Markus 3

₁Yésus terus mlebu menèh ing sinaguk. Ing kono ana wong sing tangané mati sebelah. ₂Wong-wong pada nyawang Panjenengané apa ya arep maraské wong kuwi ing dina sabat, supaya bisa pada nggugat Panjenengané. ₃Panjenengané terus ngomong marang wong sing tangané mati sebelah kuwi: “Maraa, ngadeka ing tengah kéné!” ₄Panjenengané terus ngomong marang wong-wong sing pada nyawang kuwi: “Ing dina sabat kuwi wong dipréntahké nindakké kabetyikan apa nindakké sing ala, nylametké nyawa apa matèni?” Nanging wong-wong kuwi pada meneng waé. ₅Panjenengané terus weruh wong-wong ing sak kiwa-tengené karo nesu lan karo mangkel ing ati awit wangkoté atiné. Panjenengané ngomong marang sing tangané mati sebelah kuwi: “Tanganmu atungna!” Wong kuwi terus ngetungké lan tangané wis dipulihké. ₆Wong-wong Farisi kuwi, bareng wis pada metu, sak nalika pada komplotan karo para golongané Hérodes gawé rantyamané, kepriyé bisané matèni Panjenengané.

₇Yésus lan para muridé terus sumingkir lunga menyang tlaga; lan kumpulané wong okèh tyatyahé sangka Galiléa pada mèlu, semono uga sangka Yudéa, ₈sangka Yérusalèm, sangka Iduméa lan sabrangé laut Yordan, uga sangka bawah Tirus lan Sidon. Kumpulané wong sing okèh tyatyahé kuwi pada nemoni Panjenengané, awit wis pada krungu bab samubarang sing ditindakké karo Panjenengané. ₉Panjenengané terus ngongkon marang para muridé supaya nyawiské kapal kanggo Panjenengané awit wong okèh, supaya wong okèh kuwi ora ngesuk-ngesuk Panjenengané. ₁₀Awit Panjenengané wis maraské wong okèh, mulané sak kabèhé wong sing ngalami lara pada desek-desekan maju nyedaki, kanggo bisané ndemèk Panjenengané. ₁₁Roh-roh ala kuwi saben-saben weruh Panjenengané, terus pada sujut ing ngarepé lan ngomong sing banter: “Sampéyan kuwi Putrané Gusti Allah!” ₁₂Nanging karo diwanti-wanti Panjenengané menging roh-roh ala supaya ora pada ngomongké bab Panjenengané.

₁₃Yésus terus munggah ing gunung lan nyeluk wong-wong sing dikarepké lan wong-wong kuwi pada teka marang Panjenengané. ₁₄Panjenengané netepaké wong rolas, sing disebut rasul-rasul karo Panjenengané, supaya pada mèlu Panjenengané lan diutus nggelarké Injil, ₁₅lan pada dikèki pangwasa nundungi demit. ₁₆Panjenengané netepaké wong rolas kuwi, ya kuwi: Simon, sing dikèki jeneng Pétrus, ₁₇lan Yakobus, anaké Sebédéus lan Yohanes seduluré Yakobus lan Panjenengané ngekèki jenengé marang loro-loroné Boanèrges, sing tegesé anaké gluduk, ₁₈lan Andréas, Filipus, Bartoloméus, Matius, Tomas, Yakobus, anaké Alféus, Tadéus, Simon wong Sélot, ₁₉uga Yudas Iskariot, sing ngiyanati Panjenengané.

₂₀Yésus terus mlebu ing sakwijiné omah, wong okèh terus teka menèh, nganti pada ora kober mangan. ₂₁Bareng para seduluré pada krungu, terus pada marani arep ngajak Panjenengané sumingkir, awit Panjenengané kuwi diarani édan. ₂₂Nanging para juru Torèt sing teka sangka Yérusalèm pada ngomong: “Panjenengané kuwi kesurupan Bèèlsébul, lan enggoné nundungi demit karo pitulungané penggedéné para demit.” ₂₃Panjenengané terus nyeluk lan ngomongi wong-wong mau karo umpama: “Kepriyé bisané sétan nundungi sétan? ₂₄Yèn ana kraton nglawan awaké déwé, kraton kuwi ora bisa tetep ngadek, ₂₅lan yèn ana brayat petyah nglawan awaké déwé, brayat kuwi ora bisa lestari. ₂₆Mengkono uga yèn sétan mbruntak nglawan awaké déwé lan dipetyah-petyah, sétan ora bakal tetep ana, nanging wis tekan ing pungkasané. ₂₇Nanging ora ana wong bisa mlebu ing omahé wong sing rosa lan njukuki sembarangé barang duwèké, yèn wong sing rosa kuwi ora dibanda ndisik. Sakwisé mengkono terus bisa ngrampasi banda ing omahé. ₂₈Sak temené Aku ngomong marang kowé: Sak kabèhé dosa lan ngolok-olok sing diutyapké karo anak-anaké manungsa bakal dingapura. ₂₉Nanging, sapa waé sing ora ngajèni marang Roh Sutyi, ora bakal pada olèh ngapura ing sak lawas-lawasé, nanging kesalahan awit nindakké dosa sing langgeng.” ₃₀Panjenengané ngomong mengkono, jalaran wong-wong mau pada ngarani yèn Panjenengané kanggonan roh ala.

₃₁Ibuné lan sedulur-duluré terus pada teka; ngadek ing njaba, pada kongkonan wong ngomongi Panjenengané. ₃₂Wong okèh pada lungguh ngubengi Panjenengané lan pada ngomong: “Kuwi ibu lan sedulur Panjenengan pada ing njaba nggolèki Panjenengan.” ₃₃Panjenengané terus nyauri marang wong-wong kuwi: “Sapa ibuku lan sedulur-sedulurku?” ₃₄Karo nyawang wong-wong sing pada lungguh ngubengi Panjenengané, terus ngomong: “Ya iki ibuku lan sedulur-sedulurku! ₃₅Awit sapa sing nindakké karepé Gusti Allah, ya kuwi sedulurku lanang lan sedulurku wadon uga ibuku.”