Mika 3

₁Pituturku mengkéné: Pada rungokna ta,

hé, para penggedéné Yakub,

lan para pemimpiné turunané Israèl.

Apa ora wis sak beneré kowé weruh marang keadilan,

₂hé, kowé sing pada sengit marang kabetyikan

lan seneng marang sing ala?

Wong kuwi pada ngelèti bangsaku

lan mbesèti dagingé sangka balung-balungé;

₃pada mangan dagingé bangsaku,

pada ngelèti kulité sangka awaké,

pada ngremuk balung-balungé

lan nengkel-nengkel kaya daging ing wajan,

lan kaya iris-irisan daging ing njeruh kuwali.

₄Terus bakal pada sambat déwé marang GUSTI,

nanging ora bakal dituruti.

Panjenengané malah nutupi praupané kanggo wong-wong mau ing waktu kuwi,

awit ala penggawé-penggawéné.

₅Mengkéné tembungé GUSTI kanggo para nabi

sing nyasarké bangsaku,

sing pada ngomongké katentreman,

yèn olèh sing kena dipangan,

nanging marang wong sing ora ngekèki apa-apa ing tutuké,

terus ngomongké perang.

₆Mulané awan bakal dadi wengi tanpa wahyu kanggo kowé,

lan dadi peteng tanpa tenungan.

Para nabi mau bakal pada kislepan srengéngé,

lan awan bakal dadi peteng ndedet kanggo wong-wong kuwi.

₇Para wong tukang ndelok bakal pada kewirangan,

lan para tukang tenung bakal pada kisinan,

kabèh bakal pada nutupi praupané,

awit Gusti Allah ora nyauri.

₈Nanging aku iki kebak ing bab kekuwatan,

Rohé GUSTI,

lan keadilan lan kekuwatan,

kanggo ngomongi marang Yakub bab paneraké

lan marang Israèl bab dosané.

₉Hé, para penggedéné turunané Yakub

lan para pemimpiné turunané Israèl, pada rungokna!

Hé, kowé sing pada serik marang keadilan

lan sing mbéngkongké samubarang sing lempeng,

₁₀hé, kowé sing pada nggawé Sion karo getih

lan Yérusalèm karo tumindak ala!

₁₁Para penggedéné enggoné ngadili awit sangka beselan,

lan para imamé enggoné mulangi awit sangka bayaran

para nabiné enggoné nenung awit sangka duwit,

nanging pada njagakké marang GUSTI karo tembungé:

“GUSTI apa ora ing sak tengahé kita!

Kita ora bakal katekan tyilaka!”

₁₂Awit kuwi sangka kowé

Sion bakal diwluku kaya kebon

lan Yérusalèm bakal dadi jugrukan,

lan gunungé griya sutyi bakal dadi gunung sing ketutupan karo alas.