Utusané Yohanes Pembaptis
1Sakwisé Yésus mungkasi pawelingé marang muridé rolas, Panjenengané terus lunga sangka kono, terus mulangi lan nggelarké Injil ing kuta-kutané.
2Ing pakunjara Yohanes krungu kabar bab penggawéané Kristus, 3terus ngutus muridé supaya takon marang Panjenengané, mengkéné: “Apa Panjenengan kuwi sing mesti teka, apa kita kudu pada ngentèni liyané?” 4Yésus nyauri, tembungé: “Wis, pada mbalika, kabarna marang Yohanes apa sing kok krungu lan kok deleng: 5wong pityek pada weruh, wong lumpuh pada mlaku, wong lara lépra pada diwaraské, wong budek pada krungu, wong mati pada ditangèkké lan wong mlarat pada dikabari kabar kabungahan. 6Rahayu wong sing ora rumangsa isin ngakoni Aku.”
Paseksiné Yésus kanggo Yohanes
7Sak mulihé para kongkonan mau, Yésus wiwit nggelar tembungé marang wong okèh kuwi bab Yohanes, mengkéné: “Kowé pada menyang ara-ara samun arep weruh apa? Arep weruh glagah sing diobat-abitaké karo angin? 8Utawa arep ngapa kowé mrana? Arep weruh wong sing nganggo sandangan sing alus? Wong sing nganggo alus kuwi panggonané ing kraton. 9Dadi arep apa kowé mrana? Arep weruh nabi? Ya, bener lan Aku ngomong marang kowé, malah sing ngungkuli nabi. 10Awit ya kuwi sing ketulis, mengkéné:
Delengen, Aku ngutus kongkonan-Ku mlaku ndisiki Kowé,
arep nyawiské dalanmu ing ngarepmu.
11Sak temené Aku ngomong marang kowé: Ing antarané wong-wong sing lair sangka wong wadon, ora ana wong sing luwih gedé tenimbang Yohanes Pembaptis, senajan mengkono wong sing tyilik déwé ing Kratoné swarga, kuwi luwih gedé tenimbang Yohanes Pembaptis. 12Awit wiwit waktu Yohanes Pembaptis njangkah ing gawé nganti saiki, Kratoné swarga kuwi diénggokké lan para sing ngénggokké kuwi mbudidaya arep ngrebut pangwasa. 13Awit kabèh nabi lan kitab Torèt kuwi pada ngomongké nganti sak tekané Yohanes. 14Lan, yèn kowé pada gelem nganggep mengkono, ya wong mau kuwi Elia sing bakal teka. 15Sapa sing nduwé kuping, rungokna.
16Tak padakké apa wong golongan iki? Kaya botyah-botyah sing lungguhan ing pasar, nyeluk marang kantya-kantyané mengkéné:
17Kita wis pada nyuling kanggo kowé, nanging kowé ora pada njogèt.
Kita wis pada ngidungké kidung pesambat,
nanging kowé ora pada tangisan.
18Sakrèné Yohanes kuwi teka tanpa mangan tanpa ngombé, mulané wong-wong pada ngomong: Wong kuwi kesurupan demit. 19Tekané Putrané Manungsa nganggo mangan lan ngombé, lan wong-wong pada ngomong: Delengen kuwi, wong nggragas lan seneng ngombé anggur, kantya-kantyané para juru pajek lan wong dosa. Nanging kawityaksanané Gusti kuwi dibeneraké awit sangka tumindaké.”
Wong ing kuta-kuta sing ora pertyaya
20Panjenengané terus wiwit melèhké marang kuta-kuta awit pada ora mratobat, ing kono Panjenengané nindakké mujijat sing okèh déwé: 21“Tyilaka kowé Korasin, tyilaka kowé Bètsaida, awit yèn ing Tirus lan ing Sidon ya kelakon mujijat-mujijat kaya sing wis kelakon ing tengah-tengahmu, mesti wis mbiyèn-mbiyèn enggoné pada mratobat lan sedih banget. 22Nanging Aku ngomong marang kowé: Mbésuk ing dina pengadilan sing disangga karo Tirus lan Sidon bakal luwih èntèng tenimbang kowé. 23Uga kowé Kapernaum, apa kowé bakal kaluhurké nganti sundul langit? Ora, kowé bakal dityemplungké ing panggonané pepetengé pati. Awit yèn ing Sodom kelakon mujijat-mujijat sing kedadian kaya ing tengah-tengahmu, kuta kuwi mesti lestari tekan saiki. 24Nanging Aku ngomong marang kowé: Mbésuk ing dina pengadilan sing disangga karo negara Sodom bakal luwih èntèng tenimbang kowé.”
Yésus maturkesuwun marang Bapaké — Bab ayemé ati
25Ing waktu kuwi Yésus ngomong: “Duh, Bapak, Gustiné swarga lan bumi, kula masrahké tembung maturkesuwun, bab kuwi kabèh Panjenengan nggawé ora ngerti kanggo wong wityaksana lan wong pinter, nanging Panjenengan duduhké marang wong tyilik. 26Ya, Bapak, pantyèn mengkéné karep Panjenengan.”
27“Samubarang kabèh wis dipasrahké marang Aku karo Bapak-Ku, lan ora ana wong sing mengertèni marang Putra, kejaba mung Bapak, lan ora ana wong sing mengertèni marang Bapak, kejaba mung Putra lan wong sing wis disenengi sangka karepé Putra.
28Hé, para wong sing kangèlan lan kabotan, pada mrénéa, Aku bakal nggawé ayemmu. 29Pasangan-Ku pada tampanana ing pundakmu lan pada blajara marang Aku, awit Aku iki alus lan andap asor, terus kowé bakal pada olèh ayemé nyawamu. 30Awit pasangan-Ku kuwi kepénak lan momotan-Ku kuwi èntèng.”
