Masmur 37

Aja nesu awit sangka wong sing nglakoni ala,

aja mèri marang wong sing ala;

₂awit kuwi bakal gelis pada alum kaya suket,

utawa alum kaya tetukulan sing ijuh.

₃Pertyayaa marang GUSTI lan nandangana kabetyikan,

tetepa manggon ing negara lan tumindaka sing setia,

₄lan bungaha awit sangka GUSTI,

dadiné kowé mesti dikèki apa kepénginan atimu.

₅Uripmu dipasrahké marang GUSTI lan pertyayaa marang Panjenengané,

Panjenengané sing bakal tandang.

₆Panjenengané bakal njedulké kebeneranmu kaya pepadang,

lan wewenangmu kaya padangé rina.

₇Kowé menenga ing ngarepé GUSTI lan ngarep-arepa marang GUSTI,

aja nesu awit wong sing kepénak uripé,

lan awit sangka wong sing nglakoni ala.

₈Buwangen nesumu lan tinggalen panasé atimu kuwi,

aja nesu, kuwi mung nekaké penggawé ala.

₉Awit wong mlaku ala mesti bakal dientèkké,

nanging wong sing ngentèn-entèni GUSTI

kuwi bakal pada olèh warisan bumi.

₁₀Awit waktuné mung kari setitik, wong duraka terus bakal entèk;

lan tilas panggonané waé yèn kok gatèkké ya wis ora ana menèh.

₁₁Nanging wong sing andap asor kuwi bakal pada olèh warisan bumi,

lan bakal bungah-bungah awit ngrasakaké katentreman sing gedé.

₁₂Wong duraka ngrantyam pitenah nglawan wong bener,

lan nggeget-nggeget untuné ing ngarepé.

₁₃Nanging diguyu karo Gusti,

awit Gusti ngerti, yèn dinané wong kuwi wis tyedak.

₁₄Wong duraka pada ngelungké pedangé

lan mentèng gandéwané

arep matèni para wong sing sangsara lan mlarat,

lan sing jujur mlakuné.

₁₅Nanging pedangé bakal mbalik lan nyuduk awaké déwé,

gandéwané pada tugel.

₁₆Setitika waé barang duwèké wong bener

kuwi luwih apik tenimbang karo lubèr-lubèré bandané wong duraka.

₁₇Awit tangané wong duraka bakal pada ditugel,

nanging wong bener kuwi dikuwatké karo GUSTI.

₁₈GUSTI ndelok dinané wong sutyi,

warisané bakal tetep ing selawasé;

₁₉ing dina kangèlan ora bakal kewirangan,

lan ing waktu patyeklik ya bakal kewareken.

₂₀Nanging wong duraka mesti bakal pada entèk

lan mungsuhé GUSTI bakal pada entèk kaya apiké suket ing pangonan;

pada entèk, pada entèk kaya kebul.

₂₁Wong duraka utang, nanging ora nyaur,

nanging wong bener kuwi kebak welas lan seneng pawèh.

₂₂Wong sing kaberkahan karo Gusti kuwi pada olèh warisan bumi,

nanging sing kena karo bendu kuwi pada dientèkké.

₂₃Jangkahé wong dikuwatké karo GUSTI,

angger mlakuné wong mau dadi senengé Gusti;

₂₄yèn tiba ora nganti ngglétak,

awit GUSTI nyekel tangané.

₂₅Wiwit aku ijik nom nganti saiki wis tuwa,

aku durung tau weruh wong bener ditégakké,

utawa anak putuné pada njaluk-njaluk pangan;

₂₆saben dina nindakké kawelasan lan ngutangi,

lan anak putuné pada dadi berkah.

₂₇Ngedohana marang sing ala lan nglakonana kabetyikan,

mesti panggonanmu tetep ing sak lawas-lawasé;

₂₈awit GUSTI nrésnani keadilan,

lan ora bakal négakké marang para sing ditrésnani.

Malah pada dirumati selawasé,

nanging para turunané wong duraka pada dientèkké.

₂₉Para wong bener pada olèh warisan bumi

lan tansah manggon ing kono.

₃₀Tutuké wong bener kuwi nggelarké kawityaksanan,

lan ilaté ngutyapké keadilan.

₃₁Angger-anggeré Gusti Allahé ing batiné,

mlakuné ora gloyoran.

₃₂Wong duraka ndingkik wong bener

ngarah patiné;

₃₃nanging ora dipasrahké karo GUSTI ing tangané,

Panjenengané ora bakal meneng waé yèn dèwèké diadili dianggep duraka.

₃₄Pada ngarep-arepa marang GUSTI lan mlakua ing dalané,

mesti kowé terus diangkat supaya olèh warisan bumi,

lan kowé bakal pada weruh para wong duraka ditumpes.

₃₅Aku weruh sakwijiné wong duraka sing gemunggung;

sing mekar kaya wit tyemara ing Libanon.

₃₆Waktu aku liwat, kok wis ora ana;

tak golèki nanging ora ketemu.

₃₇Pada titènana kanggo wong bener lan delengen wong sing temen,

awit wong sing seneng rukun kuwi kahanané bakal nyenengké ing mbésuk mburiné;

₃₈nanging wong mursal pada ditumpes bebarengan,

lan para wong duraka pengarep-arepé mbésuk bakal dientèkké.

₃₉Para wong bener kuwi dipitulungi karo GUSTI;

Panjenengané sing dadi pengayomané ing waktu kangèlan;

₄₀bakal pada ditulungi karo GUSTI lan diluwari,

pada diluwari sangka tangané para wong duraka lan

awit pada nylametké marang Panjenengané.