1 Thessalonians 3

₁Molopai nen uchi ipàlika ina uya yentai iwechi yau ina usenumenkappù pata Athens motau tùwemattok kon pe tùmàlà'nokon pe neken, tewincha. ₂Ina uya Timothy yeunokoppù apyakù'nokon, ina tonpa molopai Katù poitolù molopai Wakù Christ yekale yekamanài. Ina neunottai emeluntàlùttàtok kon pe ya molopai ailon tetok auya'nokon pùikattàtoppe ya, ₃Sàlà yamùk talumattàntok pe nai’nùk winà ewennappo kon tukaik. Ittu auya’nokon màlà màlà yekkwa ton wettalumattàntok wechi molo Katù yeselu pùkkù pe kùponalok kon pe. ₄Masapùla apyau'nokon ina wechi yattai ina uya yekamappù iwekkuppù wapiya, ‘Talumattàn màichi tà,’ teppù ku ina uya, molopai mùttuyatàik wateppù ina uya yawàlà iwekkussak tùppleiche pùla. ₅Màlàpàk, màlà yentak ipàlika uya yentai iwechipàk Timothy teunottai, ailon tetok auya'nokon wechi atta là yense. Yattai pùla Makui uya eyittusak kon tei'ma, molopai tamù'nawàlà ina wotokoyi wechi yà'là woton pe pùla là pe tei'ma

₆Tùse sàlà pe Timothy wennapposak man ina piyak apyapai'nokon molopai wakù pe ailon tetok auya'nokon yekale nessak ya man, molopai tùuchi'nùnmaik ewettok kon yekale. Wakù pe eusenumenkatok kon wechi ina winàkàik yekamatai ina pàk molopai ina enenpai ewettok kon, ina wettok eyenpai'nokon kasa làma kulu. ₇Màlàpàk tamù'nawàlà ina wettalumattàtok yau ina umeluntàtasak man wakù pe eyekale kon tetase, ina tonpa yamùk. Ailon tetok auya'nokon màlà ina yauchinpanài ina yewan meluntàpanài. ₈Màlàpàk nen uchi ina wemapù kulu sàlà, meluntà pe ewemattok kon wechi Itepulu yau pàk. ₉Màlàpàk nen uchi, Tenki, te ina uya sàlà Katù pàk eyekale kon winà. Àpàkànsau’nokon, ina utauchinpa sàlà Katù ina Yepulu yemloto po. ₁₀Wei kaichalà molopai ewalupà kaichalà tamù’nawàlà tewan kon ke tùwàpùlemasan ina, tùmàlà'nokon pe nàlà ina uya eyentok kon pe molopai yà'làlà iche ewettok kon ailon tetok auya'nokon yau tùtoppe ina uya.

₁₁Masaichi tàwà kùkatùyi kon, Kùkàipùnù kon tùmàlà pe molopai Kùyepulu kon Jesus asanta konekai ina uyàttoppe apyakù'nokon. ₁₂Tàwà Itepulu àtonpa kon pùnùnmatok auya'nokon molopai tamù'nawolon kon pùnùnmatok auya'nokon konekai ichemokkatoppe eke pe molopai eke peiwa molopai tàwà eke pe ina uya à'nùnmatok kon kasa kulu nenai . ₁₃Sàlà kasa eyewan kon koneka ya màlà meluntà pe, wakù pe, Katù namanài pe, esuken ewechi kon màlà Kùkatùyi kon molopai Kùkàipùnù kon yemloto po, Kùyepulu kon Jesus uyàpù tamù'nawolon kon tùponalok kon pokonpe yau.