Galatians 4

₁Tùse sàlà ittutàk kon. Walawok muleppù tùkàipùnù yemamin yanùmù woton tùkussen appyoto kasa mule pe iwechi yau, tamù'nawolon yesappe lànen iwechi tùse. ₂Tennàinan ke iwechi màlà molopai tenupanàinan ke, ikaipùnù nùkupùppù wei ponalà neken. ₃Màlà kasa làma we'nàppà'nokon. Sàlà wolù yeselu yapàikketù yappyoto pe. ₄Tùse iwalai iweyu uyàssak yattai, Katù uya Tùmu yeunokoppù. Iwentuppù màlà nossan yai molopai law yo'no, ₅mùkyamlo law yo'no tùwessan pùikattàse, Katù munkà pe wenantok kon pe.

₆Masapùla tùmunkà pe ewechi kon pàk Katù uya Tùmu Yakkwalù yeunokoppù màlà kùyewan kon yak, Akkwalù mùkkàlà yekamapponài “Ukàipùnù, Ukàipùnù,” tukaik. ₇Màlàpàk Katù yai apyoto pe làma ewechi pen nen uchi màlà tùse imu pe. Molopai imu pe ewechi pàk, àkàipùnù yemamin yanùntok auya woton.

₈Pena Katù ittu auya'nokon pùla ewechi kon yau, katù yamùk iwalai non pen yappyoto pe ewechippù kon màlà. ₉Tùse sàlà pe Katù mùttuyatàik, wapùla, màlà yentak Katù eyittuyatàu, yà'là pe ken uchi iwechi pàk ennappopai ewechi kon màlà attu'mùnon molopai italumayichan eselu yamùk yak? Itappyoto pe tu'ma ka' eppai messatàu miyalà lùppù lù? ₁₀Tùpatalo'nan wei yamùk yapulànnan amyamlo, kapùi yamùk, pata weyu yamùk molopai kilichimochi yamùk! ₁₁Usenalippayaik, yà'là woton pe pùla àpàkù'nokon we'wotokomasak yeselùkek iwechipàk.

₁₂Apawanattàyatàu Iulà, utonpa yamùk, ukasa enatàk kon. Akasa'nokon wenasak pàkànsau. Yà'làlà iwalai pen kussak auya'nokon uwinàkàik pùla man. ₁₃Mùttuyatàik e'neppe wechi pàk itekale yekamappù uya àpàkù'nokon wapiya. ₁₄E'neppe wechi yau uyenpàtù auya'nokon pùn wapùla unulunpa auya'nokon pùn, uye'netù pe tùwessen upun yau pàkàlà wanittà pe wechi tùse. Tùse làkku kùyanùntantàu Katù inchelùyi yanùmù auya'nokon kasa, kùyanùntantàu Christ Jesus yanùmù auya'nokon kasa! ₁₅Yà'là pe ken autauchinpatok kon wechippù nai? Yekama uya sàlà màlà kasa ikupù auya'nokon yau eyenu kon mokkappù sàlà auya'nokon eppaino, molopai itùlù kon pa uyemyak. ₁₆Eyeyaton kon pe na' wenasak nai ailon yekama uya winà?

₁₇Tùulon kon kappon yamùk mùkyamlo tùusennakasan kulu ayachitok kon pe neken tùuya'nokon tukaik, tùse wakù ponaloppe pùla. Uwinàpai apantakaiche'nokon tok wechi màlà molopai tùponalok kon pe neken ewechi kon pa. ₁₈Wakù pe iwechi màlà kappon yamùk wechi kulu eyiche yau wakù pàkàsau. Tùse tàwàlàlà apyau'nokon neken nà wechi yau pùla. ₁₉Mule yamùk u'nùn ton amyamloàponalok kon pe sa' e'nek wechi'monsak walai yau tu'ma wessaik, Christ yeselu yanùmù auya'nokon eyewan kon yak ponalà. ₂₀Apyau'nokon kulu eppai wessaik sàlà pe, tùulon pe eyelupatoppe uya. Utaimelunpasak kulu man àpàkù'nokon.

₂₁Masa yekamatàk mùkyamlo law yo'no eppai nokon, yà'là tessak là na' law uya yekamappù pùla nai àpàkù'nokon? ₂₂Iwe'menukasak màlà Abraham wechippù asa'lon kon imunkà, tewinan apyoto nossan yaino molopai yakon apyoto pen nossan yaino, tukaik. ₂₃Appyoto nossan wentuppù màlà imu ke wentunsek kasa là, tùse apyoto pen nossan wentuppù màlà imu ke Katù uya ikupù tùuya teppù lùppù winà. ₂₄Sàlà yamùk wechi màlà yentok ipàkàlà pe, pùsamlo nossan yamùk mùkyamlo asa'lon ikupù tùuya teppù Katù uya yekamannan. Tewinannà mùkkàlà Sinai Tùpù winàpaino, tùumunkàtasen appyoto ton pe. Pùsàlà mùkkàlà Hagar. ₂₅Hagar mùkkàlà Sinai Tùpù Arabia pon yekamanài molopai nàlà Jerusalem sàlà pe nai'nùk. Masapùla appyoto pe man tùmunkà yamùk pokonpe. ₂₆Tùse Jerusalem epùn po nai'nùk mùkkàlà appyoto pen, molopai kùsan kon mùkkàlà. ₂₇Masapùla iwe'menukasak màlà:

₂₈Tùse utonpa yamùk, amyamlo mùkyamlo Isaac kasa Katù uya ikupù tùuya teppù lùppù munkà. ₂₉Màlà yattai mùkkàlà mule wentunsek kasa iwentusak lùppù uya, Akkwalù meluntàlù winà iwentusak lùppù talumattàppù, molopai wa lùppù man sàlà pe. ₃₀Tùse yà'là tesak ken Katù Maimu uya nai? “Apyoto nossan molopai imle yenpakkakà. Masapùla apyoto nossan mule uya tùkàipùnù yemamin pùkkù yepolo pen màlà apyoto pen nossan mule pokonpe,” tesak ya man. ₃₁Màlàpàk nen uchi, utonpa yamùk, appyoto nossan munkà pen kùmyamlo, tùse appyoto pen munkà.