Séfanya 3

₁Tyilaka si tukang mbruntak lan sing nandangi sing njijiki, hé, kuta sing kebak panindesan, ₂sing ora gelem ngrungokké tembungé sapa waé, lan ora perduli marang pawelèh, ora pertyaya marang GUSTI lan ora ngadep marang Gusti Allah. ₃Para penggedé ing sak tengahé kuwi singa sing nggeruh; para rèkteré kuwi asu alasan ing wayah mbengi, sing ora ngèngèhké apa-apa tekan ésuké. ₄Para nabiné pada umuk-umukan lan goroh, para imamé pada najisaké apa sing sutyi, nerak marang angger-anggeré Torèt. ₅Nanging GUSTI kuwi adil ing sak tengahé, ora nyia-nyia, saben ésuk ngekèkké pernatané, ora tau telat ing wayah ésuk wétan. Nanging wong sing tukang nyia-nyia kuwi ora nduwé isin. ₆“Aku wis ngentèkké para bangsa, menara-menara témbok wis pada gempuran; dalan-dalané wis Tak rusak, nganti ora ana wong sing liwat. Kuta-kutané wis dibungkar, nganti ora ana wong sing ngenggoni, suwung kabèh. ₇Tak kira: Mesti saiki bakal wedi marang Aku, lan nggatèkké marang pawelèh-Ku lan sak kabèhé kuwajipané sangka Aku ora bakal dilalèkké. Nanging malah mundak nemen enggoné nerusaké kabèh pokalé sing ala. ₈Mulané kowé pada ngentènana Aku, mengkono tembungé GUSTI, ing dina kuwi Aku gelem teka ngrampas. Awit putusan-Ku kuwi nglumpukké para bangsa lan nglumpukké kraton-kraton, sing terus Tak esoki nesu-Ku, ya kuwi bebendu-Ku kabèh sing mulat-mulat, awit sak lumahé bumi bakal dipangan karo geniné jalusu-Ku.”

₉“Nanging sakwisé kuwi para bangsa bakal Tak wènèhi lambé liyané, ya kuwi lambé sing resik, supaya kabèh pada nyebut asmané GUSTI, lan pada ngabekti marang Panjenengané karo rukun. ₁₀Sangka sabrangé kali-kali ing negara Etiopia, wong sing pada nyembah Aku, sing wis dibuyaraké, bakal pada nggawa pisungsung kanggo Aku. ₁₁Ing dina kuwi kowé ora bakal ngalami kewirangan, awit sangka sak kabèhé pokal-gawému sing duraka marang Aku; awit ing dina kuwi Aku bakal nyingkirké sangka tengahmu wong-wongmu sing pada seneng umuk-umukan, lan kowé bakal ora ngluhurké uripmu déwé menèh ing gunung-Ku sing sutyi. ₁₂Lan ing tengahmu Aku ninggalaké umat sing andap asor lan ringkih, lan sing bakal golèk pengayoman ing asmané GUSTI, ₁₃ya kuwi turahé Israèl kuwi. Kuwi bakal ora pada nandangi sing ala lan ora ngutyapké goroh, lan ing tutuké ora ketemu ilat sing goroh; awit bakal pada kaya wedus gèmbèl sing nyenggut suket lan njerum, lan ora ana sing nggawé kagèté.” ₁₄Hé putri Sion, pada surak-suraka! Hé Israèl, pada surak-suraka! Hé putri Yérusalèm, pada bungah-bungaha lan surak-suraka karo sak kabèhé ati. ₁₅GUSTI wis nyingkirké paukuman marang kowé, wis ngentèkké mungsuhmu. Ratuné Israèl, ya kuwi GUSTI, kuwi ing tengahmu, kowé ora bakal wedi marang kasangsaran menèh.

₁₆Ing dina kuwi bakal ana tembung-tembung sing tumuju marang Yérusalèm: “Hé Sion, aja wedi! Tanganmu aja nganti kendo. ₁₇GUSTI, Gusti Allahmu ing tengahmu, bakal ngadek dadi Pahlawan sing ngekèki kemenangan; banget senengé ing ati-Né awit sangka kowé. Panjenengané nganyaraké kowé awit kawelasané, karo surak-surak enggoné pada bungah awit kowé, ₁₈kaya ing dina kumpulan gedé.” “Aku bakal nyingkirké kasangsaran sangka kowé, terus kowé ora bakal ngalami disepèlèkké menèh, kaya sing wis tau dadi momotanmu. ₁₉Lan ing waktu kuwi Aku bakal tandang marang wong kabèh sing wis nindes kowé; nanging nylametaké sing pada pintyang, lan nglumpukké sing pada pating slebar, lan sak pira sing kewirangan bakal Tak dadèkké lem-leman lan kesuwur ing sak lumahé bumi. ₂₀Ing waktu kuwi kowé bakal Tak tuntun mulih, ya Tak klumpukké lan Tak dadèkké kesuwur lan lem-leman ing sak tengahé sak kabèhé bangsa ing sak lumahé bumi, lan kahananmu bakal Tak balèkké ing ngarepé wong-wong kuwi,” mengkono tembungé GUSTI.