Yosua 8

₁Sakwisé mengkono GUSTI ngetokké tembung marang Yosua: “Kowé aja wedi lan semplak atimu, sakkèhé perjuritmu gawanen, terus budala, ngluruk menyang ing kuta Ai. Ngertènana, ratu ing Ai kabèh para abdiné, kutané lan negara pada Tak pasrahké ing tanganmu. ₂Kuta Ai kabèh sak ratuné kuwi pada kudu kok tandangi kaya déné kowé nandangi marang kuta Yériko lan ratuné, mung barang-barang lan bandané kuwi kena kok rayah. Kowé ngangkana wong ndelik ing mburiné kuta Ai.” ₃Yosua terus tata-tata karo sakkèhé perjurité, arep ngluruk menyang kuta Ai, Yosua milih wong 30.000, wong-wong sing gagah lan rosa-rosa, kuwi pada dilakokké ing wayah mbengi; ₄lan pada diomongi mengkéné: “Ngertia kowé pada ndelika ing mburiné kuta lan nyerang kuta kuwi, aja nganti kadohan sangka kuta lan kabèh pada tata-tataa. ₅Nanging aku lan sakkèhé perjurit sing mèlu aku bakal pada nyedaki kutané, terus yèn wong pada metu metuki kita kaya sing ndisik, aku bakal pada mlayu sangka ngarepé. ₆Dadi wong-wong kuwi bakal pada nantang ngoyak kita, dadiné bakal tak pantying nganti adoh sangka kuta, mesti bakal nduwé tembung: Wongé pada mblayu sangka ngarep kita kaya sing uwis. Nanging yèn aku pada mlayu sangka ngarepé, ₇kowé terus pada metua sangka pandelikanmu, kutané rebuten. GUSTI Gusti Allahmu mesti bakal ngekèkké marang ing tanganmu. ₈Nanging sakwisé kutané kok rebut, terus obongen; kabèh kuwi pada tandangana kaya sing dipréntahké GUSTI; gatèkna, kuwi préntahku marang kowé.” ₉Kaya mengkono préntahé Yosua marang wong-wong mau, terus pada budal menyang pandelikané ing antarané kuta Bétel lan Ai, ing kuloné kuta Ai. Nanging ing wayah mbengi kuwi Yosua nginep ing sak tengahé rayat.

₁₀Esuké ing wantyi mruput Yosua tangi, terus nitipriksa prajurité rayat, lan terus budal menyang ing kuta Ai, ditutké karo para pinituwané Israèl, mlakuné ing ngarepé perjurité. ₁₁Uga sakkèhé perjurité sing mèlu terus pada maju terus; pada maju nganti tekan ing ngarepé kuta, terus pada manggon ing loré kuta Ai, dadiné legokané ing antarané wong-wong mau lan kuta Ai. ₁₂Yosua wis njupuk perjurit 5000 sing pada préntahaké ndelik ing antarané kuta Bétel lan Ai, ing kuloné kuta. ₁₃Nanging tyarané metuki perjurit kuwi mengkéné: perjurit-suradadu kabèh ing loré kuta lan sing ndelik ing kuloné kuta. Ing wayah mbengi kuwi Yosua mlaku liwat ing legokan kono. ₁₄Ing wayah ésuk bareng ratu ing Ai ngerti sing kaya mengkono kuwi, terus gelis-gelis metu perang karo rayaté kabèh, wong-wong ing kuta kono, lan terus nyerang wong Israèl ing pèrèng-pèrèng ing ngarepé legokan; ratu ora ngerti yèn ing mburiné kuta ana sing ndelik. ₁₅Yosua lan wong Israèl kabèh terus étok-étok kalah ing ngarepé perjurité wong Ai lan terus pada mblayu nuju ing ara-ara samun. ₁₆Awit sakkèhé wong lanang ing njeruh kuta pada bebarengan lan pada ngoyak wong Israèl; terus pada ngoyak Yosua, nganti saya adoh enggoné kepantying sangka kuta. ₁₇Ora ana siji-sijia wong lanang sing kèri ing Bétel lan Ai, sing ora metu ngoyak wong Israèl; kutané ditinggal suwung, awit wong-wong pada ngoyak wong Israèl.

₁₈Ing kono terus ana préntahé GUSTI marang Yosua: “Tumbak ing tanganmu kuwi atyungna marang kuta Ai, awit kuta kuwi Tak pasrahké ing tanganmu.” Yosua terus ngatungké tumbak ing tangané marang ing kuta Ai. ₁₉Bareng tangané diatyungké sing ndelik mau terus gelis-gelis metu sangka pandelikané, pada menyat pada mlayu mlebu ing kuta, terus direbut lan gelis-gelis diobong. ₂₀Bareng wong Ai pada nolèh weruh, bulekké kuta kemebul menyang ing langit; wong-wong kuwi wis ora bisa mblayu mréné utawa mbrana, awit perjurit sing mlayu menyang ara-ara samun pada mbalik nyerang marang sing pada ngoyak. ₂₁Bareng Yosua lan wong Israèl kabèh weruh yèn kutané wis kena kerebut karo sing ndelik lan bulekké kuta kemebul, terus pada mbalik lan merangi wong-wong Ai. ₂₂Uga wong Israèl liyané uga pada metu sangka kuta mèlu merangi wong-wong Ai, nganti pada ketyepit ing sak tengahé wong Israèl, sing iki sangka kéné, sing kaé sangka kana, terus pada dipatèni, nganti wis ora ana siji-sijia sing utyul utawa luwar. ₂₃Nanging ratu ing Ai terus dityekel urip-uripan, terus dipasrahké ing ngarepé Yosua.

₂₄Bareng bangsa Israèl wis rampung enggoné matèni kabèh wong kuta Ai ing ara-ara sing kebukak, - enggoné pada ngoyak mrana kuwi - lan sakwisé kabèh pada dipatèni karo landepé pedang, nganti resik, wong Israèl kabèh terus pada bali menyang ing kuta Ai lan merangi kuta kuwi karo landepé pedang. ₂₅Tyatyahé wong sing pada dipatèni ing dina kuwi, lanang wadon ana rolas èwu, kabèh wong kuta Ai. ₂₆Yosua tansah ngatyungké tangané sing nyekel tumbak, nganti sakkèhé wong sing manggon ing kuta Ai wis pada dientèkké kabèh. ₂₇Mung bandané lan barang-barang isiné kuta kuwi pada dirayah wong Israèl, tyotyok tembungé GUSTI sing wis dipréntahké marang Yosua. ₂₈Kuta Ai terus diobong karo Yosua, didadèkké gempuran ing selawasé, dadi panggonan sing suwung tekan ing dina iki. ₂₉Nanging ratu ing Ai kuwi digantung ing tyagak, nganti tekan ing wayah soré. Bareng wayah mingslepé srengéngé, Yosua ngongkon ngedunké layoné sangka tyagak mau, terus dibuwang ing ngarepé gapurané kuta lan dideki tumpukan watu gedé-gedé, sing ijik tetep ana nganti tekan sepréné.

₃₀Sakwisé mengkono Yosua terus nggawé mesbèh ngadep marang GUSTI, Gusti Allahé Israèl ing gunung Ebal, ₃₁kaya sing wis dipréntahké karo Moses, abdiné GUSTI marang wong Israèl, ya kaya sing wis ketulis ing kitab Torèté Moses; mesbèh kuwi sing digawé watu wutuhan, sing ora kedemok karo piranti wesi apa waé; wong-wong terus pada masrahaké kurban obongan marang GUSTI ing mesbèh kono, lan pada ngurbanké kurban keslametan. ₃₂Watuné pada ditulisi turunané angger-anggeré Moses, tulisané Yosua iki diseksèni karo wong Israèl. ₃₃Wong Israèl kabèh, para pinituwané, para penggedéné perjurité lan para rèkter pada ngadek ing sak kiwa-tengené peti, adu-arep karo para imam sing pantyèn sangka taler Lévi sing ngusung peti perjanjiané GUSTI, ya wong mantya ya wong Israèl, sak bagéan madep menyang gunung Gérisim, sak bagéan madepa menyang gunung Ebal kaya sing mbiyèn dipréntahké karo Moses, abdiné GUSTI, yèn wong mberkahi bangsa Israèl. ₃₄Sakwisé mengkono Yosua terus matyakké sakkèhé isiné angger-anggeré Torèt, ya berkahé ya bebenduné, miturut karo sing ketulis ing kitab angger-angger. ₃₅Kabèh sing wis dipréntahké karo Moses ora ana sak tembung waé sing ora diwatya karo Yosua ing ngarepé pasamuané Israèl kabèh, lan ing ngarepé para wong wadon lan botyah-botyah, lan bangsa mantya sing pada mèlu ing mlakuné.