Yeunossak kon Wotokoyi 14

₁Iconium po, Paul molopai Barnabas tawonnan utàppù màlà Jew yamùk wepilittok itak tak. Molopai tok uselupappù wakù pe. Màlàyau tukke Jew yamùk molopai Jew yamùk pen wenappù ailon tawonnan pe Jesus pàk. ₂Tùse Jew yamùk ailon tawonnan pen uya Jew yamùk pen yaimelunpappù, tok usenumenkatoppe àli pe ailon tawonnan winàkàik. ₃Paul molopai Barnabas wechippù màlà molo tachin pe. Tok uselupappù tùusenalippaik pùla Itepulu pàk. Mùkkàlà uya ailon pe tok yekale wechi, Katù wettok wakù pe pàk yekama pe apàikkek ke tok lepappù, yensak pùla nai'nùk enumenkanài yamùk, kuttoppe tok uya. ₄Kappon yamùk màlà pata yawon kon wepantakasak wechippù màlà; tùulon kon wechippù Jew yamùk winà, molopai tùulon kon wechippù yeunossak kon winà.

₅Màlàyau Jew yamùk pen molopai Jew yamùk tawonnan, tamùkke tepulu kon pokonpe, tok wekkupùppù yeunossak kon talumattà pàk molopai tok wànà pàk tàk ke. ₆Yetasak tùuya'nokon yau tok wepeppù Lystra molopai Derbe pona, pata yamùk Lycaonia pon, molopai iwoino kon pata yak. ₇Molo tok uya Wakù Itekale yekamappù.

₈Molo iwechippù màlà kàyik chichiu pe Lystra po tùusasen pen tùtta yapulànài pen tùwentuppù motapai. ₉Molo Paul uselupa yeta pàk iwechippù. Paul uya tùuchipittà pàk ailon te ya yeneppù, màlàpàk itenupàkà iwechippù. ₁₀Màlàpàk, “À'mùssakkakà satippe atta po!” teppù ya ipàk eke pe. Kàyik usanùmùppù, molopai iwessa'molùkappù tùusalà pàk. ₁₁Paul nùkupùppù yensak tùuya'nokon yau tukkan kon kappon yamùk wepyattàppù tùwentaimepàtù kon pàk tùmaimu kon Lycaonian maimu yau, “Katù yamùk wenasak man kàyik yamùk kasa, molopai tok uttàsak man kùpyakù'nokon!” tukaik. ₁₂Tok uya Barnabas yesettàppù Zeus pe molopai Paul yesek Hermes pe masapùla mùkkàlà wechippù tùuselupasen pe. ₁₃Katù Zeus nama molopai yapulà yùwùk, pata yena pon yennài uya paka yamùk molopai yuk yùpùlù nepùppù pata mùlatta pona. Mùkkàlà molopai tukkan kon kappon yamùk wechippù tok anapulàpai, walawok paka tùwàse molopai tùpottàse tok nama pe. ₁₄Tùse yeunossak kon, Barnabas molopai Paul uya tùpon kon kalapàtùppù sàlà yetasak tùuya'nokon yau, molopai tok utàppù tukkan kon kappon yamùk kùlottak, tùwentaimepàtù kon pe. ₁₅“Kàyik yamùk, yà'là pe iwechi pàk sàlà kupù auya'nokon màlà? Kappon yamùk neken nen ina, awalai'nokon nen! Talà ina man Wakù Itekale yekamatoppe tùuya'nokon ewelattà kon pa sàlà yà'là ku'nài pen winàpai tùwemassen Katù winàkàik, kak, non, palau, molopai tamù'nawolon yau nai'nùk konekanàippù. ₁₆Pena tamù'nawàlà kappon yamùk kupùppù ya tàwà teselu kon yau tok utàtoppe. ₁₇Tùse tàwàlàlà Katù uya eke pe tùwechi yekamatok tùuya tùlùppù wakù ton kupù tùuya winà, konok yeuno'nài mùkkàlà kaupai molopai kùyali ipànsak yepetanù'nài iweyu yattai. Kùyali ke elepanài'nokon mùkkàlà molopai eyewan kon yanùkkanài utauchinpantok ke,” tukaik. ₁₈Wa tukaik yeunossak kon uya teleutanùpù kon tùse tukkan kon kappon yamùk wechippù lùppù paka ànwàpai molopai ànpotàpai tok nama pe.

₁₉Màlà tùpo tùulon kon Jew yamùk uyàpùppù Antioch Pisidia pon poi molopai Iconium poi; molopai tok uya tukkan kon kappon yamùk lattàppù tùwinàkài'nokon, Paul wànàppù tok uya tàk ke molopai tok uya iwolokappù màlà pata poi iwelichak pe tekamaik. ₂₀Tùse Jesus ya'lon kon wepilichak tùwoi yau, iwà'mùssakkappù molopai iwennapoppù malà pata pona. Iwemassak pe mùkkàlà molopai Barnabas tawonnan utàppù Derbe pona.

₂₁Paul molopai Barnabas uya Wakù Itekale yekamappù Derbe po, tukkan kon wenappù Jesus ya'lon kon pe. Molopai yeunossak kon wennapoppù Lystra pona, Iconium pona molopai Antioch Pisidia pon pona. ₂₂Tok uya ailon tawonnan Jesus pàk meluntàpappù miyaiwa tok wettoppe ailon tetok tùuya'nokon pàk. “Utànnù'nokon màlà tukke wettalumattàntok yawàlà Katù wettok itepulu pe yak wewonàtok kon pe,” . ₂₃Molo sochi yamùk tawon kon kùlottapai tok uya sochi yennàinan woton kon yanùmùppù tewinpàk. Wàpùlemantok tùuta'lettàik pùla yai tok uya tok tùlùppù Itepulu yemyak ailon tetok tùuya'nokon ipàk yemyak.

₂₄Pisidia yawon kon pata yamùk yawà tùutà kon tùpo, tok uyàpùppù Pamphylia pona. ₂₅Tok uya itekale yekamappù Perga po molopai tok utàppù Attalia pona. ₂₆Molopai màlà motapai tok wennapoppù tuna po Antioch pona, wakù pe Katù wettok yak tùtùlùppù kon motak màlà wotoko yenuka'nùssak nai'nùk ponaloppe.

₂₇Tùwelepansak kon Antioch pona yau, tok uya sochi tawon kon pilipùppù molopai tok uya tamù'nawàlà Katù nùkupùppù tùpokon pe'nokon yekamappù tok pàk, molopai Katù uya asanta yakkokasak Jew yamùk pen uya ailon te toppe, yekamappù nàlà tok uya. ₂₈Molo tok wechippù tachin pe Jesus ya'lon kon.