2 Corinthians 5

₁Masapùla ittu'nokon man sàlà tapùi itau wema'nà'nokon nai'nùk, kùyesak kon non po nai'nùk yalakkasak yau, Katù winàpaino tapùi tàwàlàlà tùwemassen epùn pon yesappe we'nà'nokon màlà, kappon yemyatù nùkonekappù pen. ₂Sàlà motau wa'nùnnà'nokon man, pontàn nokon iche kulu kùyùwùk kon epùn pon ke. ₃Masapùla wepontànsak kù'nokon yau, ipon pùla kùyepolo kon pen màlà. ₄Sàlà non pon tapùi tau lùppù wema'nà'nokon yau ta'nùnsan kùmyamlo tùusewankono'màik, kùyesak kon sàlà non pon enenu'mapai we'nà pàk pùla, tùse epùn pon ke kùponta kon iche we'nà'nokon pàk, tùukàtasen pe nai'nùk yeuno'ma toppe tàwàlàlà wema'nàtok winà. ₅Katù uchi mùkkàlà kùkonekanàippù sàlà wemyakanmantok ponaloppe, molopai kùlepasak kon ya Akkwalù tùwinàpaino ke tamù'nawolon itesappe tùwettok lepantok tùuya kùponalok kon yentok ipàkàlà pe.

₆Màlàpàk uchi tàwàlà meluntà pe, tùwettalipaik pùla tùwessan kùmyamlo. Ittu'nokon man talà kùyesak kon yau we'nà'nokon yau, Itepulu patassek winàpai we'nà'nokon. ₇Masapùla wema'nà'nokon sàlà ailon tetok winà, yentok winà pùla. ₈Meluntà pe molopai tùwettalipasan pe pùla we'nà'nokon man, molopai sàlà kùyesak kon nàntok pàk tùse kùpata kon po Itepulu piyau kulu eppai we'nà'tokkon pàk. ₉Màlàpàk uchi kùnkupù kon kuppai'nokon kulu man yauchinpa pe, sàlà motawon kùpata kon yau wapùla epùn po là Itepulu pokonpe we'nà yau. ₁₀Masapùla tamù'nawolon kon kùmyamlo usenpoika màlà Christ uya ittuntok patassek yemloto pona, tamù'nawolon kon uya tùnepolo kon yepotoppe, wakù wapùla àli, sàlà non po tùwemapù kon yau tok nùkupùppù yawàlà.

₁₁Ina nùttuyan yà'là pe usenalipantok Katù pàk wechi, màlàpàk ina uya itekale yekama sàlà kappon yamùk pàk ailon te toppe tok uya. Katù mùkkàlà ina ittunài tamù'nawàlà, molopai enpen wessaik eyewan kon yau uyittu auya'nokon pàk nàlà. ₁₂Tùpàkù'nokon tu'ma tùuselupaiche ina wechi pen sàlà àpàkù'nokon. Tùse làkku ina wechi elepaiche'nokon ina yapulà kon pa molopai mùkyamlo kappon usentok pàk tùutapulàsan molopai iteselu yau nai'nùk pen pàk ekamapopà'nàinan yeiku kon pa. ₁₃Itayaupasak kon pe kulu ina wechi yau Katù yapulà toppe iwechi màlà. Wapùla ittayaupasak pe pùla ina wechi yau àpàkànsau'nokon wa iwechi màlà. ₁₄Masapùla yà'là yekwa là ina nùkupù wechi màlà Christ uya pùnùnmantok pe, tewinan kappon welikùppù tamù'nawolon kon kappon yamùk ponaloppe ittu'nokon pàk, tamù'nawolon kon wechi iwelittok pùkkù pe màlà te ya pe iwechi màlà. ₁₅Tamù'nawolon kon ponaloppe iwelikùppù màlà mùkyamlo tùwemassan wemapù tùponalà'nokon pe tukaik, tùse mùkkàlà iwelichak lùppù molopai iwuluukasak lùppù tùpàkànsau neken ponaloppe.

₁₆Màlàpàk sàlà motapai kappon nùttutok yawà ànù'là ittunài pen ina. Pena lànen Christ ittupù ina uya kappon uya ituntok yawà. Màlà ku'nài nan pen nen uchi ina. ₁₇Ànù'là wechi Christ ponaloppe yau emennappe iwechi màlà, tamù'nawàlà penalok utàppù màlà, emennak uyàssak màlà. ₁₈Sàlà màlà tamù'nawolon iwekkusak lùppù Katù winà, mùkkàlà Christ yai kùmyakanmanàippù teyatonnon pe we'nàtok yapai tùwechiyakonnon pe, molopai ina wotokoyittàppù ya tùulon kon konekatoppe nàlà ina uya tùwechiyakonnon pe. ₁₉Màlàichi Katù uya tamù'nawolon kon kappon yamùk ma tùwechiyakonnon pe Christ yai, tok makuyi pàk tùusenumenkasen pen tok winàkàik. Molopai ina lepasak ya tok ma tùuya tùwechiyakonnon pe yekale ke.

₂₀Màlàpàk uchi Christ ponaloppe tùuselupa kon pàk ina man, Katù uya apawanattà kon ina yai kasa. Christ pàkànsau apawanatà kon ina uya sàlà, tàwà Katù amyakanmatàu tùwechiyakonnon pe! ₂₁Mùkkàlà imakuyi pùn kupùppù Katù uya màlà kùmakuyi kon yepeppe tùtùsen pe. Iwinà nen uchi Katù wettok ikasa pùkkù pe we'nàtok kon pe.