Timothy utà Paul molopai Silas tawonnan Ya'là
1Paul utàppù màlà miya Derbe molopai Lystra pona. Jesus ya'lon wemapùppù màlà molo itesek Timothy. Ichan ailon tawon nàlà Jesus pàk wechippù Jew pe, tùse ikàipùnù wechippù Greek pe. 2Tamù'nawolon kon ailon tawonnan Jesus pàk Lystra molopai Iconium pon kon uselupappù wakù pe Timothy pàk. 3Paul wechippù Timothy anapai ta'là, màlàpàk yattàppù ya Jew yamùk yattàtok yeselu yawà. Sàlà kupùppù ya màla masapùla tamù'nawolon kon Jew yamùk molo tùwemassan uya Timothy kàipùnù wechi Greek pe ittu pàk. 4Tùutà kon pe pata yamùk yawàlà tok uya yeunossak kon molopai eke ton tùnamasan Jerusalem pon kon nùkupùppù yekamappù ailon tawonnan pàk, yawàlà tok wettoppe. 5Màlàpàk sochi tawon kon wenappù màlà meluntà pe ailon tetok yau molopai tukke tok wenappù wei kaichalà.
Troas po: Paul nene We'nepà'nàtok walai
6Tok utàppù màlà pata Phrygia yawàlà molopai Galatia yawàlà. Wakù Akkwalù uya wakù itekale yekama toppe tok uya Asia po pùla ikupùppù. 7Mysia pona tùuyàssak kon yau, Bithynia pona tùutàiche'nokon tok wechippù, tùse Jesus yakkwalù uya ikupùppù tok utà tukaik. 8Màlàpàk tok utàppù Mysia yawàlà molopai miya Troas pona. 9Màlà yewalupàyi tau Paul uya we'neppà'nàtok walai yeneppù; màlà yau, kàyik Macedonia pon wechi satippe yeneppù ya, molopai tùpawanattà ya, “Àikkà Macedonia pona ina pùikattàse!” te ya. 10Asse'ne Paul uya we'neppà'nàtok walai yene tùpo, ina wekonekappù Macedonia pona tùutà tok kon pe, masapùla ina uya ittuppù Katù uya ina kà'masak Wakù Itekale yekamatoppe ina uya kappon yamùk molonkon nà pàk.
Lydia wenappù Itepulu ya'lonnà pe
11Kanau yau ina utàppù Troas poi miya tossalà Samothrace pona, molopai iwemassak pe Neapolis pona. 12Màlà motapai ina utàppù Philippi pona eke pata tùnamasen Macedonia pon. Sàlà wechippù màlà Rome pon kon pata pe. Molo ina uko'mamùppù malalà. 13Wàlàkka'nàtok weyu yattai ina utàppù pata yapai tuna yena pona, wàpùlemantok patassek wechi molo pe ina uya yekamappù. Ina weleutappù chichiu pe molopai ina uselupappù nossan yamùk iwepilichak kon molo pokonpe. 14Tok tonpa ina uselupa yetanàippù wechippù Lydia, Thyatira pon, pùsalà wechippù màlà tùtalilen walai pon chilanmanài pe tùwessen. Mùkkàlà nossan wechippù màlà Katù yapulànài pe molopai Itepulu uya itewan yappàtùppù yà'là te là Paul uya yetatoppe ya. 15Mùkkàlà molopai itùwùk tawon kon usenpataukappù. Màlà tùpo ina kà'mappù ya tùwùk tak: “Àittàk kon talà esse uyùwùk tau, ailon tawon pe wechi ittusak auya'nokon yau,” tukaik. Ina yeka'nonkappù ya molopai ina utàppù.
Patikichi Tau Philippi Po
16Tewin wei yattai wàpùlemantok patassek yak ina utà tùse, ulichan apyoto uya ina yepoloppù. Pùsàlà yau àli akkwalù wechippù màlà, ikasa tùuyàpù woton yekama toppe ya iku'nài. Tukke pùlayatta yepoloppù ya màlà tepulu yamùk ponaloppe yà'là pe là we'nàtok yekama tùuya winà. 17Paul, molopai ina wenaimappù ya tùwentaimepàtù pe, “Pùsamlo kàyik yamùk mùkyamlo Eke kulu Katù yapyoto ton! Tok uya yà'là kasa là ewepùikattàtok kon ye'ma yekama màlà àpàkù'nokon!” tukaik. 18Sàlà kupùppù ya màlà tukke wei Paul usetakka ponalà. Màlàyau iwelattàppù molopai àli akkwalù pàk, “Jesus Christ yesek yau epakkakà pùsàlà yapai te uya sàlà!” teppù ya. Màlà yattai là àli akkwalù wepakkappù yapai.
19Pùlayatta yepotok tùuya'nokon iwinà utàppù ittusak ulichan yesan uya yau, tok uya Paul molopai Silas tawonnan yachippù molopai tok wolokappù tok uya itepulu yamùk yemlotopona kappon yamùk wesseposek yak. 20Tok uya Paul molopai Silas tawonnan nepùppù Roman yepulu yamùk yemlotopona molopai, “Pùsamlo kàyik yamùk mùkyamlo Jew yamùk, molopai utaimelunpantok kussan tok kùpata kon yau. 21Tok wema'nàtok yawà pàk enupanyan usenupantok kasa pùla. Roman yamùk kùmyamlo molopai màlà wema'nàtok yawà, yawàlà we'nàtok pùla iwechi màlà!” teppù. 22Tukkan kon kappon yamùk utàppù tok kùlottak Paul molopai Silas tawonnan winàkaik àsà pe esse; itepulu yamùk uya Paul molopai Silas tawonnan pon kalapàtùppù, molopai tok ippoppàttoppe tok uya ikupùppù. 23Àsà pe tok ippoppàtù tùpo tok tùlùppù màlà patikichi tak, molopai patikichi yesak uya sa'man pe manatta mùleyintà toppe tok uya yekamappù. 24Sàlà kuttok tùuya yawàlà yepolo tùpo, patikichi yesak uya tok tùlùppù miyolon nùiwa patikichi tak molopai tok pùta tùlùppù ya eme'nek yei yakletak.
25Anomlak yawàlà'ne Paul molopai Silas tawonnan wàpùlemappù molopai tok uselenpappù Katù yelemu yamùk pàk, molopai tùulon kon patikichi tawon kon wechippù tok yeta pàk. 26Màlà yattai, tewinanpa àsà pe tùlùpùnù wechippù, patikichi yapon yalo'mappù ya màlà. Màlàyau asse'ne patikichi mùlatta yamùk utakkokapàtùppù molopai tamù'nawàlà yachisak kon poi tok yaulontok kon wessolokappù. 27Patikichi yesak upakappù màlà, molopai manatta utakkokasak yensak tùuya yau, tamù'nawàlà yachisak kon wepeppù pe yekamappù ya. Màlàpàk kasupala walai mokkappù ya molopai e'wàpai iwechippù. 28Tùse Paul wentaimeppù eke pe, “Àsà pe kamattai, tamù'nawàlà talà ina man!” tukaik. 29Patikichi yesak uya tùweyu woton yennappù, iwewomùppù tùusemittàpaik, molopai iwekkawai'mappù tùplànài'nùmùi'ma Paul molopai Silas tawonnan yemloto po. 30Màlàyau tok yalàppù ya polo pona molopai, “Yà'là kupù uya ken wepùikattà toppe?” tukaik tok yekamappoppù ya. 31“Ailon kakkà Itepulu Jesus pàk, molopai ewepùikattà màlà, àmàlà molopai àyùwùk tawon kon,” tukaik tok uya yeikuppù. 32Màlà yattai tok uya Katù Maimu yekamappù ipàk molopai tamù'nawolon kon itùwùk tawon kon pàk. 33Màlà yewalupàyi tau patikichi yesak uya tok yalàppù molopai tok yattàpàssak tok ippoppàtù yau kukappù ya. Màlà yattai là mùkkàlà, molopai tamù'nawàlà itonpa yamùk usenpataukappù. 34Paul molopai Silas tawonnan yalàppù ya tùwùk tak molopai tok lepappù ya tok yeipa woton ke. Mùkkàlà molopai itùwùk tawon kon wanùssak wechippù màlà utauchinpantok ke masapùla Katù pàk nen uchi ailon te tùuya pàk.
35Ko'làma Roman yepulu yamùk uya tùmaimu kon yeunokoppù patikichi yesak piyak, “Tàwà mùkyamlo kàyik yamùk nùtài,” tukaik. 36Màlàyau patikichi yesak uya yekamappù Paul pàk: “Itepulu yamùk uya tùmaimu kon yeunossak man àmàlà molopai Silas tawonnan nonka toppe. Itàtàk kon làichi, molopai wakù pe mùtàtàik,” tukaik. 37Tùse Paul uya pata yennài nan pàk, “Àli kussak ina uya pùla iwechi màlà, tùse ina ippoppàttai tok kappon yamùk yemloto po, molopai ina mùkyamlo Roman yamùk! Molopai tu'ma ina yenu'mappù tok uya patikichi tak. Tùse ken na' uchi ina eneunoppai tok wechi màlà amak yai? Kane ku, tàwà nen tùmàlà'nokon pe Roman yepulu yamùk uyàpù màlà sàlà motak ina yenpakkase,” teppù. 38Sàlà yekamappù pata yennài nan neunokossan uya Roman yepulu yamùk pàk. Màlà yattai Paul molopai Silas tawonnan wechi Roman yamùk pe yetasak tùuya'nokon yau, tok usenalipappù. 39Màlàyau tok utàppù màlà tok piyak wa tùwessak kon pàk tùusewankono'ma kon yekamase. Tok uya Paul molopai Silas tawonnan yalàppù patikichi tapai molopai tok yekamappoppù tok uya pata nàntoppe tok uya. 40Paul molopai Silas tawonnan uya patikichi nàmàppù màlà molopai tok utàppù Lydia yùwùk tak. Molo ailon tawonnan yepoloppù tok uya molopai tok meluntàpappù tok uya molopai tok utàppù.
