Masmur 38

₂Duh GUSTI, kula supaya aja nganti diukum sak njeruhné bebendu Panjenengan,

lan kula aja nganti dibanda ing njeruhné panasé-nesuné Panjenengan;

₃awit kula katekan panah Panjenengan,

tangan Panjenengan wis nibani kula.

₄Daging kula ora ana sing waras awit sangka bebendu Panjenengan,

balung kula ora ana sing slamet awit sangka dosa kula;

₅awit kesalahan kula wis nibani marang sirah kula

kabèh kuwi kaya momotan sing liwat aboté lan kabotan kanggo kula.

₆Korèng kula mambu ora énak, ngemu nanah

awit sangka bodo kula.

₇Kula nganti mbungkuk, nganti ndingkluk banget;

sedina muput enggèn kula mlaku karo nganggo salin kasusahan.

₈Bangkèkan kula kebak tatu,

lan daging kula ora ana sing utuh;

₉kula nglumpruk, kentèkan kekuwatan,

kula sambat awit ati kula tratapan.

₁₀Duh Gusti, Panjenengan weruh kabèh kepénginan kula,

lan ora tak delikké sambat kula.

₁₁Ati kula tratapan, kekuwatan kula entèk,

lan mripat kula ilang semloroté.

₁₂Kantya lan kenalan kula pada sumingkir, awit sangka lara kula,

lan sanak sedulur kula pada ngedohi.

₁₃Wong sing ngarah nyawa kula pada masang kala-jiret,

sing ngarepké tyilaka kula pada ngrantyam bakal ngrusak kula,

lan saben dina ngrantyam ngapus.

₁₄Nanging kula kaya wong budek, ora krungu,

lan kaya wong bisu, sing ora mbukak tutuké.

₁₅Malah kaya wong sing ora krungu,

lan tutuké ora bisa mbantahi.

₁₆Nanging Panjenengan sing kula arep-arep, duh GUSTI;

Panjenengan sing bakal nyauri, duh Gusti Allah kula.

₁₇Gagasan kula mengkéné: “Anggeré wong kuwi aja nganti bungah-bungah awit sangka kula,

aja nganti gemunggung yèn sikil kula gloyoran!”

₁₈Awit kula bakal tiba jalaran kesandung,

lan kula tansah diganggu karo lara.

₁₉Nanging kula ngakoni kesalahan kula,

kula melung-melung awit sangka dosa kula.

₂₀Mungsuh kula okèh banget,

lan okèh wong sing sengit marang kula tanpa sebab;

₂₁wongé mbales ala marang kula gantiné sing apik,

pada mungsuhi kula, awit kula nguber marang sing betyik.

₂₂Duh, Gusti Allah kula, GUSTI, supaya aja négakké kula,

aja ngedohi kula.

₂₃Supaya gelis mitulungi kula,

duh Gusti, Juruslamet kula!