Masmur 146

₁Haléluya!

Duh nyawaku, memujia marang GUSTI!

₂Aku bakal ngluhurké GUSTI sakjeku urip,

Gusti Allahku bakal tak puji karo masmur sak suwéné aku ijik urip.

₃Aja pertyaya marang para penggedé,

lan marang anak-anaké manungsa sing ora bisa ngekèki keslametan.

₄Yèn nyawané pedot, terus bali menyang lemah;

ing dina kuwi uga kekarepané entèk.

₅Rahayu wong sing nduwèni Gusti Allahé Yakub dadi pinulungé,

sing pengarep-arepé marang GUSTI, Gusti Allahé,

₆Panjenengané sing nggawé langit lan bumi,

segara lan sak isiné kabèh,

sing tetep setia tekan selawasé,

₇sing jejekké keadilan kanggo wong sing pada ditindes,

sing ngekèki pangan marang wong sing pada kaliren,

GUSTI ngluwari wong sing pada diukum.

₈GUSTI melèké mripaté para wong lamur,

GUSTI jejekké para wong sing ndingkluk,

GUSTI trésna marang para wong adil.

₉GUSTI njaga marang wong mantya,

botyah lola lan randa pada dikuwatké menèh,

nanging dalané wong duraka diénggoké.

₁₀GUSTI kuwi dadi Ratu sak selawasé,

Gusti Allahmu, hé Sion, turun-temurun.

Haléluya!