gilgal siji, ₂₄ratu ing kuta Tirsa siji; dadi tyatyahé para ratu mau kabèh telung puluh siji.