1 Thessalonians 1

₁Sàlà màlà Paul, Silas, molopai Timothy tawonnan winàpaino. Kappon yamùk Thessalonica pon sochi tawon kon Katù Kùkàipùnù molopai Itepulu Christ Jesus ponalok kon piyak imenukasak:

Tàwà wakù pe Katù wettok molopai echitonpa pe we'nàtok iwinàpaino àponalok kon pe nechii.

₂Tenki tawonnan ina tàwàlà Katù pàk ina wàpùlema yau, eyekama kon pe. ₃Masapùla ina nùttuyan, Katù Kùkàipùnù kon yemloto po ailon tetok auya'nokon yai ewe'wotokoma kon sa’man pe uchi'nùnmantok ke. Molopai enpen ewettok kon Kùyepulu Jesus Christ pàk wechi melùntà pe ittuyan ina. ₄Ina tonpa yamùk, ina nùttuyan, Katù uya à'nùnma kon molopai ayanùnsak kon ya tùponalok kon pe. ₅Masapùla Wakù Itekale nepùppù ina uya màlà apyakù'nokon, imaimuppù lùppù pe neken nà pùla. Tùse tùmeluntàlù ke Wakù Akkwalù pokonpe nàlà molopai tamù'nawàlà eyewan yelupatok ya ikasa pokonpe. Mùttuyatàik ina wemapùppù apyau'nokon tùwechi kon yau àponalok kon pe. ₆Ina yeselu molopai Itepulu Jesus yeselu kasa ewelaikasak kon màlà. Ina wemapù kasa ewemapù kon ke, eke pe ewettalumattài'ma'nokon, Wakù Itekale manùntantàu tùutauchinpaik, Wakù Akkwalù winàpai iyàssak lùppù. ₇Màlàpàk ailon tawonnan Jesus pàk Macedonia molopai Achaia pon kon uya yentok ipàkàlà pe menatantàu. ₈Masapùla Itepulu yekale utàsak man mailàlà ewinà'nokon Macedonia molopai Achaia yau neken pùla, tùse ailon tetok auya'nokon Katù pàk yekale utàppù man mailàlà. Yà'làlà àpàkù'nokon ina nekama woton pùla man. ₉Akakklanpasak kon ina uya yattaino lùppù pàk tamù'nawàlà kappon yamùk tùuselupasan tùutauchinpaik, ina yanùmùppù auya'nokon pàk. Molopai tùutauchinpaik ewelattàsak kon ailon pen katù winàpai ailon molopai tàwàlàlà tùwemassen Katù winàkàik itapyoto pe pàk tùuselupasan mùkyamlo. ₁₀Molopai Imu, Jesus Christ uyàpù epùn poi màmuku kon pàk ewechi kon, inwuluukappù lùppù weli'nàtok yapai, molopai pùikattànài Katù we'naikatok tùuyàpù woton winàpai pàk tùuselupasan.