Yosua 23

₁Sakwisé suwé, GUSTI wis ngekèki tentrem marang Israèl, utyul sangka sakkèhé mungsuhé ing sak ubengé, lan waktu Yosua wis tuwa, wis okèh umuré, ₂Yosua terus nyeluk wong Israèl kabèh, para tuwa-tuwané, para penggedéné, para rèkter lan para penggedéné perjurité; kuwi kabèh pada diomongi mengkéné: “Aku iki wis tuwa, wis okèh umurku, ₃lan kowé pada weruh déwé apa sing wis ditindakké karo GUSTI Gusti Allahmu marang sakkèhé bangsa ing kéné awit sangka kowé kabèh, awit GUSTI, Gusti Allahmu kuwi sing mimpin perangmu. ₄Bebungaha, panggonané kabèh para bangsa sing ijik kèri kuwi wis tak pandumaké marang taler-talermu karo dilotré dadi warisanmu wiwit ing laut Yordan, - uga kaya kabèh bangsa sing wis tak entèkké ing waktu kuwi, - nganti tekan ing Segara Gedé ing panggonan mingslepé srengéngé. ₅GUSTI Gusti Allahmu déwé sing bakal nundungi para bangsa mau ing ngarepmu lan nglungakké sangka ngarepmu, nganti kowé pada bisa ngenggoni negarané kaya sing wis dijanjèkké karo GUSTI Allahmu marang kowé. ₆Awit kuwi kowé pada kuwata enggonmu netepi lan nglakoni sak rupané sing ketulis ing kitab angger-anggeré Moses, supaya aja nganti nyimpang ngiwa utawa nengen. ₇Aja nganti pada sesrawungan karo para bangsa sing ijik ing tengah-tengahmu, lan aja nganggep marang jenengé para allahé utawa sumpah kanggo kuwi, lan kuwi aja pada kok bektèni utawa kok sujuti. ₈Nanging pada rumaketa marang GUSTI Allahmu kaya enggonmu wis pada nglakoni nganti tekan ing dina iki. ₉GUSTI wis nundungi bangsa-bangsa sing gedé lan kuwat sangka ngarepmu, lan kanggo kowé iki ora ana wong siji-sijia sing tetep urip ing ngarepmu nganti tekan ing dina iki. ₁₀Wong siji waé sak panunggalmu bakal bisa nguber wong 1000, awit GUSTI Gusti Allahmu déwé sing mimpin perangmu, kaya sing wis dadi perjanjiané marang kowé. ₁₁Awit kuwi pada mantepa enggonmu pada trésna marang GUSTI, Gusti Allahmu awit kuwi kanggo nyawamu. ₁₂Awit yèn kowé pada perduli lan pada rumaket marang turahé para bangsa sing ijik kèri ing tengahmu iki, malah nganti pada bésanan lan sesrawungan karo wong-wong kuwi ₁₃titènana tenan, yèn GUSTI Gusti Allahmu mesti bakal ora nundungi para bangsa kuwi menèh sangka ngarepmu, malah kuwi bakal pada dadi kala lan jiret kanggo ing kowé, lan dadi petyut kanggo ing wetengmu, uga dadi klilép ing mripatmu, nganti kowé pada entèk resik sangka negara sing apik pawèhé GUSTI Gusti Allahmu marang kowé iki. ₁₄Nanging ing saiki aku iki sedilut engkas bakal mlaku ing dalané samubarang sing bisa rusak. Mulané kowé pada ngrasakna karo sak kabèhé atimu lan sak kabèhé nyawamu, yèn kanggo kabèh perkara sing apik, sing wis dijanjèkké karo GUSTI Gusti Allahmu awit kowé, kuwi ora ana sing ora dileksanani. ₁₅Nanging pada kaya kabèh perkara sing apik sing wis dijanjèkké karo GUSTI Gusti Allahmu kuwi kabèh wis kelakon, mengkono uga GUSTI ya bakal nekakké marang kowé kabèh perkara sing ora apik, nganti kowé pada dientèkké nganti ora ana sangka negara sing apik pawèhé GUSTI Gusti Allahmu marang kowé iki, ₁₆yèn kowé pada nerak perjanjian sing wis dipréntahké karo GUSTI Gusti Allahmu marang kowé, lan lunga ngabekti lan sujut marang allah liyané, ing kono bakal mulat-mulat nesuné GUSTI marang kowé, nganti kowé bakal gelis entèk resik sangka negara sing apik sing wis dikèkké marang kowé.”