Masmur 59

₂Duh Gusti Allah kula, kula supaya Panjenengan owalké sangka mungsuh kula,

Panjenengan supaya gelem mbèntèngi kula marang sing pada nglawan kula.

₃Kula supaya diowalaké sangka wong sing pada nggawé ala,

slametna sangka wong sing pada seneng ngutahké getih.

₄Awit wong kuwi tenan pada nyegat arep njabut nyawa kula,

wong rosa-rosa pada nyerang kula,

nanging kula ora nindakké sing kliru, kula ora dosa, duh GUSTI,

₅kula ora nduwé kesalahan, kok pada mlayu lan arep ngenèng aku.

Panjenengan supaya gelem nekani kula lan gelem weruh!

₆Duh GUSTI, Gusti Allahé sing ngwasani langit lan bumi,

Panjenengan kuwi Gusti Allahé Israèl.

Panjenengan supaya gelem tangi ngekèki paukuman marang para bangsa;

para wong sing pada nandangi ala lan nindakké ngiyanati kuwi aja nganti Panjenengan welasi! Sela

₇Saben mbengi pada mbalik menèh,

pada njegok kaya asu lan ngubengi kuta.

₈Tenan, pada nyemoni karo tutuké;

ngolok-olok manggon ing lambéné,

awit - sapa sing ngrungokké?

₉Nanging wong kuwi pada Panjenengan guyu, duh GUSTI,

kabèh bangsa pada Panjenengan poyoki.

₁₀Duh kekuwatan kula, Panjenengan sing kula gondèli,

awit Gusti Allah dadi kuta bèntèng kula.

₁₁Gusti Allahku bakal metuk aku karo katrésnan-Né;

Gusti Allah bakal ndadèkké aku bisa nyepèlèkké para mungsuhku.

₁₂Supaya aja nganti pada Panjenengan patèni, supaya bangsa kula ora lali,

supaya Panjenengan nggawé pada kelunta-lunta karo pangwasa Panjenengan,

supaya pada Panjenengan ambruké, duh Gusti, tamèng kula.

₁₃Tembungé lambéné kuwi dosané tutuké,

pada kejireta awit sangka sombongé.

Awit ipat-ipat lan goroh sing dityritakké.

₁₄Supaya pada dientèkké karo bebendu, dientèkké

nganti pada entèk-resik,

supaya pada ngerti, yèn Gusti Allah sing ngwasani tyedak turunané Yakub,

nganti teka ing pungkasané bumi. Sela

₁₅Saben wantyi mbengi pada teka menèh,

njegok kaya asu lan ngubengi kuta.

₁₆Pada nglembara nggolèki pangan,

yèn ora warek, terus pada nggereng.

₁₇Nanging kula bakal ngidungké kekuwatan Panjenengan,

ing wantyi ésuk kula bakal surak-surak awit sangka kawelasan Panjenengan;

awit Panjenengan kuwi wis dadi kuta bèntèng kula,

panggonan pangungsèn kula ing njeruhné kangèlan kula.

₁₈Duh karosan kula, Panjenengan bakal kula kidungaké karo kidung masmur;

awit Gusti Allah kuwi dadi kuta bèntèng kula,

Gusti Allah kula sing kebak katrésnan.