1 Corinthians 6

₁Àusàulàmasak kon pe' àtonpa kon ailon tawon pokonpe yau, yanàinan na' amyamlo àli ton kappon yamùk yemloto pona kottù pàk? Wapùla ka' Katù ponalok kon piyak yanàinan amyamlo lù? ₂Katù ponalok kon uya ken na' sàlà wolù kottùmatok woton ittu auya'nokon pùla nai? Màlà kasaichi iwechi pàk, sàlà wolù yawon kon kottùma auya'nokon pe iwechi pàk, malalon yà'làlà kottùmanài yeppe pùla ken na' ewechi kon màlà? ₃Inchelù yamùk kottùma pe ken na' iwechi ittu auya'nokon pùla nai? Yà'là kasa nen uchi sàlà wema'nàtok yau nai'nannùk! ₄Yà'là pe ken iwechipàk àusàlàmatok kon sàlà yamùk pàk yanài nan amyamlo, sochi tawon kon nùttu wakù pe iteselu pen ton piyak kottù pàk? ₅Wate uya sàlà àkuli'ma kon pe. Ànù'là ken na' uchi pukkeppe tùwessen pùla nai àkklottau'nokon, usàulàmantok ailon tawonnan kùlottau kottùma woton. ₆Tùse nen uchi tewinannà utà màlà law yekalepàk tùulon kottùmatoppe, molopai ailon tawonnan pen yemloto pona.

₇Tamù'nawà mà ewe'lachimakassak kon màlà tà àtonpa kon yasak auya'nokon kottù pàk yau. Wakù peiwa iwechi màlà ikasa pùla ewinàkàik iwessak molopai alapumasak yau. ₈Tùse amyamlo pe lànen tùulon kon mùlapumayatàik molopai àli pe tok kupù auya'nokon, molopai mùkkyamlo ailon tawonnan winàkàik nàlà là wa ewechi kon. ₉Ittuichi auya'nokon pùla nai àli ton uya Katù wettok itepulu pe patassek yepolo pe pùla iwechi? Kesenkuttàtàu uchi. Imakuyippù pe tùwessen tesak ke, wapùla ailon pen katù yemloto po tùwepeimasan, wapùla tùulon noppù pokonpe tùwessan, wapùla tùwalai pokonpe àli ku'nàinan, kàyik pokonpe tùwessen kàyik, ₁₀wapùla amak pe tùwessan, wapùla tùuseka'nonkasan, wapulà tùwetùnsan, wapùla tùulon kon pàk tùuselupasan àli pe, wapùla lapumannan uya Katù wettok itepulu pe yepolo pen màlà. ₁₁Molopai tùulon kon amyamlo wechippù màlà wa. Tùse àkukasak kon màlà, àtùsak kon màlà Katù yemyak. Ikasa ayanùnsak kon màlà Katù pokonpe Kùyepulu kon Jesus Christ yesek yai molopai kùkatùyi winàpaino Wakù Akkwalù winà.

₁₂“Tamù'nawolon wechi màlà unkupù yeppe là” tùse tamù'nawolon wechi pùikattànài pe pen màlà. “Tamù'nawolon wechi unkupù yeppe là” tuse yà'làlà uya tapyoto pe ukuttoppe ikupù uya pen màlà. ₁₃“Kùyali màlà lotta ponalok molopai lotta kùyali ponalok”, tùse Katù nùmattanùppù ton màlà asakklàma. Esak wannà màlà àli imakuyippù ponalok pen tùse Itepulu ponalok, molopai Itepulu esak wannà ponalok. ₁₄Tùmeluntàlù winà Katù uya Itepulu wuluukappù màlà weli'nàtok yapai, molopai kùwuluuka kon ya nàlà màlà.

₁₅Ittuichi auya'nokon pùla nai Christ pùkkù pe eyesak kon yamùk wechi? Christ pùkkù yamùk na' mokka uya màlà molopai kàyik yamùk yemyak tùwechilanmasen nossan pùkkù pe ima uya? Kane. Iwekkupù pen! ₁₆Ittuichi auya'nokon pùla nai, mùkkàlà, kàyik yamùk yemyak tùwechilanmasen nossan pùkkù pe nenayai'nùk wechi tesak kon yau tewin ipokonpe? Katù Maimu uya, “Asa'lon kon wena màlà tewin ipun.” te kasa. {Gen 2.4} ₁₇Tùse mùkkàlà Itepulu pùkkù pe nenayai'nùk wechi màlà tewin ipokonpe akkwalù yau.

₁₈Imakuyippù pe esak ke we'nàtok winàpai epetàk kon. Tamù'nawàlà tùulon kon yamùk àli ton wechi màlà tesak ke pùla kappon nùkupù pe, tùse imakuyippù pe nelaikayai'nùk wemakuima màlà tùpun winàkàik. ₁₉Ittuichi auya'nokon pùla nai àpun kon wechi Wakù Akkwalù yùwùk pe, nemassai'nùk ayau'nokon, Katù winà enepoloppù kon? Àponalok kon pen amyamlo. ₂₀Ye'masak kon amyamlo epekkeppe. Màlàpàk uchi àpun kon ke Katù inamatàk kon.