1 Corinthians 16

₁Masa uchi pùlayatta Katù ponalok kon kappon yamùk pùikattàtoppe tanùnsen pàk uselupai'che. Unekamappù Galatia pon sochi yamùk pàk ikuttàk kon. ₂Wapiyalok wei Suntayaka yau, tamù'nawolon kon amyamlo uya màlà àpùlayatayi kon tonpa nonka enepoloppù kon yapai. Molopai mùmainanpatàik, pùlayatta pilipù tukaik uyàssak yau. ₃Molopai welepansak yau, ananùmùppù kon kàyik yamùk yemyak kaleta unmenukappù tùlù uya màlà molopai tok yeunoko uya Jerusalem pona lepantok auya'nokon pokonpe. ₄Wakù pe nàlà utà wechi yau, tok utàichi màlà uya'là.

₅Uyàpù màlà apyakù'nokon Macedonia yawà utà tùpo, masapùla utà sàlà Macedonia yawà. ₆Malalà uko'mamù eppaino apyau'nokon, wapùla iko pe iwettok yawàlà apyau'nokon wechi. Molopai upùikattà kon pa uye'ma tawàlà, i'nailàlà utàtok yau. ₇Utà pe neken nà asse'ne eyenpai'nokon pùla wessaik. Tachinpe lùiwa nen uko'mamù apyau'nokon pàk enpen wessaik, Itepulu Jesus yeselu pe iwechi yau.

₈Tùse Ephesus po wechi màlà Pentecost yattai uta'lettàntok ponalà. ₉Masapùla eke manatta utakkokasak man wotoko kuttoppe uya talà, tùse tukke uwakkà'nàinan man.

₁₀Timothy uyàssak apyakù'nokon yau, manùntàik ichenalippa tukaik àkklottakù'nokon, masapùla iwe'wotokoma màlà nai'nùk ukasa làma Itepulu Jesus ponaloppe. ₁₁Mùnamatàik. Meunottàik ite'ma tawà wakù pe tùwanmùlà, iwennappotoppe upyak. Masapùla iwennappo pàk enpen wessaik tùulon kon tonpa wannà yamùk pokonpe.

₁₂Apollos utàtoppe apyakù'nokon tekamappotai, molopai imeluntàpappù uya akakklanpa tok kon pe ya tùulon kon tonpa wannà yamùk pokonpe, tùse iità yeselùkek pùla man sàlà pe. Tùutàtok yattai yeposak tùuya yau iità màlà.

₁₃Elanneppe ettàk kon, ailon tetok yau meluntà pe ettàk kon, katamatàu, tùusenalippaik pùla ettàk kon. ₁₄Tamù'nawolon ikuttàk kon uchi'nùnmantok yau.

₁₅Mùttuyataik Stephanas molopai itùwùk tawon kon wechi wapiyalok kon iwepùikattàsak kon pe Christ yau Achaia po. Molopai tok wettùsak màlà tùyiwalà'nokon Katù ponalok kon kappon yamùk ponaloppe tùwe'wotokomatok kon yak. ₁₆Apawanattàyatàu Iulà utonpa yamùk, pùsamlo yekkwa yo'no mettàik molopai ànù'là tùwe'wotokomasan tok pokonpe yo'no.

₁₇Utauchinpatai kulu Stephanas, Fortunatus molopai Achaicus tawonnan uyàpù pàk, apatappù kon yau tok uya upùikattàsak pàk. ₁₈Molopai tok uya uyauchinpasak man, ayauchinpappù kon tok uya kasa làma. Pùsamlo yekkwa kàyik yamùk mùkyamlo tapulàsan.

₁₉Katù ponalok kon kappon yamùk Asia yawolon kon “Wakù pe na' messatàu?” tetok tùuya'nokon yeunossan. Pùsamlo mùkyamlo Aquila molopai Priscilla molopai tùulon kon sochi towon kon tùwepilichan tok yùwùk tau nàlà wa nùkayan. ₂₀Tamù'nawàlà talonkonnà tonpawannà yamùk “Wakù pe na' messatàu?” tetok tùuya'nokon yeunossan. Itepulu yesek yau uchi tùutauchinpaik messepotàik àtonpa kon pokonpe Katù ponalok kon nùkupù kasa.

₂₁Uyemyatù ke sàlà tùmenukayaik nùkayan Iula, Paul.

₂₂Ànù'là Itepulu pùnùnmanài pen tàwà pa'nù'nàtok ipo nechii. Maranatha. Àikà Itepulu!

₂₃Tàwà wakù pe we'nàtok Itepulu Jesus winàpaino apyau'nokon nechii.

₂₄À'nùnmatok kon uya teunossaik tamù'nawolon kon Christ Jesus yau nai'nannùk piyak. Amen.