2 Thessalonians 1

₁Sàlà màlà Paul, Silas molopai Timothy tawonnan winàpaino, kappon yamùk Thessalonica pon kon sochi tawon kon, Katù Kùkàipùnù kon molopai Itepulu Jesus Christ ponalok kon piyak imenukasak.

₂Tàwà Katù, Kùkàipùnù kon molopai Itepulu Jesus Christ elepai'nokon wakù pe we'nàtok molopai echitonpa pe we'nàtok ke.

₃Tenki te kulu sàlà ina uya Katù pàk àpàkànsau'nokon tàwàlà, utonpa yamùk! Sàlà wechi màlà ikasa, masapùla ailon tetok auya'nokon Christ pàk yawàlà ewettok kon nenayan meluntà pe, molopai eke pe, molopai euchi'nùnmatok kon nenayan tense eke peiwa. ₄Màlà kasaichi iwechipàk ayapulà kon pe ina tùuselupasan àpàkù'nokon Katù sochiyi yamùk tau, ailon tetok auya'nokon yau tamù'nawolon nà ewettalumattàtok kon yau molopai màlà yamùk yawà mùtàyatài'nùk pàlika pàk ewechi kon pàk.

₅Sàlàichi màlà ikasa Katù uya ittuntok wechi yekamanài. Itepeppù màlà, àkoneka kon ya wakù pe itepulu pe tùwettok yau tùwessan pe ewechi kon pa, màlà iponaloppe mettalumattàyatài'nùk. ₆Masapùla Katù uya iwalai kupù màlà, wettalumattàntok nepù ya màlà mùkyamlo atalumattàn nan nokon pona. _7-8Molopai ewettalumattàtok kon yapai ewepùikattàtok kon ke elepa kon ya màlà, molopai ina lepa ya nàlà màlà. Sàlà kupù ya màlà Itepulu Jesus usenpoika epùn poi yau. Iyàpù màlà apok ulenpansak yau meluntà ton inchelù yamùk pokonpe, Katù ittunan pen talumattàik, molopai mùkyamlo Wakù Itekale Kùyepulu kon Jesus maimu yawolon kon pen talumattàik. ₉Tok wettalumattà màlà tàwàlàlà, Itepulu Katù yemloto poi tok wepantakasappe iwechi màlà molopai eke kulu imeluntàlù winàpai. ₁₀Iyàpùichi màlà, màlà Wei yattai apulàntok yanùnse tamù'nawàlà esukenan kon winàpai. Tamù'nawolon kon ailon tawonnan nùssan tùpàk winàpai tapulàtok molopai tùnamatok yanùnse. Amyamlo nàlà wechi màlà tok kùlottau, masapùla ailon tesak auya'nokon pàk, Wakù Itekale ina nekamappù pàk.

₁₁Sàlà kasaichi tùusenumenkaik tàwàlà àpona'nokon ina tùwàpùlemasan. Katù uya àkà'mappù kon yak lùppù yawà tùwemassan pe ewechi kon pa. Tàwà tùmeluntàlù yai, wakù ànkupù pe tùwessen kupùik molopai àpùikattài ailon tetok auya yawà ewelaika pa. ₁₂Sàlà kasa tùwàpùlemasan ina Itepulu Jesus yesek yapulàtok usentoppe ayau'nokon, molopai ayapulàtok kon yepolokonpa iwinàpai, wakù pe we'nàtok kùkatùyi molopai Itepulu Jesus Christ winàpaino winà.