Yeunossak kon Wotokoyi 21

₁Tok nàmà tùpo ina utàppù tuna po tossalà tùwukklàsse ina uyàpùppù Cos pona, iwemassak pe ina uya Rhodes yepoloppù molopai màlà motapai ina utàppù miya Patara pona. ₂Molo ina uya kanau yepoloppù Phoenicia pona tùutàsen, màlàyau ina wenukuppù yak molopai ina utàppù màlà. ₃Ina uyàpùppù màlà Cyprus yentok motak neken molopai ikamikù pen winàkàik ina utàppù Syria pona. Ina wepalùkappù kanau yapai Tyre po masapùla molo, kanau uya tùlotùyi kanka pàk. ₄Molo ina uya tùulon kon Jesus ya'lon kon iwappù molopai yepoloppù, molopai ina uko'mamùppù tok piyau tewin Suntayaka. Wakù Akkwalù yapàikketù winà tok uya Paul pàk yekamappù iità tukaik Jerusalem pona. ₅Ina uko'mantok tok piyau weyu wenukassak yau, ina utàppù te'ma kon tawà. Tamù'nawolon kon utàppù ina ya'là pata poi tùnoppù kon molopai tùmunkà kon yamùk pokonpe. Molo ina wenappù tese'mu kon pona palau yena po molopai ina wàpùlemappù. ₆Màlàyau eichilà ina nùtàyan teppù ina uya tok pàk, molopai ina wenukuppù kanau yak, tok wemeiku tùse. ₇Ina wessa'molùkappù tukka tùutà kon pàk tuna polo Tyre poi Ptolemais pona. Molo ina uya ailon tawonnan yepoloppù molopai ina uko'mamùppù tok piyau tewin wei. ₈Màlà ewanawà là ina utàppù molopai ina welepamùppù Caesarea pona. Molo ina utàppù Wakù Itekale yekama pàk tùusasen Philip yùwùk tak, molopai ina wechippù ipyau. Mùkkàlà wechippù màlà 7 pan kon kàyik yamùk yanùnsak kon, Jerusalem po tonpa pe. ₉Asakùlà'nan kon itayappù pùnon itenchi ton wechippù màlà molo molopai pùsamlo wechippù Katù Maimu yenpoikannan pe. ₁₀Molo ina wechippù màlà tukke kulu pùla là wei, màlà yattai Katù Maimu yenpoikanài Agabus itesek welepamùppù Judea poi. ₁₁Iyàpùppù ina piyak molopai Paul pokùlùyi mokkappù ya, tùtta molopai temyatù tawon yaulomùppù ya ike. Molopai: “Suwa nùkayan Wakù Akkwalù: ‘Sàlà pokùlù yesak yaulonpàtù màlà sàlà kasa Jew yamùk Jerusalem pon kon uya, molopai tok uya itùlù màlà Jew yamùk pen yemyak,’ ” teppù ya. ₁₂Sàlà yetasak tùuya'nokon yau, ina uya molonkon nà kappon yamùk pokonpe Paul pawanattàppù Jerusalem pona iità tukaik. ₁₃Tùse yeikuppù ya, “Yà'là pe ewechi kon màlà, akalawù kon sàlà kasa molopai uyewan ikkwàtù auya'nokon,” tukaik. “Wekonekasak man uyaulonpà toppe neken nà Jerusalem po pùla, tùse welittok pe nàlà Itepulu Jesus ponaloppe,” tukaik. ₁₄Iità tukaik ina uya yeleutanùpù pùla iwechippù màlà, màlàpàk ina weleutappù molopai, “Tàwàichi Katù yeselu nekkupùi,” teppù ina uya.

₁₅Màlà tùpo, ina uya tapluli kon konekappù molopai ina utàppù Jerusalem pona. ₁₆Jesus ya'lon kon tonpa yamùk Caesarea pon kon utàppù nàlà ina ya'là, molopai ina yalàppù tok uya kàyik ipyau ina wettok woton Mnason itesek yùwùk tak. Cyprus pon pe iwechippù màlà molopai pena motapai Jesus ya'lon pe iwechippù màlà.

₁₇Ina welepansak Jerusalem pona yau, ailon tawonnan uya ina yanùmùppù tùutauchinpaik. ₁₈Iwemassak pe Paul utàppù ina pokonpe James yense molopai tamù'nawàlà eke ton tùnamasan wechippù màlà molo. ₁₉Paul uya, “Talà là na' messatàu?” teppù, molopai tamù'nawàlà tewin pàk Katù nùkupùppù Jew yamùk pen kùlottau tùwotokoyi yai yekamappù ya. ₂₀Yetasak tùuya'nokon yau tok uya Katù yapulàppù. Màlàyau tok uya Paul pàk, “Menyaik utonpa, tukke Jew yamùk wenasak ailon tawonnan pe molopai tamù'nawolon kon mùkyamlo law yawàlà kulu tùwessan. ₂₁Eyekale yetasak tok uya man, tamù'nawolon kon Jew yamùk yenupa pàk ewechi, Jew yamùk pen patassek yau tùwemassan, Moses winàpaino enupantok nonka toppe tok uya, molopai tùmunkà kon yattà tok uya pùla iwettoppe Jew yamùk yattàtok yeselu yawàlà. ₂₂Ewelepansak yeta kulu kan tok uya màlà. Yà'là kupù ken? ₂₃Ina maimu yawàlà ikukkà. Asakùlà'nan kon kàyik yamùk talà man, ‘Sàlà kupù uya màlà,’ tawonnan nùssan Katù pàk. ₂₄Tok ya'là itàkà molopai wekolùkantok yawàlà we'nàtok mùkupùik tok pokonpe, molopai tok ne'ma me'maik tok ponaloppe; màlà yattai nen uchi tùppai kon na tok uya màlà. Sàlà kasa iwechi yau tamù'nawolon kon uya ittu màlà, ailon pe pùla sàlà yamùk àpàk uselupantok kon wechi, tùse Law yawàlà ewemapù ittu tok uya. ₂₅Tùse Jew yamùk pen ailon tawonnan pe iwenasak kon, yemyak kaleta yeunokoppù ina uya, tok pàk ina uya yekamappù, ina usenumenkasak man yà'làlà kùyali, ikonekasak katù yemloto pona ichalattàsak lùppù napù tok uya tukaik; wapùla mùn yeme tok uya tukaik, wapùla ànù'là i'mùtùntàsak kamo yanù tok uya tukaik, molopai àli imakuyippù kuttok esak ke winàpai tok wettoppe,” teppù Paul pàk. ₂₆Màlàyau Paul uya kàyik yamùk yalàppù molopai iwemassak pe wekolùkantok yawàlà kupùppù ya tok pokonpe. Màlàyau iitàppù Katù yùwùk tak, yà'là kaichalà lùppù là wei wechi molo wekolùkantok weyu wenukattoppe yekamase, ilepatok tùtoppe tok ponaloppe tewin pàk.

₂₇7 pan wei wenukapùiwa là yau, tùulon kon Jew yamùk pata Asia pon kon uya Paul yeneppù Katù yùwùk tau. Molopai tok uya tukkan kon kappon yamùk sakolopappù molopai Paul yachippù tok uya. ₂₈“Israel pon kon, ina ipùikattàtàk! Pùsàlà mùkkàlà kàyik mailàlà tùusalà pàk tùwessen, tamù'nawolon kon yenupa pàk kùtonpa kon yamùk, kùmàlà'nokon law, molopai sàlà Katù yùwùk, tawon talumattà pe. Molopai tu'ma Jew yamùk pen tonpa yamùk nessak ya nàlà man sàlà Katù yùwùk tak, sàlà wakù pata koppose,” tukaik tok wentaimeppù. ₂₉Wa teppù tok uya màlà masapùla Trophimus Ephesus pon yensak tùuya'nokon Paul ya'là pata yau pàk, molopai Paul uya Katù yùwùk tak yasak pe yekamappù tok uya. ₃₀Utaimelunpantok wechippù màlà tamù'nawolon pata yawàlà, molopai kappon yamùk waplùmùppù tamù'nawàlà tamùkke molopai tok uya Paul yachippù, iwolokappù tok uya Katù yùwùk tapai. Màlàyau asse'ne Katù yùwùk mùlatta utakkoloppù. ₃₁Tok wechi Paul wànàiche tùse, itekale yetappù màlà Rome pon kon eke soicha yamùk yepulu piyak, tamù'nawàlà Jerusalem utaimelunpasak pàk. ₃₂Asse'ne eke soicha yamùk yepulu uya soicha yamùk molopai tok yepulu yamùk yalàppù molopai tok utàppù aitunpe àsà ton tukkan kon kappon yamùk kùlottak. Tok yensak tùuya'nokon yau, tok weleutappù Paul ippoppàtù tùuya'nokon yau. ₃₃Eke soicha yamùk yepulu uyàpùppù molopai Paul yachippù ya, molopai asa'là chin ke yaulonpàttoppe ikupùppù ya, “Ànùk ken pùsàlà kàyik molopai yà'là kussak ya nai?” tukaik tok yekamappoppù ya. ₃₄Tùulon kon kappon yamùk wentaimeppù yà'làlà tukaik molopai tùulon kon tùpatalà. Utaimelunpantok wechippù màlà molo màlàpàk Eke soicha yamùk yepulu uya yà'là iwalai iwekkussak lùppù yepolo pùla iwechippù, màlàpàk tok uya Paul yalàppù soicha yamùk yùwùk tak. ₃₅Tok uyàpùppù wenu'nàtok ipolo motak neken, molopai soicha yamùk uya yalàppù masapùla ilinà wechi àsà pe pàk. ₃₆Tok uyàpùppù ite'mappù pàk molopai tok wentaimepàtùppù, “Iwàtàk kon,” tukaik.

₃₇Paul yalà soicha yamùk uya tùwùk kon tak winàkàik iwechi yau, eke soicha yamùk yepulu pàk, “Masa ka' uselupa àpokonpe lù?” teppù ya. “Greek maimu yau na' tùuselupasen àmàlà?” tukaik yekamappoppù ya. ₃₈“Àmàlà pen ken na' mùkkàlà Egypt pon kappon 4,000 pan kon iwekonekasak kon, àsà pe tùwepanta'masan yanàippù pen wontaik yak pena kulu pùla?” tukaik. ₃₉Paul uya yeikuppù, “Jew Iulà, iwentusak lùppù eke pata Tarsus Cilicia yawon po. Masa tàwà, kappon yamùk telupaiche,” tukaik. ₄₀Eke soicha yamùk yepulu uya, “Ewaik,” teppù. Màlàyau Paul wà'mùssakkappù wenu'nàtok ipolo po molopai kappon yamùk yekamappoppù ya temyatù ke eppana tok wettoppe. Tok weppakasak yau, Paul uya tok yelupappù Hebrew maimu yau.