Masmur 132

Duh GUSTI, Panjenengan supaya éling marang Daved

lan kabèh kasusahané;

₂anggèné sumpah marang GUSTI,

lan ngetokké janji marang Gusti Allahé Yakub, sing Mahakwasa:

₃“Tenan kula ora bakal mlebu ing tarup kula,

lan ora munggah menyang ambèn kula,

₄ya ora nglilani mripat kula turu

utawa ngliyepké mripat kula,

₅nganti kula olèh panggonan kanggo GUSTI,

panggonan kanggo sing Mahakwasa, Gusti Allahé Yakub.”

₆Kita pantyèn wis pada krungu bab kuwi ing Efrata,

wis olèh ing ara-ara Yaar.

₇“Hayuk pada mlebu menyang griyané Gusti Allah,

pada sujut nyembah ing ngarepé antyik-antyiké damparé.”

₈Duh GUSTI, Panjenengan supaya ngadek lan lungaa menyang panggonan-Mu,

Panjenengan karo peti perjanjian kekuwatan-Mu.

₉Para imam Panjenengan supaya nganggo sandangan kabeneran,

lan para katrésnan Panjenengan pada surak-suraka!

₁₀Awit sangka Daved, abdi-Mu,

supaya Panjenengan aja nampik wong sing dijebati Panjenengan.

₁₁GUSTI wis ngomong marang Daved karo sumpah,

sing mesti ora bakal disélaki:

“Sakwijiné turunanmu bakal Tak jagongké ing damparmu;

₁₂angger turunanmu tetep enggoné nggatèkké perjanjian-Ku,

lan kabèh pernatan-pernatan sing Tak wulangké marang dèwèké,

anak putuné turunanmu ing sak lawas-lawasé

bakal pada lungguh ing damparmu.”

₁₃Awit kuta Sion sing wis dipilih karo GUSTI,

dikarepké dadi griyané.

₁₄“Iki panggonan-Ku selawasé,

ing kéné enggon-Ku bakal manggon, awit kuwi sing Tak karepké.

₁₅Panguripané bakal Tak berkahi nganti lubèr,

lan wong mlarat bakal Tak wareki karo roti.

₁₆Para imamé bakal Tak sandangi keslametan,

lan para wong sing bener bakal pada surak-surak awit sangka bungahé.

₁₇Ing kono Aku bakal ngetokké sungu kanggo Daved,

lan sing Tak jebatani bakal Tak tyepaki dimar.

₁₈Mungsuhé bakal pada Tak enggoni sandangan sing kebak kewirangan,

nanging Daved kuwi bakal nganggo makuta sing semlorot.”