Itungan 10

₁GUSTI ngetokké tembung marang Moses, mengkéné: ₂“Kowé nggawéa trompèt slaka loro; sing digawé sangka slaka gemblèngan, kuwi pada dienggo nglumpukké umat Israèl lan kanggo mbudalké suradadu. ₃Yèn trompèt loro kuwi diunèkké, wong Israèl kabèh pada nglumpuka ngadep marang kowé ing ngarep lawang Tarup Kumpulan. ₄Nanging yèn mung siji sing diunèkké, kuwi sing kudu ngadep marang kowé para pemimpin, para penggedé suradadu Israèl. ₅Yèn uniné tyekak-tyekak kuwi tandané para taler sing manggon ing sak wétané Tarup Sutyi kudu budal. ₆Yèn kowé pada ngunèkké tyekak-tyekak kaping pindoné, umat sing manggon ing sisih kidul kuwi pada budal; yèn budal pada kudu nganggo tyekak swarané. ₇Nanging yèn nglumpukké pasamuan, kowé ya ngunèkna trompèt, karo dawa swarané. ₈Sing pada ngunèkké trompèt kuwi para imam anaké Harun; lan kuwi dadi pernatan langgeng marang turun turunmu. ₉Uga yèn kowé ing negaramu pada ngluruk perang nglawan mungsuh sing nggawé angèlmu, kowé ya ngekèkana tenger nganggo trompèt, nganti kowé bakal pada diélingi ing ngarepé GUSTI, Gusti Allahmu, lan pada ditulungi sangka mungsuhmu. ₁₀Mengkono menèh ing dina kebungahanmu, lan ing dina riyayamu uga ing sasi anyar, kowé ya ngunèkna trompèt mbarengi enggonmu masrahaké kurban obongan lan kurban keslametan; nganti bakal pada dadi pengéling-éling ing ngarepé Gusti Allahmu. Aku iki GUSTI, Gusti Allahmu.”

₁₁Ing taun sing kaping pindo, sasi kaping pindo tanggal rong puluh, mendungé mumbul sangka Tarup Sutyi, panggonané angger-anggeré Gusti Allah. ₁₂Wong Israèl terus pada budal sangka ara-ara samun gunung Sinai miturut pernatané budalan, nanging mandeké mendung ing ara-ara samun Paran. ₁₃Kuwi mlakuné sing wiwitan miturut préntahé GUSTI lantaran Moses. ₁₄Sing mlaku ing ngarep déwé golongan sing nang ngisoré gendéra-gendérané turunané Yéhuda miturut golongané déwé-déwé, sing mimpin golongan kuwi: Nahason anaké Aminadab, ₁₅sing mimpin golongan taleré turunané Isakar kuwi: Nétanéèl anaké Suar; ₁₆lan sing mimpin golongan taleré turunané Sébulon kuwi: Eliab anaké Helon. ₁₇Sakwisé mengkono Tarup Sutyi terus dibungkar, lan para turunané Gèrson lan turunané Mérari terus pada budal ngusung Tarup Sutyi mau. ₁₈Kuwi terus disambung karo golongan sing nang ngisoré gendéra gendérané Rubèn miturut golongané déwé-déwé; sing mimpin golongan kuwi: Elizur anaké Syedéur; ₁₉nanging sing mimpin golongan taleré turunané Siméon kuwi: Sélumièl anaké Surisyadai; ₂₀lan sing mimpin golongan taleré turunané Gad kuwi: Elyasaf anaké Rehuèl. ₂₁Kuwi terus disambung karo para turunané Kéhat, sing ngusung piranti omah sutyi; sak tekané ing panggonan liyané, Tarup Sutyi kudu wis didekké menèh. ₂₂Terus sing nyambung menèh golongan sing nang ngisoré gendéra-gendérané turunané Efraim miturut golongané déwé-déwé; ₂₃sing mimpin golongan kuwi: Elisama anaké Amihud; nanging sing mimpin golongan taleré turunané Manasé kuwi: Gamalièl anaké Pedasur; ₂₄lan sing mimpin golongan taleré turunané Bényamin kuwi: Abidan anaké Gidioni. ₂₅Golongan sing mburi déwé golongan sing nang ngisoré gendéra gendérané turunané Dan miturut golongané déwé-déwé, sing mimpin golongan kuwi: Ahiézer anaké Amisyadai, ₂₆Pagièl bin Okran mimpin golongan-golongané taler Asyèr. ₂₇Lan uga Ahira bin Enan mimpin golongan-golongan taler Naftali. ₂₈Kaya mengkono urut-urutané klompok, lan golongané saben umat Israèl mlaku ngalih panggonan.

₂₉Nanging Moses ngomong marang Hobab, anaké imam Rehuèl wong Midian, maratuwané Moses, mengkéné: “Mlakuku pada menyang panggonan sing wis dipréntahké karo GUSTI, tembungé: Kuwi bakal Tak wènèhké marang kowé. Mulané sampéyan mbok mèlu aku, mesti bakal pada tak rumat apik, awit GUSTI wis njanjèkké sing apik kanggo Israèl.” ₃₀Nanging semauré marang Moses: “Kula ora mèlu, kula bakal mulih menyang negara kula lan menyang panggonané kulawarga kula.” ₃₁Tembungé Moses: “Aku aja kok tinggal ta, awit ing ara-ara samun kéné sampéyan sing weruh, ngendi sing kena pada tak enggo manggon, mulané sampéyan dadia tukang nduduhké dalan kanggo kita. ₃₂Yèn sampéyan mèlu kita, kabetyikan sing bakal diwènèhké karo GUSTI marang kita, ya bakal pada kita kèkké marang sampéyan.” ₃₃Terus pada budal sangka gunungé GUSTI, adoh nganti lakon telung dina, lan petiné perjanjiané GUSTI diusung ing ngarep déwé sak njeruhné mlaku telung dina mau, golèk panggonan kanggo manggon. ₃₄Nanging ing waktu budal sangka tarup, ing wayah awan pada diiyupi karo mendungé GUSTI.

₃₅Nanging sak budalé peti, Moses ngomong marang GUSTI mengkéné: “Duh GUSTI, Gusti supaya ngadek, supaya mungsuh Panjenengan pada pating slebar uga wong-wong sing pada sengit marang Gusti pada mlayu sangka ngarepé Gusti.” ₃₆Nanging yèn petiné mandek, tembungé Moses: “Duh GUSTI, Panjenengan supaya gelem mulih menyang ing sak tengahé umat Israèl sing atusan éwon kuwi.”