2 Timothy 1

₁Sàlà kaleta màlà Paul winàpaino, Christ Jesus neunokoppù. Katù uya uyanùmùppù màlà yeunossak pe molopai wema'nàtok itùlù tùuya teppù luppù ke ulepasak Christ Jesus ponaloppe we'nà'nokon yau,

₂Timothy, u'nùn umu piyak unmenukappù.

Tàwà Katù Kùkàipùnù molopai Christ Jesus Kùyepulu elepai wakù pe we'nàtok, usentupantok, molopai echitonpa pe we'nàtok.

₃Tenki ukayaik Katù pàk, yapulù pe we'wotokoma pàk tùwanmùla echii'ma esuken, utamo yamùk we'wotokomappù kasa. Tenki tawon Iulà eyittu uya tàwàlà wàpùlema yau, ewalupàttau molopai wei nai. ₄Eusenwankono'ma yenu palu wekkwamù yeneppù uya tùttuse eyenpai kulu wessaik, utauchinpa toppe kulu. ₅Ailon kulu ailon tetok auya ittunài Iulà, màlà ailon tetok ànok Lois molopai asan Eunice uya yekkwa. Tùttuyaik kulu itesak pe nàlà ewechi. ₆Sàlà kasa ichi iwechi pàk eyenuyapyontà uya màlà lepantok Katù nùtùlùppù eyemyak uyemyatù nonkasak uya àpona yau kupù pa nulà. ₇Masapùla Wakù Akkwalù Katù uya lepansak kù'nokon ike nai'nùk mùkkàlà tùwettalipasen pe ku'nài pen; tùse kùyanùkkanài mùkkàlà meluntà ke, uchi'nùnmantok ke molopai wakù pe ewemapù pa àku'nài màlà.

₈Kekkuli'mai uchi, yekama pàk Kùyepulu Jesus ponaloppe; wapùla upàk kekkuli'mai yachisappe wechi iponaloppe wenai. Tùse làkku, ewettalumattàtok yanùnkà Wakù Itekale ponaloppe, Katù uya elepa meluntà ke kaichalà. ₉Kùpùikattànsak ya màlà molopai kùkà'masak ya esuken we'nàtoppe, yà'làlà kussak kùuya'nokon pàkànsau pùla, tùse iche tùwettok yawà molopai wakù pe tùwettok pàkànsau. Sàlà wakù pe tùwettok tùlùppù ya màlà kùpya'nokon Christ Jesus yau, sàlà pata weyu wepyatàtok wapiya. ₁₀Tùse sàlà pe yenpoikasak man kùpàkù'nokon Kùpùikattànài Christ Jesus usenpoika winà. Masapùla Christ uya weli'nàtok meluntàlù yentaikasak molopai yenuka'nùssak pàk, molopai Wakù Itekale yai tàwàlàlà wema'nàtok yakkwayi yenpoikasak ya man.

₁₁Katù uya uyanùnsak man Wakù Itekale yekama toppe uya yeunossak molopai enupanài kasa, ₁₂molopai sàlà yamùk pàkànsau uchi màlà wettalumatàppù. Tùse wekuli'ma pùla man ipàk, masapùla mùkkàlà ailon teppù uya lùppù ipàk ittu uya pàk, molopai tùttuyaik kulu màlà untùlùssan lùppù itemyak kupù ya màlà Wei Ittuntok yattai ponalà. ₁₃Ailon mayin eyenupatai nùk Iulà yentok ipàkàlà pe ewettok pe imainampakà, molopai ailon tetok yau ekkà molopai uchi'nùnmantok yau ekkà kùmàlà pe nai'nùk Christ Jesus ponolak kon pe we'nà yau. ₁₄Wakù ton apanamassan lùppù ike mùttuik, mùmainampaik Wakù Akkwalù kùyau tùwemassen meluntàlù yai.

₁₅Mùttuyaik tamù'nawolon kon Asia yawolon kon uya unonkasak, Phygelus molopai Hermogenes nàlà. ₁₆Tàwà Itepulu Jesus usentupantok yenpoikai Onesiphorus yùwùk tawon kon pàk, masapùla umeluntàpasak ya pàk echipalà. Iwekuli'mappù pen yachichak pe wechi pàk, ₁₇tùse asse'ne Rome pona tùwelepansak pe uyiwappù ya kulu uyepolo tùuya ponalà. ₁₈Tàwà Itepulu Jesus nùkupùi usentupantok yepottoppe ya Itepulu winàpai màlà Wei yattai! Molopai mùttuyaik wakù pe yà'là yawàlàlà upùikattàpàtùppù ya Ephesus po.