Titus 3

₁Wong-wong pada élingna, supaya pada manut marang pemrintah lan para sing nggawa pangwasa, mbangun-turuta lan pada gelem tandang marang kabèh penggawé betyik. ₂Aja pada ora ngajèni, aja pada tukaran, nanging pada sing rukun lan sing alus marang kabèh wong. ₃Awit mauné urip kita ya bodo, wangkot, nasar, dikwasani karo kekarepan èlèk werna-werna lan kesenengané kadonyan, urip ing sak njeruhné sing ala lan nduwé niat èlèk, rusuh, sengit-sengitan. ₄Nanging bareng kabetyikané Gusti Allah, Juruslamet kita, wis kebukak lan katrésnan-Né marang manungsa, ₅ing wantyiné kuwi Panjenengané nylametké kita, ora awit sangka penggawé betyik sing wis kita lakoni, nanging awit sangka kabetyikan-Né. Sangka didusi lair anyar menèh lan dianyarké karo Roh Sutyi. ₆Gusti Allah wis ngesokké Roh Sutyi nganti lubèr marang kita lantaran Yésus Kristus, Juruslamet kita, ₇supaya kita, sing wis dibeneraké karo kawelasan-Né, pada pantes nampa warisan urip langgeng, tyotyok karo pengarep-arep kita. ₈Iki tembung sing bener lan karepku supaya kowé karo yakin luwih ngantepké, supaya wong-wong sing wis pada pertyaya marang Gusti Allah, pada ngupaya karo temen-temen nglakoni penggawé betyik. Kuwi sing apik lan migunani kanggo manungsa. ₉Nanging singkirana bantahan sing ora ana tegesé, perkara keturunan-keturunan, uga padudon lan tukaran bab angger-anggeré Torèt, awit kabèh kuwi ora ana gunané lan tanpa guna. ₁₀Wong sing njalari tyongkrèh, yèn wis kok pituturi pisan, pindo, kuwi adohana. ₁₁Kowé mengertèni, yèn wong sing kaya mengkono kuwi nyasar tenan lan ngukum dèkné déwé karo dosané.

₁₂Sakwisé aku kongkonan Artèmas utawa Tikikus mréné nemoni kowé, ngupayaa bisané kowé nemoni aku ing Nikapolis, awit wis tak niyati arep manggon ing kono sak suwéné waktu bediding iki. ₁₃Sénas juru Torèt lan Apolos, pada tulungana sak tyukupé, supaya mlakuné aja nganti kekurangan siji apa waé. ₁₄Lan wong-wong kita wis bèn ta pada sinau nglakoni penggawéan sing migunani, supaya bisa nyukupi kebutuhané urip sing bakuh, supaya uripé aja nganti tanpa guna.

₁₅Wong kabèh sing bebarengan karo aku pada kirim slamet. Salamku marang wong-wong sing pada trésna marang kita sak njeruhné pertyaya.

Kawelasan supaya nunggal ing kowé kabèh!