Paul Uselupa tùwenai Agrippa yemloto po
1Agrippa uya Paul pàk, “Eyiwalà euselupa pa elepasak man,” teppù. Paul uya temyatù yenkappù molopai ichelupappù tùwenai sà kasa: 2“Kin Agrippa! Wakù pe kulu uponalok pe man sàlà pe uselupa tok uyiwalà uwenai eyemloto po tamù'nawolon Jew yamùk uselupatok uwinàkàik pàk. 3Sàlà màlà iwalai kulu masapùla ittunài àmàlà wakù pe tamù'nawolon Jew yamùk yeselu molopai ekamappopà'nàtok. Eyekamappo uya sàlà uselupa yeta pa tùusemittàpaik pùla.
4“Tamù'nawolon kon Jew yamùk nùttuyan atta là wemapùppù elekkwà pe wechi motapai. Tok nùttuyan iwepyattàppù motapai wemapùppù, upata yau wapiya, molopai Jerusalem po. 5Tok uya tachin pe ittuppù màlà, enekamapai tok wechi yau, iwepyattà motapai wemapùppù sa'man kulu Pharisee yamùk yeselu yau. 6Sàlà pe talà wessaik satippe uyittu toppe masapùla ikupù tùuya teppù Katù uya lùppù kùtamo kon pàk màmuku uya pàk. 7Màlà ikupù tùuya teppù Katù uya lùppù tamù'nawolon kon 12 pan kon ipayan nùmàmuku yanùn toppe tùuya'nokon, Katù yapulài'ma'nokon wei molopai ewalupà kaichalà. Kin Agrippa, sàlà tùmàmusai'nùk pàkànsau Jew yamùk utalumattàyan. 8Yà'là peichi iwechi pàk ailon te auya'nokon yentai iwechi màlà Katù uya iwelichak wuluuka weli'nàtok yapai pàk?”
9“Iulà nàlà uya tamù'nawàlà yà'làlà kupù Jesus Nazareth pon yesek winàkàik pe yekamappù. 10Màlà kupùppù uya màlà Jerusalem po. Ewaik tetok yepoloppù uya màlà eke ton paatele yamùk winàpai. Molopai kappon yamùk Katù ponalok kon tùlùppù uya patikichi tak. Molopai tok welittok pe tok kussak yau, ewaik teppù uya. 11Tukke itekkwa tok talumattàppù uya màlà tamù'nawàlà Jew yamùk wepilittok itak tau, molopai àli pe Katù winàkàik tok uselupatoppe tok kupùiche wechippù. Useka'nonka tok mattanùpùiche yau, tùulon pata yak là tok talumatàik utàppù màlà,” teppù Paul uya.
Paul Uya Tùwemyakanmappù Yekama
12“Sàlà kusse utàppù màlà Damascus pona, ewaik tetok molopai ikuttok eke ton paatele yamùk winàpaino pokonpe. 13Wei wenasak inakattapailà tùse asantau akkwa tentai epùn poi, Kin. Akkwa pe wei yentai iilenpasak uwoi molopai kàyik yamùk uya'lon kon woi nàlà. 14Tamù'nawàlà ina wekkawai'mappù non pona, molopai mayin yetappù uya wateya upàk Hebrew maimu yau, ‘Saul, Saul! Yà'là pe iwechi pàk utalumattà auya màlà? E'neppe ewe'wànà màlà atta ke uwàpàtù auya yau,’ tukaik. 15‘Ànùk ken àmàlà, uyepulu?’ tukaik yekamappoppù uya. Molopai Itepulu uya: ‘Jesus Iulà mùtalumattàyai'nùk. 16Tùse e'wuluukakà, molopai à'mùssakkakà atta po. Usenpoikasak sàlà ayanùnse uyapyoto pe, tùulon kon kappon yamùk pàk màlà eneneppù molopai enetappù yekama auya màlà, molopai unekama àpàk. 17Àmokka uya màlà kappon yamùk Israel pon kon molopai Jew yamùk pen winàpai. Mùkyamlo kùlottak eyeunoko uya màlà. 18Àmàlà wechi màlà tok yenu yakkokanài pe molopai tok lattànài pe ewalupà winàpai akkwa winàkàik, molopai Settan meluntàlù winàpai Katù winàkàik, ailon tetok tùuya'nokon uyau yai tok uya usentuppantok tùmakuyi kon pàk yepotoppe molopai wakù ton yepotoppe tok uya Katù nanùmùssan kùlottau,’ teppù Jesus uya upàk,” teppù Paul uya tok pàk.
19“Màlàpàk we'neppà'nàtok walai uneneppù epùn poino maimu yawàlà pùla wechi pùn, Kin Agrippa. 20Wapiya Damascus po molopai Jerusalem po molopai nen uchi tamù'nawàlà pata Judea yau molopai Jew yamùk pen kùlottau, Wakù Itekale yekamappù uya tok welattà toppe Katù winàkàik tùmakuyi kon winàpai, molopai yà'làlà tùwemyakanmasak kon yekamanài kuttoppe tok uya. 21Sàlà wenai màlà Jew yamùk uya uyachippù Katù yùwùk tau wechi tùse, molopai uwànàiche tok wechippù. 22Tùse sàlà wei tepose Katù uya upùikattàsak man, màlàpàk wà'mùssakkasak man talà, unekama yekamase tamù'nawolon kon pàk, echikili ton pàk molopai eke ton pàk ekkaichalà. Tekamayai'nùk sàlà, màlà lùppù, màlà yentak pùla Katù Maimu yenpoikannan molopai Moses uya iwekkupù màlà teppù lùppù: 23Christ wettalumattà màlà, molopai mùkkàlà wechi màlà wapiya tùwe'wuluuka woton weli'nàtok yapai, akkwa yekamase Jew yamùk pàk molopai Jew yamùk pen pàk,” teppù nàlà Paul uya.
24Paul uselupa tùwenai sàlà kasa tùse, Festus wentaimeppù iwinàkàik, “Autayaupasak man Paul! Eke pe eusenupatok uya màlà ayayaupa,” tukaik. 25Paul uya imaimu yeikuppù, “Utayaupa pùla man, tùnamasen Festus! Uselupayaik ittui'ma ailon pàk. 26Kin uya sàlà yamùk ittu pàk yà'là pe pùla yelupa uya màlà. Ittu ya pùla là yà'làlà wekkussak pùla tùttuyaik. Masapùla mailà ettanau iwekkupù pùn. 27Kin Agrippa, ailon tawon uchi àmàlà Katù Maimu yenpoikannan pàk? Tùttuyaik ailon te auya,” teppù Paul uya. 28Agrippa uya Paul pàk, “Asse'neichi Christ ya'lon nà pe uma auya pe mùttuyan?” teppù. 29“Tachin pe wapùla tachin pe pùla iwechi yau, wàpùlematok wechi màlà Katù pàk, àmàlà molopai tamù'nawolon kon uyetayai'nannùk sàlà pe wena toppe ukasa, tùse yachisak pe pùla,” tukaik Paul uya imaimu yeikuppù.
30Màlàyau Kin Agrippa, Kopùna molopai Bernice, molopai tamù'nawolon kon we'wuluukappù. 31Tùutàsak kon yau tok uya tùyiwalà'nokon, “Pùsàlà kàyik uya yà'làlà kussak iwelittok itepeppù pe wapùla patikichi tak itùtok itepeppù pe pùla man,” teppù. 32Molopai Agrippa uya Festus pàk, “Pùsàlà kàyik nonkappù sàlà eppaino Caesar pawanattàsak ya tùkottùma toppe ya pùla iwechi yau,” teppù.
