Masmur 12

₂Duh GUSTI supaya gelem ngekèki pitulungan, awit wis ora ana wong bener,

wong setia wis entèk sangka antarané anak-anaké manungsa.

₃Rembukané pada apus-apusan,

omongané nganggo lambé lamis, nganggo ati rangkep.

₄Supaya Gusti numpes kabèh lambé lamis

lan ilat sing umuk-umukan,

₅ya kuwi sing pada ngomong mengkéné: “Karo ilat kita, kita pada menang!

Lambé kita sing ngréwangi kita! Sapa sing mréntah kita?”

₆Jalaran wong sing ringkih pada ditindes,

lan awit sangka sambaté para wong mlarat

Aku saiki tangi, mengkono tembungé GUSTI,

lan mitulungi wong sing banget enggoné ngarep-arep marang pitulungan.

₇Tembungé GUSTI kuwi pitutur-pitutur sing murni,

kaya slaka sing diobong,

diresiki dibalèni kaping pitu ing pawon obongan lemah.

₈Duh GUSTI, Panjenengan bakal netepi,

kula tansah bakal Panjenengan ayomi, Panjenengan owalké sangka golongan turunan kuwi.

₉Para wong duraka pada mblayu mbrana-mbréné,

Ing waktu pikiran ala njedul ing sak tengahé anak-anaké manungsa.